酒池肉林屋

明明移咗民去澳洲，居屋已於０６年補地價用嚟放租，但係依家又要回流，係咪即係撈唔掂，返嚟我城搞住家網吧（３４：２０—４５：４８）？

樓盤傳真 2017/11/11　2017/11/11 23:10

政府今年加強公屋富戶政策，未迫到住戶交還公屋前，先迫出一批天價公屋成交、免補地價下仍高見三、四百萬一間。同一銀碼，本周有迷你新盤大圍薈蕎開出，首批折實呎價萬八元，但最大缺點是環境。
第三季公屋第二市場成交連升三月，當中位處九龍市區及將軍澳的屋邨升勢更拋離其他地區。今集參觀一個未補地價、呎價逾7,000元的竹園北邨單位。
二千呎豪宅，全屋沒有客廁，廚房空間狹窄，卻有四間套房，難道豪宅也要改作高級劏房？其實這是一個新盤的原裝間隔，豪宅劏房化是否出路？
天水圍天愛苑一個用黑色做主調的設計，全屋富酒吧氣氛，業主夫婦由澳洲回流，一班朋友聚會聊天，昏暗環境下也許不知時光過！

天水圍天愛苑，中低層望樓景，和諧式居屋間隔，客廳預留位置可以間多一間房，而主人房就更奇特，係房中有房設計。戶主例牌唔會係無飯夫婦，仲要係鍾意煮食嗰隻，又例牌喜歡招呼十幾廿個豬朋狗友來開無遮派對飲酒作樂，加埋一大堆大型電器同唔等使嘢，600幾呎屋又點夠住呢？

大門用烏卒卒格仔設計，懶係有型（左上）；門口右手邊係吧枱，櫃頂放紅酒，然之後先至係鞋櫃，夠哂「主次分明」（右上、左下、右下）：

設計師將廚房和工作平台打通，變成半開放式，擴闊空間（左上、右上），得出兩片三尖八角的工作枱面，並收納咖啡機、洗衣機、洗碗碟機、微波爐，仲有雙門大雪櫃等大型家電（左中、右中）。為求「麻雀雖小，五臟俱全」（設計師語），仲整多咗個高身拉籃，之不過一拉開，本來就狹窄的通道更被封死，行都行唔到（左下）。記者妹就展示了如果唔係煮大餐，工作枱面仲可以拉長，食個杯麵都仲得（右下）：

戶主本來在客廳間多咗一間房，現在還原（左上、右上），面對住窗的位置放跑步機，貼牆放高架床，可以招呼朋友留宿（又話成班豬朋狗友來聚會，一張床點夠？），床底下可以放雜物（左中）；而客廳的另一邊就升高地台，層層疊滿電視和擴音機、喇叭等影音器材（右中），再放張大梳化，中間有設計師話嘅「日式茶几」（左下）；不過由於電動機關，壞咗唔上唔落都唔知點算，倒瀉嘢落去個窿亦唔知點清潔，魔術師就唔會認為一向心思慎密的大和民族會咁 ON9。但係，點 ON9 都好，都ON9唔過放鬼迷咁大隻啤啤熊在客廳，個廳已經唔係大，仲要阻頭阻勢（右下）：

為咗遷就部跑步機，廁所縮細咗（左上），廁所門改用工業風趟門（右上），內竉貫徹黑色風格，同樣鋪磚紋磁磚，仲封埋個窗，自製黑廁（左下、右下）：

書房擺電腦檯同鋼琴，同埋終於有窗可以見光（左上、右上），但其實Ｕ字型都幾窄，窗前擺到兩張椅，但係係咪真係可以坐到兩個人就成疑問（左中）。睡房又係升高地台，增加收納空間，衣櫃就沿住鑽石型牆壁打斜咁安放。睡房窗又封埋，用來掛電視；配合全屋都係叮噹擺設，就連被單都要係叮噹，直叫石大大汗顏（左下）。女戶主叫 Carman，可惜結婚相比較模模糊，睇唔清真面目（右下）：

記者妹話屋主「朋友多，聚會多」，魔術師呢類無乜朋友嘅人，真係好難理解啲人咁鍾意叫人上自己屋企玩，事後執屋都執餐死！仲有間屋搞到一級高一級低，又多雜物阻咗；又唔知係唔係怕人見到自己日扑夜扑，搞到封哂啲窗，萬一火燭都唔知點算！
＊＊＊
伸延閱讀：
佔中通識（四十八）之八月照妖館