魔術師雖然不是工資奴，但工作五天精精還是相當繃緊的，周末最好就係可以訓晏啲，唔訓到中午唔安樂。不過今日就要早起，搞到臨訓前除了較好 iPhone 鬧鐘之外，都同自己講要知醒，較好心理鬧鐘 - 事緣是日要去屯門醫院抽血。
自從上次心臟衰竭入院兩個星期（見《又見新一袋醫護人員》），又出返院之後病情穩定，只需定時抽血覆診。親戚朋友問魔術師有無睇睇私家，反正魔術師經濟情況許可，但魔術師都答「無」，原因係病情穩定，自我感覺良好，而且如果心臟有乜事，多數都係 call 白車入公立醫院，私家醫生未必咁好手尾將私家藥份量入醫健通俾埋公家參考，咁為咗唔好急病要入院時延誤診治，都係返公家覆診，食返公家藥算，都係嗰句，病情穩定就唔怕輪公家囖。
每次覆診前都要驗血睇吓啲維生指數有無超標，覆診和抽血都係返屯門醫院做。覆診就只能安排在星期一至五（醫生都係五天工作）；醫管局好鬼孤寒，覆診無病假紙只有 attendance letter，好在魔術師公司可以無病假紙請病假，好在個制度暫時仍未被「玩爛」（魔術師之前都提過組內唔少男女有青同事都有事沒事「病假」半天，牛龜咁大隻咁鬼孱郁啲就病？），魔術師逋常都係攞半日無病假紙病假再加半日年假，畢竟輪公立醫院覆診時間難料，無謂趕頭趕命返公司也（魔術師又唔係工資奴，唔返工唔會周身唔聚財的）。
而驗血逋常魔術師就揀星期六早上做，只要在拎覆診時醫生開的驗血紙去「自助預約機」度 book 時間就可以（公立醫院抽血星期六中午十二點收工）。每次 book 時間都見隔離要護士手動預約條隊鬼咁多人，而自助機卻是「機多過人」，明顯就係班「基層」有「數碼鴻溝」喇！點解魔術師揀星期六早上抽血而唔係周中請半日「無病假紙病假」去做？主要都係怕人多，周中預約條隊都唔少人的，無預約 walk in 驗血的人就更多（但又唔見即場要收費，老竉物唔係話要收錢嘅咩？咁多人驗呢樣驗嗰樣，全部免費蝕死醫管局了），就連樓下搭 lift 上去抽血站都打哂蛇餅。魔術師最怕無無聯聯排隊等（覆診時都要等，但依家如果多人排隊，HaGo 唔知係咪用咗 AI，識得叫病人遲啲去睇醫生，仲自動更新個覆診時間，幾唔錯的），所以抽血咁簡單嘅嘢就揀人流少的星期六上午做。
魔術師要驗血的其中一個指數就係鉀（Potassium, K）含量，AI 話鉀過高「嚴重時可能引發心律不整甚至心跳停止」。
所以魔術師飲食就一定要戒口（因為食藥提高了鉀），不過如果依照醫管局呢份「食譜」，真係無乜嘢可以食落肚，控制到鉀之餘早已營養不良了（為營養師製造就業機會？）：
去完屯門醫院抽完，跟住就要去隔離青松仙苑俾錢幫先父母登記搞附薦做法事，因為話咁快七月十四又到了。
《破．地獄》無講的是，如果在有私家龕場安放先人骨灰，十居其九春秋二祭搞吓法會，所以唔淨止俾錢龕場買位，日後仲要有 running cost，真係咁怪得之青松仙苑的龕位可以起完又起，仲快過簡約公屋；而且，由於「物價高漲」，估計牌位唔能夠加貪加得太離譜（相信唔能夠加到「唔齊頭」，即係＄300要加就加到＄400，不能加到＄330），為免「加幅太大」就開設了追加男、女、祖先衣包，甚至竉物靈位，真係走在時代尖端。
好講唔講，去完青松辦事，行去輕鐵站途中，竟然就見到幢簡約公屋。唔記得睇過甚麼報道或文章提及「青福里簡約公屋」，魔術師當時都唔知講邊度，原來就喺青松仙苑隔離，起得真係好快。
＊＊＊
伸延閱讀：
摩摩電影節之《破．地獄（加長版）（The Last Dance（Extended version））》：我城都有 DEI
沒有留言:
張貼留言