兩套西裝

魔術師一向抗拒所謂既ＩＴ　ｌｏｏｋ，覺得似生意失敗或者ＭＫ７頭潮童，所以公司雖然容許ｃａｓｕａｌ　ｄｒｅｓｓｉｎｇ，但係魔術師始終都係堅持西裝恤衫領帶，著得醒醒然，人都精神ｄ．
回想魔術師第一套既「西裝」係一套「單吊西」，大學時見到ＢＢＡ同學仔／女著到咁行，忍唔住跟風買左套，但係發覺買現成既，始終都唔係百分百稱身．

到得大學畢業，魔術師便狠下心來去「官琦」做左套三件頭，都洗左成幾千蚊．雖然係大陸製，但係只要度身度得好，都會好啱身著得好舒服．如此這般，日後魔術師既西裝全部都係做三件頭，件背心就唔係成日都用唔著，不過魔術師始終都喜歡全套全套咁做．
前幾年要影畢業相，見好耐無做過西裝，「年瓜佛」又黎ｃｏｌｄ　ｃａｌｌ，賣點係有「意大利裁縫度身，件衫又會飛去米蘭剪裁」，魔術師便本著人一世物一世的心態去試下．嗯，件衫係咪真係飛左去意大利魔術師就唔知喇，但係要讚既係，個裁縫真係好熟手好掂，又真係會講「意大利文」（魔術師不能分辨，唯有相信），不過果時未有「威尼斯人」，否則魔術師真係會哈哈大笑．
早前，魔術師又見都有兩年幾無做過衫，便狼下心來去中環Ｅｒｍｅｎｅｇｉｌｄｏ　Ｚｅｇｎａ做返套．去到睇下，見有好多現成尺碼再改既款式都啱心水，雖然唔係三件頭，都無問題啦，便索性改變主意買現成，連問度身都慳返．
到得魔術師換好由ｓａｌｅｓ妹妹提供既恤衫皮鞋，站上那三面鏡既試身台時，幫魔術師ｍａｒｋ　ｃｕｔｔｉｎｇ既竟然係ｓａｌｅｓ妹妹，最後先由裁縫師傅出手執執．雖然ｓａｌｅｓ妹妹既髮香十分誘人，當玉手掃上魔術師既肩背時又十分好受，但係魔術師信心方面始終都係爭左ｄ．
去完Ｚｅｇｎａ，索性一不做二不休，行去隔離Ｇｉｏｒｇｉｏ　Ａｒｍａｎｉ睇野，結果又忍唔住手做多一套．Ａｒｍａｎｉ沒有Ｚｅｇｎａ咁ｇｒａｎｄ的試身台，ｓａｌｅｓ妹妹借出的恤衫皮鞋又無Ｚｅｇｎａ咁靚，但卻有個裁縫師傅ｍａｒｋ　ｃｕｔｔｉｎｇ，並非由ｓａｌｅｓ妹妹兼任，印象較好；美中不足既係，個裁縫係中國人囉！
2008/03/05  00:00:14