弊家伙，書房冷氣壞鬼咗！

幾個星期前茶日，放工返到屋企，入屋去到書房放低包包，順手啪着部冷氣...

唔着...

再啪...

都係唔着。

魔術師睇吓個電掣，有燈着即係有電到；再去廚房望下個電兜，無跳掣。

咁即係話，除非係個電掣壞咗，無電去到部窗口式冷氣機度；否則就係部冷氣機壞咗。

冷氣機壞都唔出奇，畢竟買咗成十幾年，又少保養打理，甚至無洗過（最多只係抹吓隔塵網嗰類表面嘢）。

一來係懶，二來係唔想執清張書枱俾啲工人在上方工作搞部冷氣機，出出入入間屋...

一不做二不休，見部冷氣都舊舊哋，於是就上網搜尋，搵返部同樣牌子都係 Panasonic 的新型號。估唔到依家除咗變頻冷暖，部冷氣仲有得 Wi-Fi 上埋網可以預校開機時間，等屋主返到屋企即時涼定先（當然電貴少不了要多返啲）：

（圖片來源：Panasonic 官網 > 產品 > 家居生活 > 換氣及空調設備 > 窗口式空調機 > CW-HZ70AA Inverter PRO - Wi-Fi 變頻式冷暖窗口機 (3/4 匹), captured on 23 Jul 2026)

再走去一向幫襯開的友和（02347.HK）

（圖片來源：YOHO > 大型電器 > 冷氣機 > 窗口式冷氣機 > Panasonic 樂聲 > Panasonic 樂聲 窗口式冷氣機 > Panasonic 樂聲CW-HZ70AA Inverter PRO nanoe®X 空氣淨化 變頻冷暖Wifi遙控窗口式冷氣機 3/4匹 香港行貨 (超越一級效能標準10% 極致慳電), captured on 23 Jul 2026）

魔術師依家就有部舊機喺度，周圍亦無傢俬遮檔，照計可以唔使睇位慳返 ＄150 睇位費，只需要安裝費 ＄400，即係全部埋單 ＄5,989，仲可以享有特定信用卡付款優惠。

不過友和衰在要叫歐綠保回收舊機，約時間唔知後使唔使向公司請假，抑或周末都搞得掂，總之即係要將部舊機放喺屋內幾日（？）等歐綠保來收，。

魔術師順手搵返買舊機間網店槍吓價：

（圖片來涼：eCox > Panasonic 樂聲牌 CW-HZ70AA Inverter PRO - Wi-Fi 變頻式冷暖窗口機 (3/4 匹) (7,400 Btu/h), captured on 23 Jul 2026)

呢間鋪就賣＄5,440，標準安裝＄380，加埋＄5,820（未計其他推廣優惠），仲可以幫魔術師收舊機，不過要加錢（鄭浩南腔），加幾多魔術師未問，不過就一定好過將部舊冷氣放喺屋企幾日。呢間鋪網上唔收信用卡，少咗優惠，

友和同呢間 eCOX 魔術師都幫襯過，服務態度良好，質素亦有保證，價錢差唔多（信用卡優惠方面，總有其他轉折辦法食返），但魔術師傾向都係俾錢即時回收舊機，唔使自己約歐綠保浪費時間等，又放部舊機在家篤眼篤鼻。