佳士得香港2024春季拍賣會（上）

魔術師得閒都睇吓網上啲名錶圖錄，「鞭策」一下自己搵錢的「雅興」，但又竟然誤打誤撞跑進了佳士得（Christie's）最新在我城舉辦的拍賣會網站：

（圖片來源：佳士得香港2024春季拍賣會官網, captured on 25 May 2024）

當中最能吸魔術師的睛的就是這個「名錶」拍賣系列：

（圖片來源：佳士得香港2024春季拍賣會 > 精緻名錶特別呈獻："世代珍傳"及"歷久常新"系列, captured on 25 May 2024）

撳入網頁睇吓，見到啲拍品都不是全是天價款式，上千萬百萬我城貨幣（下同）的拍品當然有，但由起標價數萬到估價三幾十萬的「低至中價貨」都唔少，你話魔術師無睇啱一兩件就假嘅。

於是魔術師就在網上登記咗戶口同埋參加拍賣（要提供身份證 copy 及地址證明），然後便膽粗粗走去會展睇實物展覽。

估唔到個展覽相當親民，魔術師就無去睇書畫包包，直接走去睇錶。

個場人頭湧湧，有二手錶佬、有遊客、有本地有青、當然更有本地廢老 - 魔術師駐足參觀緊某個飾櫃之時，就聽到有條男人廢老聲解畫俾佢老婆聽，話呢個型號有乜乜乜歷史，嗰個型號又取代呢個型號，仲有嗰個型號雖然係新版，但錶面太「花巧」，反而無舊版咁簡潔...嗶呢吧啦，又似又識嘢咁（其實係在老婆前炫耀吧）：

當魔術師由呢個飾櫃移到去另一個飾櫃睇嘢，佢哋兩公婆又跟住嚟解畫...魔術師轉過頭去，只是呢兩位老夫妻其貌不揚，有啲似幻想中的 Cool Him 夫婦，真係唔知呢位阿叔係咪真係「收藏家」。

順帶一提，展場提供即場試戴服務，魔術師見不少洋腸都要「試戴」一下，又叫女伴幫手影相，可能順手 post 埋上 FB/IG，「試咗當買咗」，所以平時見到啲人炫富又真係唔好太認真（新何太除外）。

拍賣會可以親身、網上、電話、甚至委託都可以，每口叫價約 10%。魔術師登記了參加拍賣會後，便在網站上左碌右碌，暸解吓成個競投的流程及使費。

（圖片來源：佳士得官網 > 常見問題解答, captured on 26 May 2024）

買入價要計埋「買方酬金（Buyer premium）」 - 「買方酬金」是以成交價的某個百分比來。用試算機計吓，不超過 100萬者就是 26%：

睇完一輪，魔術師當然唔會傻到去現場舉牌，而係安坐家中，開定手機食住花生睇吓有無死雞執。下文待續。

＊＊＊

伸延閱讀：

開心投資 快樂人生

佳士得香港2024春季拍賣會（下）