兔兔酒店

靚姐姐中秋後北上工幹一星期，使將兩隻兔仔暫託給魔術師照顧，魔術師屋企就暫變兔兔酒店。由於竉物唔搭得公交，便要 call GoGoVan 由啟德車到屯門，又籠又草又膠膜（用來包住籠底的便盤，易於清潔），去到魔術師樓下。剛巧有班小朋友玩完燈籠返歸，竟然在中秋佳節見到真兔仔，非常開心：

（啟德）

（魔術師屋企樓下）

兔仔係怕陌生環境嘅，於是魔術師便在籠中鋪有有佢哋氣味的尿墊，又俾啲牧草（Hay）佢哋食（兔仔主食係牧草，唔係紅蘿蔔）。黑白呢隻明顯係大膽好多，奶茶色就細隻啲，縮埋一角。

為了返工時好好監視呢兩隻嘢，魔術師亦買了個鏡頭睇住佢哋，仲有個 speaker 可以同佢哋講嘢。用完呢個星期就可以俾靚姐姐用：

（圖片來源：Xiaomi 智能攝影機 C500 雙攝版)

同時又訂多咗個水壺、草、糧、玩具等俾佢兩隻嘢享用：

（圖片來源：I love rabbit eShop, captured on 3 Oct 2026)

隻黑白色係比夠大膽嘅，唔使兩日就周圍探險，熟悉環境；隻奶茶就仲縮係個竉度等食：

魔術師打完一人邊爐，都會拎啲菜俾佢哋食：

奶茶色要等好幾日先識跳上梳化，跟住黑白色的腳步走；黑白色就一早跳識梳化跳櫃跳枱跳椅找（人類的）零食，跟埋魔術師入廚房同埋個紙皮箱（知道有食物），好鬼醒目：

佢哋玩緊個盒係有一塊兔仔月餅（草餅）的：

兔仔係晨昏性動物，夜晚同凌晨最活躍，日間就訓覺。魔術師返工的日子，出門口之前裝好水（有差唔多900ml)，餵好糧草（佢哋鍾意食兔糧多過食草，但兔糧熱氣，痾啲尿會好深色），開住冷氣（電費勁貴）捱十幾粒鐘（間中會俾個草球佢哋有得玩有得食，可以玩幾粒鐘），等魔術師返嚟再換水餵食，放佢哋出嚟玩。玩半粒鐘，就用食物引佢返籠，魔術師就做自己嘢。到凌晨放佢哋食宵夜，又玩一陣，然後就用食物引哋去個 hand carry 細籠度，魔術師就清潔大籠，最後俾啲草佢哋食完訓。

放假就 loop 多幾次出來玩同食，都好可愛同得意㗎！仲好療癒添（一個人看住兩隻兔仔，運動量都幾大）。

又，佢哋都幾乖，絕大部份時間都會返籠排泄，只係在牆角痾咗兩次尿。

又又，魔術師要收好啲風水物品，例如銅錢之類，唔好俾兩隻嘢食咗；亦唔能夠俾佢哋入廚房，萬一地上有洗衣粉跌咗落地俾佢哋食咗就大件事。

又又又，魔術師大門旁用條子屏風間咗個玄關出嚟，係擋唔到長槍煞的（門外長走廊），千祈唔好學。

又又又又，原來小迪都有隻兔仔：