共享辦公室

星期一返到公司，魔術師就打咗個突...咦，多咗個妹妹仔嘅背影嘅？仲坐咗係魔術師隔離？
忽然醒起，包青天上司早前就提過，近日 in 咗幾個卜卜脆、剛畢業的小妹妹... 包青天上司今日去咗蝗國公幹，米婆Ｍ又放大假，雖則話僱傭兵同事Ｌ都知道吓啲 admin 嘢，不過新同事入職通常要搵ＩＴ申請呢樣嗰樣，呢啲雜項嘢睇怕都無人熟得過魔術師，當然可以好好「照顧」吓小妹妹喇！
打過招呼後，小妹妹的洋名叫Ｃ，雖然唔算係靚女，但就一定順眼過「暴大有村架純」。

（圖片來源：中大女生吳傲雪拒配合警方調查 稱收恐嚇輪姦訊息，頭條日報　2019-10-18 20:39）

不過，最可惜的是，卜卜脆Ｃ坐咗係魔術師隔離半天，就走咗去坐第二個位，事關檯頭個 mon 大啲，唔似魔術師隔離個位咁，本來係無 mon 的，只能用魔術師從舊 office 帶來的細 mon。
無錯，因為舊 office 要大裝潢的關係，坐滿兩層樓的同事都要搬去呢個位於東九龍的「新 office」。
又無錯！呢個位於東九龍的「新 office」就係公司係「起動九龍東」租回來的「新派商廈」，雖然離黨鐵站不遠，但係依然都係被一眾工廠大廈、車房、與及重建地盤包圍。
真係沙塵滾滾，殺錯良民。
而呢個「新派商廈」就係以類似 WeWork 的「共享辦公室」理念營運，內部裝潢係幾靚嘅，仲有茶包同 coffee capsule 任飲添！不過，魔術師始終唔慣的是，就係「共享辦公室」要求同事放工時要將枱面上所有東西清空，做到好似無人坐過一樣；而公司的手提電腦與及個人隨身物品就可以放入「共享辦公室」提供的膠籃中，存放在個人 locker 內。
魔術師第一日放工的感覺，就似監犯拎住個洗面盤沖涼咁。
仲要小心唔好跌番皂...
由於每日個位都 reset，呢個就係點解卜卜脆Ｃ可以隨意搬位的原因之一。所謂「之一」，就係有時係會有人（尤其是港婦）係會有同事負責霸位的。
魔術師就試過有日因為遲咗返，多數座位經已被佔領，所以就「被逼」用個「細 mon 位」。新上司米婆見魔術師成日要開 Excel，睇細 mon 實在太辛苦，便叫魔術師坐第二個吉位。
正當魔術師搬哂啲嘢過去吉位時，坐對面、個樣有啲似「天使阿雪」的小肥豬竟然就話：「我同事下畫會返，到時你要讓返個位出嚟。」
魔術師即時Ｏ嘴。
「我係咁話俾你聽啫！」小肥豬續道。
咁即係叫魔術師走啫！
於是，魔術師便不發一言，將所有嘢搬返去「細 mon 位」。
米婆Ｍ 走來問魔術師發生何事，魔術師便照直講。
小肥豬結果就被米婆Ｍ 話咗幾句。
不過，類似嘅狀況只係在搬入去初期發生。
只因公司都幾多洋腸洋婆，無論係米豬定係咖哩人定係巴人組織都有；但係呢啲工廠區，邊有咁多餐廳有西餐有洋文餐牌，伙計又識聽英文落單呢？
結果一眾洋腸洋婆餐餐都要去就近的兜巴星食沙律三文治，食到口 wear wear。
於是，返咗新 office 無兩個星期，成班洋人就以各種藉口（例如去其他 office 開會），唔返工廠區了！
呢個就係點解卜卜脆Ｃ咁易搵到位轉的原因之二！
講完食同埋「住」，最後就講吓「行」（衣唔使講喇）。
上文都講過，「共享辦公室」離黨鐵站不遠，附近亦有多個巴士站，無事無幹的話交通算是方便。但由於今時今日黨鐵站都是高危地點，魔術師放工如果要搭黨鐵，就要先搭高危的觀塘線，去到疑似死過人的太子站轉車，再到同樣是高危的荃灣站落車；就算搭巴士都要先到旺角食飯再轉車，隨時連催淚彈都要食埋。搞到每日放工都要上網睇吓拉燈仔有乜行動，再趨吉避凶，真係返工容易放工難，唔知為乜咁折墮。

（圖片來源：港鐵47車站關閉 荃灣線馬鐵停駛 20站受損報警 服務今未必恢復，明報　2019年10月2日星期三）