貓仔大過主人屋

上一集就睇靚女設計C（見《天使設計Ｃ》），今集就吸貓，夠哂治癒（３６：４７—４７：５８）！

樓盤傳真 2019/09/212019/09/21 23:43

戶主夫婦與女戶主老媽子加埋隻貓仔一齊搬入７７７的２０１８新居屋啟明苑，單位面積４６０呎，與啟德區貴價私樓為鄰，真係蔗渣價錢食到燒鵝的味道。不過，居屋交樓標準甚 hea，預咗戶主拆過再整。今次男戶主喜歡工業風（其實魔術師唔明點解有人鍾意屋企搞到好似間工廠咁），而媽媽就鍾意北歐風，於是設計Ｃ便要將兩者炒埋一碟：

戶主又未有生育打算，又話喜歡煮食，於是便將廚房拆牆，改成開放式，擴闊空間（左上、右上）；廚櫃係黑色系列房，牆身用白雲石，洗碗盤用重金屬材質，加強工業風（左中）。次所改門位，變成趟門，騰出空間放洗手盤，但次所門現在就竟然對住廚房，認真匪夷所思（右中）；次所中黑色層架的燈槽可令光線柔和，令貓仔在洗手盤下方方便時唔會覺得有壓逼感（？）（右下）：

居屋圖則基本上已經「教咗」戶主要將房間分置屋的右上和右下兩個角落，中間長形位就是客飯廳。客廳電視牆隔離的是條子特色牆，內藏通往睡房的暗門（左上、右上）。白雲石飯枱對住一列又係黑色做主調的長櫃，貯物兼做 display，擺滿男戶主心愛的 figure 模型，可能只有男戶主才有胃口望住嚟食飯（左中、右中）。大櫃延伸到門口位，用來做鞋櫃（左下）。另外，展示櫃都有玻璃門分隔，避免貓仔將 figure 模型撥走（右下）：

設計Ｃ話戶主鍾意幾何形狀，於是便整了些三尖八角的畫框迎合，飯枱上又用上網形燈罩的設計燈，將幾何圖案打上天花板，作為點綴之用（左上、右上）。主人房設計簡約，以深藍色做主調，床頭燈同燈槽可供睇書睇報紙（左中）；媽媽房同樣簡潔，以淺藍色做主調，窗簾係藍天白雲（右中）。貓仔應該係媽媽所養，所以唔會搞亂媽媽床頭的書和後生時的靚相（左下、右下）：

由於貓仔甚為活躍，成日跳來跳去（左上、右上），所以成個廳都無層架，唔會俾貓貓跳到上燈槽（左中）。凳腳包上麻繩，以供貓仔磨爪（右中）。地板以防刮防水地磚鋪成，唔怕貓仔刮花，又易於清潔（左下）。最後，窗戶有加貓網，以防意外（右下）。

＊＊＊
伸延閱讀：
天使設計Ｃ
五星級貓窩