X檔案（十五）

 1. 橋上的蝗妹看過來

唔通係因為霓虹招牌夠巷味？

2. 拜粉揮手區

魔術師終於都收到電郵叫攞飛睇波。原來買最貴飛仲可以有公開練習睇，今次真係要 plan 定問公司攞假了。

魔術師唔揸車，有免費車位都無用。同樣魔術師都唔係要迷到去簽名會嗰隻（記得去年的鍠馬馬對巴丐簽名會？），廢事被人當成係終極冤大頭吧（買最貴飛已經好鬼冤大頭）：

3. 流亡無影

邪惡 FB 竟然無緣無故推呢位「首觸」在袋鼠國等了七年拿到庇護、終於可以同女友住墥的長文出來，不知意欲何為。魔術師無心機睇，只係 glance through 見到又要走又要喊，仲要買回程機票扮「唔係潛逃」。殺人不過頭點地，其他手足早已跟軒公去旅行（見《新聞雜評（四百九十六）》），人生無幾個七年，入咗籍就唔好返嚟啦。

澳港聯等待近7年，終迎來首個好消息。 

他是我們首個支援的手足，當日仍記得跟他初次會面情境。

這些年的等待，這位青澀年輕人經歷起起落落，願他日後懷着希望，迎接美好的未來。

----------------------------------

尋日，我收到澳洲 Permanent Residency（PR）。

等咗接近七年，到而家都仲有啲唔敢相信。

離開香港，到而家差唔多七年。

其實當年個決定做得好倉促。

屋企人都係臨飛前幾個鐘先知道我要走。到而家我都仲記得，嗰日大家都喊得好勁。

坐機場巴士嗰陣，我一路望住窗外，一路喊。我一路望住香港，心入面淨係不停諗：

「原來我真係要離開呢個地方。」

一個我好鍾意嘅地方。

一個我一直好想守護嘅地方。

我一路望住佢，覺得呢個可能就係最後一面。

去到機場，其實一路都好驚。

嗰陣仲買埋回程機票傍身，因為驚會俾人覺得係潛逃。

好彩最後都冇事，可以順利上到飛機。

當飛機起飛嗰一刻，我知道，我真係離開咗香港。

頭幾個月，其實都仲係成日喊。

最掛住嘅始終係屋企人。

之後開始搞庇護申請，一開始差啲俾個冇良心嘅 agent 呃咗。

好彩最後搵到其他人幫手，介紹律師，幫我處理申請。

一路都好感激好多香港家長同身邊嘅人。

有人幫我搵律師、資助律師費、生活費，之後又有獎學金，令我可以安心讀書。

如果冇呢班人，我未必可以行到今日。

初初嚟澳洲，其實都係忙住 settle down，搵地方住、搞文件、適應新生活。

之後開始搵工、讀大學。

搵工唔容易，始終人生路不熟，但總算一步一步捱過。

好彩有大學獎學金，又有香港組織提供獎學金，所以讀書期間學費同住宿都冇太大壓力。

之後仲有本地支援 asylum seeker 嘅組織幫我搵到大公司 internship，最後順利入到 graduate program，而家都已經做咗幾年。

一路以嚟，真係遇到好多願意幫我嘅人。

呢份幸運，我一直都記得。

不過，老實講，我覺得最難捱嘅，唔係離開香港，唔係搵工，甚至唔係讀書。

最難捱嘅，係等待。

開始返工之後，身份一直冇消息。

愈等愈耐，人就愈焦慮。

冇PR，你好似咩都做唔到。

你唔敢規劃將來，唔敢轉工，唔敢諗下一步。

成個人生，好似停咗喺度。

最辛苦唔係冇希望。

係你完全控制唔到件事。

你乜都做唔到。

每日唯一可以做嘅，就係等。

不停等。

等一封可能今日嚟、可能一年後嚟、又可能永遠都唔知幾時會嚟嘅消息。

嗰種無力感，真係好難形容。

嗰段時間，我開始睇心理醫生。

甚至有一段時間，出現過 passive suicidal thoughts（被動自殺念頭）。

我仲記得有一日，我突然諗：

「原來我人生差唔多四分之一時間，都喺度等呢個PR。」

嗰一下，真係好震撼。

我開始不停諗屋企人。

佢哋一路都擔心我。

我好想快啲有個結果，等佢哋安心。

但同時我又知道，就算有一日攞到PR，都改變唔到一件事。

佢哋仍然喺香港。

如果將來有一日，屋企人真係年紀大，甚至人生最後一程，我未必可以見到佢哋最後一面。

呢個遺憾，到而家都仲喺度。

朋友都一樣。

有人留喺香港，有人散落世界各地。

大家見面嘅機會，只會愈嚟愈少。

可能一年一次。

可能幾年一次。

又或者，再冇機會。

直到上年八月，等咗六年幾，Department 突然叫我交 S56 補充資料。

之後十二月 interview。

嗰陣終於覺得，好似開始見到終點。

之後又再等半年。

今年六月尾收到通知去做體檢。

做完體檢，我心入面其實已經知道，應該就快。

但我真係冇諗過，一個月後，就正式收到PR。

收到PR到而家，其實只係一兩日。

到而家我都仲未完全消化。

有時仲會突然問自己：

「咦？原來我而家真係PR？」

好似發咗場夢咁。

等咗接近七年嘅一件事，突然間成真。

反而有啲唔識反應。

我諗，我仲適應緊。

但有一樣嘢係真嘅。

我阿媽終於可以放心。

屋企人終於可以放心。

呢一刻，比任何嘢都重要。

而家，我終於可以開始規劃將來。

可以安心準備轉工。

可以去旅行。

可以有更多選擇。

可以考慮搵 remote work。

可以同女朋友計劃住埋一齊。

以前好多覺得好普通嘅事情，原來我一直都冇資格去計劃。

直到今日，我終於可以重新開始自己嘅人生。

如果問我，有冇後悔離開香港？

冇。

一次都冇。

至少結果論嚟講，我仍然可以自由咁生活。

至少，我唔使喺監倉入面渡過自己嘅人生。

但每次諗到呢度，我都會諗起仲喺香港、甚至曾經坐過監嘅手足。

我知道，我比好多人幸運。

我成功離開咗，有機會重新開始人生；但有啲人，依然承受緊我冇辦法想像嘅代價。

我想同你哋講一聲，對唔住。

唔係因為我後悔離開，而係有時會覺得，命運對每個人真係好唔公平。

我真心希望，你哋有一日都可以跨過呢一關，重新開始自己嘅人生。

無論將來喺邊度生活都好，希望你哋都可以平平安安、自由自在。

我會一直記住，你哋曾經付出過嘅一切。

如果可以同七年前嘅自己講一句說話，我會同佢講：

「你做得好好。」

「多謝你當日企咗出嚟。」

「多謝你有勇氣離開。」

因為我知道，當時嘅我哋，只係做緊自己認為啱嘅事。

最後，想同仲等緊身份嘅手足講幾句。

如果你覺得辛苦，唔好自己一個人頂。

同身邊人講。

同其他手足講。

去搵心理醫生。

呢啲唔代表你軟弱。

等待本身，就已經足夠令人崩潰。

我自己都睇過心理醫生。

而家有 Medicare，有啲心理醫生仲有 concession，真係幫到好多。

如果有人想知點樣搵資源，都可以隨時搵我。

最後，希望大家都快啲收到嗰封信。

我知道等待真係好辛苦。

但而家開始，香港人嘅個案已經批得愈嚟愈快。

希望已經比以前近好多。

捱埋佢。

希望下一個分享好消息嘅，會係你。

七年前，我帶住恐懼離開香港；七年後，我終於可以帶住希望，重新開始人生。

希望有一日，你哋都可以

＊＊＊

伸延閱讀：

新聞雜評（四百九十六）