一人飯局（2024年3-4月）

先寫一人飯局，遲吓再寫二人飯局 XD

1. 水門雞飯（旺角）

某夜魔術師同靚姐姐在尖沙嘴二人飯局之後，行吓行吓見到呢間海南雞飯店，靚姐姐竟然話買定個飯拎返屋企第二朝食，真係難以想像！由於靚姐姐一向識飲識食，魔術師俾佢撩起好奇心，這晚放工後便到旺角分店試吓味：

（圖片來源：Openrice > 餐廳 > 香港 > 旺角 > 水門雞飯 (豉油街), captured on 1 May 2024 ）

堂食掃碼點菜，魔術師就叫了個海車雞飯，一個鳳爪小食，同埋特價奶茶加珍珠：

鳳爪、奶茶、甚至係跟餐嘅冬瓜湯都唔錯，尤其是係個湯，仲有少少胡椒味，埋哂魔術師口味；但係最弊就係主食個雞飯，可能係魔術師唔識食，啲雞真係無乜味（連「雞無雞味」都說不上），就算醮埋個醬都唔係好掂（海南雞的醬汁都係靈魂所在，好食的醬汁魔術師往往會清零）。估唔到今次俾「識飲識食」的靚姐姐「跣」了一鑊（事後靚姐姐都有問魔術師「好唔好食」，可能佢都覺得中咗伏）。

魔術師餐單：海南雞飯（＄54）、泰式鳳爪8隻（$18）、泰式凍奶茶（特價＄8）加珍珠（＄8），共＄88。

＊＊＊

2. 翡翠拉麵小籠包（屯門市廣場）

其實魔術師覺得呢間上海嘢連鎖店的食物味道真係一般般，以前一個月無食到一次，係疫情期間夜晚無嘢好食先多咗叫佢哋嘅外賣自取（拎到返屋企啲飯係凍嘅），復常後又變返好日都唔嚟一次：

（圖片來源：Openrice > 餐廳 > 香港 > 屯門 > 翡翠拉麵小籠包, captured on 1 May 2024 ）

呢間嘢唯一嘅好處就係開得比較夜，魔術師出去夜咗都有得食（餐餐譚仔、元氣都食得悶）。慣常嚟講，魔術師食開的餐廳都有「定食 list」，但呢間嘢魔術師就無乜心水 - 唯一可選的就係「清燉雞湯」，尤其魔術師最鍾意先父煲的「田七煲雞」，叫一客「清燉雞湯」加粒自帶「田七片」就有返個味道，一樂也。

可惜這晚「清燉雞湯」沽清，只好叫個酸辣湯，好在仲有個「花雕醉雞」算是不錯。

魔術師餐單：上海小龍包（＄45）、花雕醉雞（＄85）、酸辣湯（＄58）、茶錢（＄10），連加一共＄217.8，真心唔值。

＊＊＊

3. 泰美美食

講到夜食飯，唔少得龍門居食街。尤其是依然好多食店夜晚9點已經開始閂門，好似魔術師呢啲夜貓子要搵食就愈來愈艱難。好在龍門居食街仲會開到深夜，半掃街半主食都可以飽肚。好似呢間以煎釀三寶、炸雞髀、碗仔趐聞名的外賣食店（以前仲有泰國嘢食，但近年就無咗），都係魔術師多年的心水選擇：

（圖片來源：Openrice > 餐廳 > 香港 > 屯門 > 泰美美食, captured on 1 May 2024 ）

今次簡單地只係叫咗碗韮菜餃，菜底、麻油、醋、胡椒粉全加，魔術師一異都係連湯都飲埋。而作為小店，老闆娘連問魔術師要不要外賣餐具都廢事，總之一古腦兒塞入膠袋，慳返啲時間做第二單生意好過。

雖然話要走塑，但小店依然係用發泡膠碗，而事實上又真係保到溫，起碼魔術師搭完車返到屋企都仲熱，唔知日後可以用乜來取代。係可以慳嘅就係外賣餐具，不過魔術都會拎返公司，食外賣又好、食杯麯又好、食散水餐都好，總會有用處。

魔術師餐單：韮菜餃（8隻）：36元。