將大小生活開支變成卡數

上文《iPhone DUO 高能智商稅》提及魔術師張大貓 EveryMile Card（截至10月份月結單）仲差 $18,610.11 才可以免年費，要在 11月之前用夠數唯有買 Apple Gift Card 解決。唔知點解邪惡 FB 好似聞到魔術師寫過乜咁，邪惡演算法就推咗小斯的「同業」里先生呢篇帖文俾魔術師：

原來用 EveryMile Card 增值 PayMe 都計消費，咁魔術師都唔使買咁多 Apple Gift Card 住

諗諗吓，信用卡（例如 EveryMile Card）可以增值 PayMe，用大貓 card 每月可增值 ＄5,000：

呢 ＄5,000 除了可以當成「免年費消費額」，仲係免息套現（由 PayMe 轉現金返銀行戶口），於是呢 ＄5,000 入咗戶口之後，魔術師可以用嚟做乜呢？

1. 每月用嚟交管理費(其實都可以經 BOC Pay 簡接以信用卡交費（見下文），但早年 set 咗自動轉賬扣銀行現金脹戶，就廢事再搞了)

2. 增值各電子錢包。魔術師慣咗支付佬、微信囡、PayMe 等每月月頭最少都有＄300 現金結餘作小額支付（魔術師唔鍾意吓吓扣信用卡，搞到張 statement 鬼咁長），每個月頭 recharge back to $300。爺銀 BOC Pay 用自家信用卡增值竟然都要手續費，又係要轉現金過去爺銀戶口再增值...

3. 由於電子錢包通常用唔哂啲現金餘額，每個月增值咁多個錢包都唔會過＄500，嗰＄5,000 用剩嘅可以放入 Mortgage Link，若有需要用現金就從呢個戶口提取。

另外，魔術師一般飲食、購物、發達通增值、電話費、上網費都係用信用卡直接付款或轉脹，而一啲無得碌卡的公共服務例如水電煤差餉地租（也包括管理費），魔術師就會以 BOC Pay 扣信用卡，或電子錢包 Pay Later，間接以信用卡（或類似信用卡功能）付款。

於是，PayMe「現金套現」變成間接碌卡，加埋魔術師一貫碌卡的消費模式，基本上「全年找卡數總額」（加哂全年所有信用卡/Pay Later statements，非常容易）就是「全年消費額」，用呢個數加多少少 buffer (10-20%） 就係全年退休現金流所需（已經計多咗，退休後唔使碌卡交稅，亦咁多交通、飲食費用）。按揭當然另計。

一於今年10月（即係依家）即時開始。

＊＊＊

伸延閱讀：

iPhone DUO 高能智商稅