三無新年

查實今個新年都過得幾平淡，除咗街上小店紛紛貼出「初Ｘ啟市」的告示外（要逛街唯有幫襯有青最痛恨的連鎖店和大商場，慘得過人地真係全年無休），全然不覺係過咗年！
１. 無煙花
唔使講喇！學班妄民話齋，個司機一人犯錯累到全城無哂過年氣氛（下刪一千字）...
（不過，就算有煙花，魔術師都唔會貢出去睇，更加唔會隔住個電視睇囉...）
２. 無賀歲片
以前過年好似總有一套半套大堆頭群星胡鬧製作（《嚦咕嚦咕新年財》算係言之有物的異數），魔術師又係雖然唔會去睇，但見到街上、電視上的宣傳廣告都叫做有啲氣氛；但今年...竟然成日都見到呢個廣告：

至於「賀歲片」，係唔好話俾魔術師聽《黑豹（Black Panther）》呀吓！

３. 年初一竟然無賀歲盃？原來，係變咗年初四打！

狗年賀歲盃港隊 3:4 港聯 2018/02/19 19:31

狗年賀歲盃焦點賽事，港聯四比三擊敗港隊。
港隊有張志勇鴻運當頭，接應角球衝頂入網，三分鐘就開紀錄。港聯門將陸平中眼明手快，拍走盧卡斯射門，盧卡斯沒有跟隨傑志參與亞冠踢賀歲盃一樣開心。基奧雲尼射入空門，半場補時為港聯追成一比一。
半場兩隊都換入多名後備兵。艾華頓交給狄卡奧倒掛，五十二分鐘為港聯反超前，五分鐘後查維斯為港聯贏到三比一。落後兩球，但港隊一班年輕球員仍然落力，劉浩霖六十分鐘為港隊追到二比三。蘇沙快腳鏟入，港聯贏到四比二。劉智樂首次穿起港隊球衣就有入球，八十九分鐘為港隊追到三比四，絕對是可喜可賀。
雖然港隊最後都不敵港聯，但兩隊合演精彩「入球騷」，球迷應該都相當滿意。

原來，對魔術師來說，係３.無（欠）利是才對！
話說每年拜年，都係由二舅父主動約年初二到大舅父家中拜年，今年亦不例外。點知魔術師依約定時間到了，二舅父仲要遲大到；不過都無緊要嘅，反正魔術師比較親近的是大舅父與舅母，於是大家便邊談邊等。
過了大半個鐘，大舅父手機響起。大舅母苦笑：「二舅父梗係又唔記得呢度地址喇，佢年年都會問一次。」
吓？唔係掛？呢個二舅父，自己約人，卻連地址都懶得寫低？佢部 smartphone 唔係只係用嚟 selfie，做無腦 forward 機器周圍 whatsapp 掛？
好嘞，問好地址，果然不一刻，二舅父夫婦連兩隻表弟都來到了。
眾人恭賀一返之後，便交換新年禮物。
這時魔術師收了二舅父的禮物，卻未有為意沒有收到利是。
由於二舅父遲大到，眾人凳都未坐暖便要去飲茶。
柴娃娃食完飯，又係散場時。魔術師慣性摸一摸口袋，發現有點不妥。
魔術師呢個年紀唔係貪嗰一百幾十，之不過拜完年無利是，又真係幾好意頭。
魔術師雖然頗為肯定唔係收咗之後袋唔穩跌咗，但開口問又有點尷尬。
唯有扮咗沒事人一樣，搭巴士返家。
（又，農曆年期間巴士班次無乜脫班，也不擠逼，究竟班傷民去哂邊？）
點知，上咗車無耐，就收到二舅母呢個 message：

哎，呢個二舅父一家做嘢就係唔上心（尤其是係二舅母，幾十歲人仲「蒸生瓜」咁），魔術師真係好怕同呢類人來往。
不過，二舅父又唔傻得哂，專登唔用同魔術師和大舅父共用的 whatsapp 群組，而係用私訊約年初五去魔術師公司樓下交收返封利是...
轉頭又想，唔知如果魔術師腿傷未癒行唔到出街的話，兩位舅父會唔會入嚟屯門同魔術師拜年呢？