一人飯局（2025年4月 - 6月）

好耐無寫過一人飯局。唔好以為魔術師晚晚同靚姐姐撐枱腳，其實食自已飯的時候始終較多；係唔知點解覺得值得寫嘅一人餐好似愈來愈少咁。

1. 美心MX (中華總商會大廈)

呢間美心快餐（好在唔係「美誠快餐」）位於樓上，樓下係烘焙餅店。位於中環核心位置，租金唔平，食物質素竟然有返咁上下，好過其他區份的美心MX：

（圖片來源：Openrice > 餐廳 > 香港 > 中環 > 美心MX, captured on 4 Aug 2025）

所以魔術師有時都會去吓食個快速晚餐，食完落樓附近有九巴、城巴返屯門，十分方便。最唔好就係不時會出現一位上了年紀、衣着尚算整齊的「白髮魔女」，經常禮貌地問人「仲食唔食」，目的就係食二手飯...中環美心同隔離的麥當當都見過佢蹤影。中環又無老人院，唔知入夜後佢會去邊，訓街照計件衫唔會咁乾淨...

魔術師餐單：黑椒薄牛柳意粉，最緊要加個啫喱。幾十蚊，唔記得幾錢了。Yuu 或 Eatizen app 不時都有優惠可以慳返幾蚊。

＊＊＊

2. 河內越式料理(西洋菜南街)

魔術師放工後不時都去 MK 睇吓貓仔，然後就去食飲。誰知食吓食吓，竉物街附近竟然都開始無乜新意（比較好的就只有點心專門店鋿晶館（見《一人飯局（2023年8月）》）同埋另一間茶餐廳）。今次兜個圈見到呢間越式，都可以試吓：

（圖片來源：Openrice > 餐廳 > 香港 > 旺角 > 河內越式料理, captured on 4 Aug 2025）

今次叫個香茅豬扒湯河，服務 okay，辣椒自動奉上；豬扒亦係另上，一塊切開四件，但其中一件完全係骨，食唔到嘅。個湯河味道係可以嘅，但豬扒歇咗陣就出油，唔係好得。

魔術師餐單：越式香茅豬扒湯河（＄65）＋椰汁珍多冰（＄10）＝＄75

＊＊＊

3. 譚仔三哥米線 (屯門時代廣場北翼)

不能不說，自從被鄉下企業收購之後，譚仔/三哥的味道真係愈來愈差：

（圖片來源：Openrice > 餐廳 > 香港 > 屯門 > 譚仔三哥米線, captured on 4 Aug 2025）

呢個墨丸米線（少米線、走腐皮）、酸辣湯底、香醋雲耳、凍檸樂，最好味嘅竟然係醋雲耳同凍檸樂，墨丸粉粉地，只能「捱住食」，米線唔係「少」都食唔晒：

最令魔術師激氣的就係罐汽水竟然印有「拉登仔」的字眼，唔通譚仔阿姐都嚟「潤」魔術師（笑）？

魔術師餐單：如上，埋單＄65。

＊＊＊

伸延閱讀：

一人飯局（2023年8月）