新聞雜評（五百零八）

宏福苑業主大會｜最後一會心態出席　不抱期望、珍惜相聚、堅持追責　居民：期望「炳強」釘死失職公務員

「我哋好憂鬱呀」、「我連宏福苑家鄉都冇埋，你話我心情係點？」、「冇期望，只有失望」、「冇得追究啦，𠵱家佢揸晒旗」、「我都期望，阿炳強呢，用釘死佢嘅態度，去釘死嗰啲失職嘅公務員。」⋯⋯進入業主大會會場前，宏福苑的業主們拋下一句句的心聲。

政府委任管理宏福苑的合安公司，今晚（2日）舉行第二次特別業主大會。同一個屋苑，居民要散落大埔、啟德、香港仔、天水圍開會。99.1% 居民已簽紙賣樓，但在業主大會上，他們得悉仍要為屋苑買責任保險，有居民質疑：「大家都返唔到去，個保險買嚟做乜呢？」

散會後，不少居民對合安的安排，對政府重置方案都大吐苦水。有長者業主斥，政府會就他們的交易收印花稅，有如「乞衣兜度揦飯食」，直指居民怨氣爆棚。有業主說，「佢（合安）都達成咗我冇期望呢 part 嘅」。有業主仍然出席，只為把握每次機會，跟街坊好好相聚。

街坊共識：冇期望

開會前、散會後，不少居民都異口同聲說，對今次的業主大會沒有期望。宏建閣范小姐表示，業主大會沒解答到什麼問題，「本身冇期望，佢都達成咗我冇期望呢 part 嘅」。

宏志閣黃小姐也說：「冇期望㗎啦，對呢個會」，指報告資料仍出錯，感覺連開會最重要的目的也未達到。但她仍出席，主要是很想和街坊一起參與最後一次會議，「話畀自己聽，我係一個宏福苑居民」，亦很想告訴其他街坊、包括已離世的街坊，「我哋係好努力想堅持、想保護我哋嘅家園」。

我好心痛我哋好努力，但我哋做唔到

黃小姐哽咽：「我好心痛、我好心痛我哋好努力，但我哋做唔到，但我哋都好努力去堅持」。她續說：「我哋好鍾意呢個地方，亦都好鍾意香港。我唔係好明，點解我哋咁努力喺度生活，好努力工作，為咗呢間屋、我哋人生去籌謀嘅時候，點解呢啲事會發生喺我哋身上，而我哋今日要離開呢個屋企，呢個係我大半年好心痛嘅地方。我諗呢個會係跟住我一世好心痛嘅地方，不過呢個都係我永遠嘅屋企嚟。」她說時眼泛淚光。

8.31 死線過後，仍有 17 戶未向政府交回接受收購建議書，黃小姐認為，他們對公義或爭取合適居所，有自己想法，「我希望佢哋喺呢個路上，都知道我哋永遠都係宏福苑街坊，我哋點樣都會喺心中會有我哋大家係度」，「宏福苑個連結永遠都會喺度，我哋個愛、嗰個精神，我唔相信會因為有咩事而分割到我哋。」

未簽收購信歐太：滿足於 99.1%  這個數字是膚淺

拒在限期前交「收購信」的宏泰閣歐太向政府喊話：「政府聽到我哋嘅聲音，唔該你去幫下我哋，我哋嘅要求好簡單、好直接，你畀返基本尊重我哋，我哋嘅要求你去聽、你去同我哋溝通。」

她指政府收到 99.1% 的業主遞交收購業權意向書，「你係咪真係咁樣覺得開心呢？你如果問下大家係將多係出於自願，真係好想出售宏福苑嘅，個 percentage 係咪真係咁大？」她形容，絕對沒那麼多街坊是甘心，只是大家明白要面對現實，必須被迫作出這個選擇。

她指若政府滿足於這個數字是膚淺，因無論選擇那一個計劃，實質上都只有出售業權這一個選擇，若政府想事情圓滿解決、大家安居樂業，應不止這一個選擇，「我出售唔出售，大家有各自為自己屋企嘅考慮，每個家庭有唔同嘅故事。」

批只有賣樓一個選擇

「如果你覺得原址重建好耐嘅，咁你有冇畀另一個 counter offer 我哋？畀另一個選擇我哋？」歐太批評政府未有聽取居民聲音，只有賣樓一個選擇，「容唔下」等待獨立調查報告，也沒有七座的損壞報告。她相信如果所有資料公平公開，大家看畢資料之後，會令大家甘心去賣，相信宏福苑居民會多謝政府，「我出售得唔甘心嘅話，就唔係你所講嘅情、理、法令到我哋安居樂業，我哋就算出售咗業權，其實我哋心底裏永遠都唔會放得下呢樣野，永遠都會有呢條刺囉！」她希望政府多聆聽居民聲音，站在居民角度想。

「街坊都好珍惜嚟呢度嘅機會」

歐太又提到，最初街坊接受訪問，希望原址重建，有指收購業權需要數年時間，並不容易，勸大家放棄，「但原來政府只要佢有決心，我哋真係睇到呢個政府係有行動力」，5 月才寄出要居民簽署收購意向書的信，8 月 31 日已有 99.1% 業主簽署。她強調不止 168 名離世居民的遺屬傷心，其他宏福苑家庭也為這些街坊傷心，而本身也有不同的家庭問題要處理，「喺呢個時候，你嘅行動力可唔可以放慢少少，畀少少彈性我哋呢？」她指大家明白面對這件事必須前行，但同時可否不要被「死線」推他們走，有不同的部門、新聞，「令到我哋發現我哋已經無路可行之餘，原來我哋依家企緊嘅空間只係夠兩隻腳企，前後左右我都會遇到危險呢？」

可能是最後一次作為業主參加宏福苑的業主，歐太感嘆：「真係唔知可以開多幾次業主大會，所以其實我哋大家街坊都好珍惜嚟呢度嘅機會。」她舉例即使一開始未夠法定人數，大家都願意等正趕來的街坊，感謝街坊搬到其他區、以至放工時間也趕過來開會，令會議有足夠法定人數，形容不論是否賣了樓的街坊，也是著緊宏福苑。她批評合安再次在會上多次「遊花園」，「兩次嘅會可以有幾大成果呢？我真係覺得兩次嘅會都係晒時間囉，兩次都係遊花園」，後來更直言：「咁其實我嚟唔嚟都冇分別㗎喎！」

歐太表示很驚訝合安向業主指，業主未來要繼續為大廈買保險，「大家都返唔到去，你個保險係買嚟做乜呢？」她質疑政府已經收購業權，為何仍要他們買保險，指是首次聽到法例要求業主要繼續為大廈公共部分買保險。她亦指，宏志閣居民都說過去三個月未曾回家，但業主 6 月起一直付錢以維持宏志閣的升降機運作，合安亦未能回答居民（葉家駒）提問為何要維持升降機運作。

歐太指居民最關心何時安排大家再上樓，陳偉光僅重覆可找解說隊、一戶一社工，然而各座居民都未有再回家，「大家就會諗，點解之前有啲人可以申請到呢？你係基於乜嘢原因——又冇公布過——去選擇嗰堆幸運兒上樓呢？」她指居民都有向社工反映因不同原因要再上樓，但今日合安又重覆早前關於搬新居後的再上樓安排，「大家都有唔同方案揀，如果我揀一個幾年後嘅方案，係咪我幾年後先可以上樓? 」

「無論我哋講幾多次，你（政府）話你哋聽到安排緊，但係其實永遠都冇一個定案，淨係喺度拖，」歐太指八座街坊都向政府反映再上樓的要求，雖政府早前說過，而合安主持（梁穎詩）在會上也說一定會讓居民上樓，但居民向合安問到何時和如何安排，「佢全部都將個波射返畀政府，但承諾嗰個係佢喎？」她指未知政府會何時再安排居民上樓，質疑是否必須等到居民新屋入伙。

宏道閣翟生關注保險受保人問題

宏道閣第一手業主翟先生提早離開大會，他關注仍有一份保險繼續，但現時法團「散晒」，如被「逐個擊破、一盤散沙」，加上逾 90% 業權落入政府，「咁受保人係邊個呢？係政府定係我哋業主呢？」，惟他未有機會發問。他又指，一般火災政府不需參與，這次是特例，「我哋最近聽到啲人話，我哋咩都要、想要、仲想要，咁就唔係咁好，要適可而止」，又指「我個人仲喺度，我已經覺得好幸運。」

翟生指，不知將來是否仍會有業主大會，「有我一定會盡量參加」。若今次是最後一次，他會平常心對待，「你可以點啫？你放過自己、放低自己，日子好過啲咁解。」

宏新閣 Dorz斥合安無視居民倉促完場

現身啟德的宏新閣居民 Dorz 會後表示，「吓！我今次嬲到個頭好麻。」他解釋指，合安不僅略過居民發問，甚至連交代業主退款的財務報表時，亦計少 3 萬元，待答問環節被街坊揭發，始解話指希望整數退款，餘下金額會在下期退款退還，Dorz斥「點會可能支票開唔到零頭數？唔好玩啦！」

「侮辱緊我哋智慧，曬緊我哋時間。」

會上，有居民關注宏福苑法團備用資金去向，以及石油氣公司 950 萬保證履約金處理。合安陳偉光亦只交代會繼續跟進合約。Dor z批評，不少年長街坊希望取回應得賠償，但合安選擇無視、蹂躪眾人，「侮辱緊我哋智慧，曬緊我哋時間。」

為何已簽署「接受收購建議信件」仍然現身？Dorz指，有街坊可能認為簽署買賣合約後就不用再開大會，但他認為一日未簽買賣合約仍是業主，「我唔想畀人覺得我哋係，大會唔夠人數、開唔成，同埋做每個決定時，唔係應該要投票？今日係無任何投票環節。」偏偏今日完得倉促，踏正晚上九點，主持人不忘提示場地時間已夠，只接受多一戶提問，亦無再議決是否召開下一次業主大會。

中小學生嘅 meeting 咁樣

「返公司開會你都有個 step，未開完、未傾完起碼都仲有下一個 agenda 幾時再開。無吖？咁即係點？我哋之後點？𠵱家成件事好似學校 meeting，中小學生嘅 meeting 咁樣⋯⋯你臨尾仲要講你代表宏福苑嘅業主立案法團，會履行咩責任，你唔好自打嘴巴。你履行責任嘅話，點解咁多問題問你嘅時候，你根本答唔到？點解要回避？真係好嬲。」

宏盛閣居民陳先生同樣批評合安沒有正面回答居民問題，僅「repeat又repeat，叫我地揾一戶一社工、解說隊… 同上次答案一模一樣。」他稱合安沒有交代保險要買到何時、第三次上樓亦沒有時間表。

初代業主哽咽　斥政府係一言堂

林氏父子，各在宏福苑擁有一個單位，災後被安排住在啟德過渡性房屋。林老先生指，合安未有直接面對居民想知道的事情，包括保險金修復與早前部分居民獲安排第三次上樓，「佢話根據個別特別要求可以上樓，但係其實個個都要求上樓，唔係特唔特別。」

他形容合安是政府「擋箭牌」，在售樓日期已定情況下，不可能再有業主大會，「賣剩嘅冇幾多，根本上都唔夠 5%（法定人數）開咩會啊？」林老先生續透露，自己是宏道閣一手業主，單位無大礙仍要出售，他哽咽指「話唔會俾你重建唔會俾你返去⋯⋯無奈。」

「佢話仲要立例立法收購，咁你點講啊 ？即係冇嘢講，𠵱家個政府係一言堂，唔到你哋講嘢。」

居於宏泰閣的林先生指，上次大會，主持聽到問題後會自行「演繹」、「扭曲」再讓合安陳偉光作答，今次亦有同樣情況。他不滿，合安言之鑿鑿指會作會議紀錄，但最後卻刪走街坊問題；關於上樓禁制也未能解答。

已遞交意向書的林先生續指，自己最想了解勘察報告，認為可協助自己決定是否賣樓，也未能得到解答，「一個好基本嘅邏輯，你覺得呢樣嘢會變，你係咪應該每個月，甚至乎至少每季去做一份驗樓報告公開畀我哋知？」

他說，合安在會上援引政府說法是「當波踢」，「火災前又係咁，火災後又當你班人狗咁玩。有啲打份工都算，但陳生（陳偉光）呢啲擺明賺陰質錢，你袋得心安理得嘅，你長命百歲啦。」

長者業主指怨氣爆棚　斥要收印花稅「乞兒兜度揦飯食」

到大埔出席大會的宏仁閣居民李先生形容業權出售後仍要買保險的做法荒謬，「保啲乜嘢？唔比你上樓，咁條電梯仲保乜嘢養啊？」「層樓根本無人住、無人入得到去、鬼都入唔到去嘅，咁你買份保險來做咩？」他又認為合安沒有為災民福祉著想，不滿大埔場館只接受兩條居民提問；場地不准錄影之餘、合安亦沒有提供業主大會的錄影可供重溫，「咁即係點呢？問題無解決到，佢係嚟傳遞訊息㗎啫。」出席兩次業主大會的李形容「開第一次會失望，開第二次會更加失望」。

他亦不滿當局在收購業權時一意孤行，只一味「恐嚇」居民，認為大部分居民、包括自己都不是真正願意與政府簽署買賣合約，「佢不停放啲恐嚇嘅資訊出來，係咪一個政府所為、情理喺邊度？」「我地依家入面嘅怨氣，根本好多都爆棚。」

關於重置的問題，李先生說，沒有一位區議員，立法會議員，為災民發聲，「咁我選你做咩呀，以後大家仲會唔會投票呀？」

他表示，現時街坊的怨氣「爆棚咁滯」，只能透過傳媒，向政府反映，希望當局願聽，作出改善，「你政府聽吓啦，大佬。」

此外，宏業董事侯華健最近賣樓套現，李先生說：「佢賣緊資產啦，你政府有冇凍結佢，第日賠償點計數呀？佢一清盤我哋渣都冇。呢啲政府你要去做，你告緊宏業，點解仲畀佢去套現呀？」

204 人出席

在大埔社區中心，現場有約 320 個坐位，會議原定開始時間，在坐人數目測約七成，但少量位置為工作人員及警民關係組警員。在啟德會堂，現場安排約 120 個座位，比首次特別大會少約一半。會議原定開始時間，列席人數目測只不足一半，亦有少量工作人員坐於業主位置。

合安今日開會列席代表，只有物業服務總監陳偉光，以及法律代表梁秉釗，另有警民關係組、大埔民政事務署職員列席；但並未包括中國太平保險代表。

開會前，陳偉光指截至晚上 7 時 10 分，出席大會的業主或獲授權人士為 204 人，佔全體 1840 位業主的11.09%；與會代表的業權份數則為17.48%。

宏仁閣謝先生：期望「炳強」釘死失職公務員

「我告訴你，我一定會「釘死」你，後果自負」。保安局局長鄧炳強的一句話，給宏仁閣住客謝先生留下深刻印象，他今晚來到業主大會場外，談及近日對事件感受時表示，很期望鄧局長能「釘死」失職公務員。　

「我都期望，阿炳強呢，用釘死佢嘅態度，去釘死嗰啲失職嘅公務員。」謝先生說，由起火、蔓延、走火、滅火，「係咁多公務員監管下，都冇樣嘢生效到，剩係答唔理想，一係就嗰班公務員好流，一係就造假嗰班國際級嘅，仲勁過 KK園，咁香港應成為國際詐騙之都，所有公務員都呃晒喎」。

捲入「離世授權一票」風波的民建聯區議員黃碧嬌病了，兩度缺席區議會會議，謝先生說：「我都唔想佢長命百歲但係百病纏身，好多街坊揾緊佢幫手，大維修時咁積極攞授權票，𠵱家宏福苑差過大維修前，呢個時間應更加上心喎，好多街坊好想佢出嚟關心返我哋 」。

葉家駒關注追究責任制

遺屬葉家駒、李國鴻同到大埔會場出席大會。葉關注法團餘款如何安排，以及上次未獲通過、今次卻未納入議程的核數師報告，「係咪唔需要再表決呢？佢覺得今次係最後一次業主大會，所以所有嘅嘢都冇所謂？」他稱今日出席大會心情平靜，認為即使失去業主身份，亦不會改變自己的罹難者家屬身份，「我太太喺呢度因為人禍而喪失生命，呢個係事實，無論我係唔係宏福苑業主嘅身份，都唔能夠改變呢個事實，我係要追究責任。」

晚上會議結束，葉家駒說，會議「原則上冇解答問題，我問佢會唔會有下一次業主大會，再有時，我哋已冇資格出席。佢應盡早解決，畀一個明確答覆，依然拖拖拉拉，我哋冇下一次。」

對於失去業主身份，葉家駒批評，政府用高壓手段，脅逼他們要將業權賣出，「除咗屈服，我哋仲點可以同佢對抗呢？」

他再三重申，會繼續關注追究責任問題，包括政府部門疏失，監管不力，導致大火，無街坊犧牲，「包括我太太」。他說：「我要去攞返個公道，呢方面我唔認為我冇咗業主資格，就會喪失責任追究資格。我太太係呢個單位，因為呢個人禍死亡，呢個係點都改變唔到嘅事實」。

李國鴻：點解買咗五份保險，一毫子都冇得賠？

在火災喪母、兩名家傭罹難的證人李國鴻則關注保險賠償問題，「𠵱家好似係賠曬比政府喎，我哋嗰啲死曬人冧樓呀，點解都冇得賠呢？」他說：「點解買咗五份保險，一毫子都冇得賠，咁買嚟做乜嘢？我問吓政府」。葉家駒補充，五份保險，都是中國太平的，「咁裏面究竟係一個乜嘢操作呢？」

曾爭原址重建戴先生：黃碧嬌畀人揭發到，我好開心

曾為居民爭取原址重建的宏志閣居民戴自文表示，對業主大會沒期望，他說，只是前來跟街坊聚舊。

對於或許是最後一次業主大會，他說「好傷心，始終都要離開宏福苑呢個屋企，你冇得選擇冇得揀」，「好似我媽鬧我一樣，我成日話拖吓先，佢話你唔好咁吊兒吊兒郎當，想拖到幾時，始終要為屋企人著想，所以我𠵱家都冇理到，咁你搞啦」。

他指如今形勢沒有選擇，「可能你仲有二百戶、三百戶，你仲可以企硬，但得返十幾戶，仲有冇必要企硬去對抗，攞返嚟嘅係得到啲乜嘢？」他續說：「為咗啖氣，始終我有屋企人，有小朋友，有老婆，冇理由為咗啖氣，去令到佢哋無家可歸」。

對於民建聯區議員黃碧嬌捲入「離世授權票」風波，戴自文表示，「佢做過嘅嘢，真真正正畀人挖到出來」。「黃碧嬌有做過嘅嘢，畀人揭發到，我好開心。攞假嘅授權票，有法律責任。」

冼婆婆：賣業權「惡夢一場」、「家鄉都冇埋」

在大火中獲救的宏泰閣 86 歲冼婆婆，指自己「唔知有幾多日命」，已交出收購建議信，但對於出售業權，「有種畀人千咗嘅感覺」，質疑買樓時用建築面積、但政府收購則用實用面積。她又形容，賣業權如「惡夢一場」，指父親 7 歲時從佛山來港，自己是一個沒有家鄉的人，而宏福苑就是她的家鄉，「我哋而家連香港宏福苑嘅家鄉都冇埋，咁你話我心情係點吖？」

冼婆婆續說，「政府要立法我哋都冇辦法㗎，我哋不過係一個居民。習主席都話，我哋係香港市民，咁梗係要乖乖哋聽政府話啦，佢話左、我哋唔敢行右，佢話右、我哋唔敢行左，咁就叫做守法囉。」至於業主大會，冼婆婆說自己仍是業主，故有責任出席。

業主麥先生：冇期望

在大埔社區中心外，未到五時已有警員在附近一帶駐守，工作人員在正門指示業主從籃球場的側門入場。據了解，有居民因為在火災中喪生的太太才是業主，而轉名文件未被交到土地註冊 處，一度被拒入場，後來在其他業主一同向合安交涉，工作人員再檢查其轉名法律文件，最後才獲准進入會場。有業主步入會場前，說了一句：「冇期望」。另一業主麥先生，臨入場前也說：「冇期望，只有失望，都無投票開咩業主會呀」。

業主：大局已定

下午五時，啟德社區會堂外設有帳篷，警方安排便衣警員、傳媒聯絡隊在場，民政事務署職員、關愛隊則在入口處接待到場業主。

已簽署「接受收購建議信件」的宏仁閣業主何生，今晚到啟德會堂出席大會。他說，現時「政府都安排好晒，只有跟住去做，都無辦法」，他形容情況「大局已定」，今日到場是希望再了解管理費情況，「選擇都無咩好選擇，因為佢全部都係啲，即係畀咗咩屋各方面咁樣。」

他表示，自上次召開大會後，合安只發放一次信件交代第二次大會申請出席方法；今次亦不了解詳細章程，認為合安「都無乜對唔對接。」上周四有搬屋公司發文指協助居民再上樓，何生就表示未曾聽過有關情況，但因為單位已經損毀，他自己亦無意再上樓。

集誌社檔案｜法團共有 1160.6 萬元可作退款

陳偉光今交代宏福苑法團營運基金情況指，現時法團共有 1160.6萬元可作退款，不會因為業權轉而失去權利。

該款項包括現時法團銀行截至 6 月 30 日仍有 3920.8 萬元，以及市建局樓宇排水系統維修資助的 800萬元。兩款再扣除四項支出，包括有業主不在港或未入票等，正待退款的大維修基金款項約 2086.2萬元；大火前合約供應商的應付未付賬約106 萬元；264.5 萬管理費按金。

另有合約終止備用退款的 1100萬元，陳偉光透露，當中包括一份前法團與石油氣公司於2025年簽訂、為期十年的合約，該筆合約由石油氣公司支付 950 萬元履約保證金予法團，合安會再檢視合約情況。

根據業權份數不同，每戶可獲退款 5400、5850、6300元。退款下星期三中午起開始網上登記退款；合安指，業主可自行到民政諮詢中心領取、或由一戶一社工或區議員代領。惟如 9 月 6 日前仍有欠款，或需更改上一輪大維修基金退款收款人姓名，需自行聯絡合安處理。

1. 中小學生嘅 meeting 咁樣

成篇報道，水蛇春咁長，睇落有如昔日黃霉毒果、臘腸等以煽情角度的報導手法，一人一句難以 focus。睇落都係災呢情緒發洩居多，真係以情理法去考慮可行性就未免太少 - 首先主辦方合安只係管理公司，居民走去問上樓安排嗰啲超出合安權責的，就未免強人所難。然後甚麼「我哋永遠都係宏福苑街坊」（我哋都係傷巷人？）、「原址重建」（不遷不拆？）、「希望政府多聆聽居民聲音，站在居民角度想」（「溝通」即係「你一定要應承我的訴求」，唔順從我嘅即係唔同我溝通），唔係好似小學雞 meeting，而係當年黃黑社混論壇再現。

2. 她質疑政府已經收購業權，為何仍要他們買保險，指是首次聽到法例要求業主要繼續為大廈公共部分買保險...點解買咗五份保險，一毫子都冇得賠？

魔術師唯一覺得有問題嘅，就係保險呢度。火災事發時受保人是誰？保單內容是保什麼？事發後才賣業權是否無得賠？按道理賣咗業權俾政府，或政府以「現狀（as is）」收購，政府是同意買間爛屋（包括壞了的電梯）的，原住戶無需要為屋苑公共部分負責。有人要求居民俾錢的理據何在，，是否又是「跟法例規定」？居民是否有可能俾人呃？唔俾又有何後果？居民有無尋求律師和保監局意見？就咁係度哇哇叫於是無補㗎喎。

3. 有長者業主斥，政府會就他們的交易收印花稅，有如「乞衣兜度揦飯食」，直指居民怨氣爆棚。

業權轉換，又或者租住單位，都要拎份買賣合約或租住合約去田土廳註冊打厘印；所以無論係居民賣業權俾政府，又或者係日後遷居置業或租賃住宅，要收印花稅合法合理（至於政府會否「以情考慮」，「特事特辦」waive 咗班居民的印花稅，則難以猜測）。跟據香港現行稅率，收得你 60,000 印花稅，即係你層樓約值 430 萬，點都唔算「乞兒」喇。至於個人係咪得返咁丁少身家，呢個係個人理財與及跟子女「供養父母」的家庭關係，明白家家有本難唸的經，但也不能將個人問題變成政府問我或社會問題先得㗎。

4. 「我都期望，阿炳強呢，用釘死佢嘅態度，去釘死嗰啲失職嘅公務員。」

公墓園的 JD 是甚麼，是否按本子工作，工作態度是否唔夠主動，踢一踢郁一郁就夠，公聽會早有揭示。強局長當然會釘死犯法嘅人，但公墓園有冇犯法呢？好難講。工作出錯都唔等於犯法喎。魔術師對公聽會的印象就是公墓園係無錯嘅，錯嘅係政策、權責和 SOP 的漏洞和灰色地帶；奸商呃政府，辜負了政府對「磚業人士」的「全盤信賴」；責任最大的，當然就是違規吸煙的工人喇！叫咗你唔好食煙，話唔聽仲亂拋煙頭，搞出百幾條人命，嗰班工人依家去咗邊？定係燒死埋一鑊熟？

5. 關於重置的問題，李先生說，沒有一位區議員，立法會議員，為災民發聲，「咁我選你做咩呀，以後大家仲會唔會投票呀？」...捲入「離世授權一票」風波的民建聯區議員黃碧嬌病了，兩度缺席區議會會議，謝先生說：「我都唔想佢長命百歲但係百病纏身，好多街坊揾緊佢幫手，大維修時咁積極攞授權票，𠵱家宏福苑差過大維修前，呢個時間應更加上心喎，好多街坊好想佢出嚟關心返我哋 」。

職場大師都係大埔區區蟻員，仲係關愛隊副隊長（加上又係馬主，馬會餐廳係佢飯堂，實屬權貴），災民有無搵佢幫手？

02

＊＊＊

小紅書網民控訴遲到5分鐘被拒辦登機手續　憑東航登機證過關照闖國泰登機口再被拒　網民：入閘當贏？ 有線新聞 2026年09月01日

【有線新聞】旅客乘搭飛機一般應提早最少兩至三小時抵達機場辦理登機手續，近日一名小紅書用戶就分享自己因遲到五分鐘而未能成功辦理登機手續的經歷。他稱隨後購買東方航空公司的機票過關，但「抱着死馬當活馬醫的心態」，直奔國泰登機口要求登機，最終被拒，遂發文控訴國泰「有一種規定叫規定」，隨即引發網民熱烈討論與嘲諷，笑問「點解會覺得可以上返國泰班機？入閘當贏？笑咗。」

買東航機票過關直奔國泰登機口

涉事小紅書用戶「美食家烏米」發文稱，事發當日下午他原本乘搭下午3時的國泰CX380航班，由香港飛往上海，但他於下午2 時05分左右才到達櫃位辦理登機手續。國泰職員告知由於航班須於起飛前一小時辦理，電腦已無法為其列印登機證，建議他聯絡購票平台攜程重新購買其他航班。事主續說，隨後花費945元人民幣購買了下午5時05分起飛的東方航空機票，並憑東航的登機證成功通過機場安檢。進入禁區後，事主發現國泰原本的登機口仍在進行最後登機，並且仍有旅客趕往登機口。事主寫道：「我抱着死馬當活馬醫的心態走過去」，以自己沒有寄艙行李為由，請求現場工作人員通融讓他登機。

地勤堅守規定拒通融　事主反指「Ridiculous」

惟國泰登機口地勤人員明確拒絕，並解釋登機口並非辦理登機手續的櫃位。事主隨即表示，是外部櫃位不為其辦理手續，「我能站在這兒，本身就說明外面不給我辦，沒道理。」登機口地勤人員看了一看他手中的東航登機證，向其解釋他能站在禁區內是因為東航登機證允許他進入，否則他根本無法通過安檢。事主在帖文最後感歎：「邏輯在這一秒完成了完美閉環。我最後說了一句 : 你不覺得這很諷刺，很ridiculous嗎？」。國泰人員則回應這是公司的規定，無論有否寄艙行李均須提前一小時辦理登機。

fb及Threads網民一面倒嘲諷：遲到先最Ridiculous

國泰航空官網資料也顯示，於香港國際機場辦理登機手續及領取登機證，電子專櫃最早期限為起飛前24小時開放，並於起飛前60分鐘正式關閉。雖然原帖事後已被刪除，但有網民已截圖並轉載至facebook及Threads等社交平台，迅速掀起熱議。有網民指責事主出門太遲及未有善用網絡辦理登機：「早少少咪無事囉！講明最遲60分鐘前辦登機，就差5分鐘」、「冇寄倉行李點解唔一早Online check-in（網上辦理登機手續）？」亦有網民直指他利用其他航空公司的登機證，試圖登上另一班機極不合理：「買咗第二間公司嘅座位，佢點解會覺得可以上返國泰班機？入閘當贏？笑咗」、「如果真係畀佢上到機嘅話，可能係機場嘅嚴重保安漏洞」。不少網民更反諷事主：「買咗東航點解唔搭，東航有刺？」、「遲到又真係幾Ridiculous（荒謬）嘅！」

6. 國泰職員告知由於航班須於起飛前一小時辦理，電腦已無法為其列印登機證，建議他聯絡購票平台攜程重新購買其他航班。事主續說，隨後花費945元人民幣購買了下午5時05分起飛的東方航空機票，並憑東航的登機證成功通過機場安檢。進入禁區後，事主發現國泰原本的登機口仍在進行最後登機，並且仍有旅客趕往登機口。事主寫道：「我抱着死馬當活馬醫的心態走過去」，以自己沒有寄艙行李為由，請求現場工作人員通融讓他登機。...登機口地勤人員看了一看他手中的東航登機證，向其解釋他能站在禁區內是因為東航登機證允許他進入，否則他根本無法通過安檢。事主在帖文最後感歎：「邏輯在這一秒完成了完美閉環。我最後說了一句 : 你不覺得這很諷刺，很ridiculous嗎？」

魔術師無辦法用「內地旅客」呢啲正治正確用語，要用返「大陸人」來形容呢位「陸客」。睇返前文後理，似乎呢位「陸客」本來就認輸，因為遲入閘，因航唔俾出機票，「陸客」就買冬航機票，入到閘見到因航仍在登機就「搏大霧」（即死馬當活馬醫的心態）去墥彩，拎住冬航機票去搭因航機，好彩因航職員醒目無俾佢呃到。呢啲咁嘅搏僥倖心態，仲要認為自己是對的，真係唔知咩嘢教育教出嚟。

唔怪之得電騙集團話「你犯咗法要交按金」真係咁多「大陸人」信，睇嚟佢哋自己明知唔啱（好似以上搭乘班機例子）都走去闖關嘅文化真係「深植 DNA」裡面，俾歹徒 chok 幾 chok 就好影心虛中招。能夠「抱着死馬當活馬醫的心態走過去」，證明錢對呢位「陸客」並非「問題」，反正搏唔到無損失，搏到自已就搭到因航機了 - 但如果因航走漏眼，一旦東窗事發就係嚴重安檢漏洞，負責因航職員隨時丟飯碗。唔知呢位「陸客」又有冇諗過後果呢？

＊＊＊

城大O Camp爆赤膊男「公主抱」內衣女　涉事學生會解散：深切反省 有線新聞 2026年09月02日

【有線新聞】城大迎新營「公主抱」事件，涉事的學生會屬會致歉並解散，校方成立委員會調查。

網上流傳影片，城大學生會管理科學學科聯會幹事會「煊管」迎新營中，有赤膊男子抱起上身只身穿內衣的女子。事後幹事會發聲明致歉，表示深切反省，學生會已按現行機制解散屬會。

城大指對不當行為採取零容忍態度，同時極度關注參與學生所受的不必要滋擾，紀律調查委員會正約見相關活動舉辦者，會根據事件的嚴重性作出紀律處分。

7. 城大指對不當行為採取零容忍態度，同時極度關注參與學生所受的不必要滋擾

隨着年歲漸長，魔術師對「帶磚生」迎新營中玩埋啲無聊咸濕遊戲開始持開放態度。尤其是係現袋有青，被怪獸嘉獎自小訓練，學識 18 般雜耍，寫靚個 portfolio 都係為咗入名校，到最後入讀我城大學，而我城大學求其搵間都係世界一百強之一，入到去錢途似咁，在學習路上的最後一關，放鬆下無可厚非，足以顯示一眾年青人「受夠了」的性壓仰心態。睇返呢啲屬會搞完一次性活動，就算違規都係道個歉就算，就地解散毋需負責，認真識玩。唯一要注意的就係就算由無聊咸濕遊戲演變為僻室扑嘢，都要做好安全措施，唔好搞出人命，但咁又違反了比卡超政府的「人口政策」，實在有點「左右」「做人」難。

8. 「公主抱」

魔術師完全唔知道咩叫「公主抱」，都係要查維基先至知道：

（網上圖片）

但睇完以上「公主抱」新聞之後，邪惡 FB 的演算法居然又推送了一段「公主躺」的新聞給魔術師：

喂，大佬，連打咁麻醉針，訓到擘大口流哂口水咁嘅樣都可以叫「公主」，似乎呢個世界的「文字協作者」都患咗「公主病」至真？

＊＊＊

伸延閱讀

香港政府一站通 > 本港居民 > 税務及應課税品 > 印花税 > 印花税收費

維基百科：公主抱