早前懲教署的「冰草可樂悠」廣告，引爆了不少正氣L連環引用「新世代 attention span 短」，睇片最多睇頭嗰幾十零廿秒，唔會睇到尾條片頭嗰30幾秒的AI靚女載歌載舞變成宣傳吸毒云云：
魔術師就唔知有幾多妾民睇完呢個「廣告」會對毒品有興趣，但女團 Obsession 引爆妄民興高采烈運用 AI 二次創作，可見高手在民間，對推廣 AI 教學及普及化，其實相當有益。好似魔術師呢啲老餅，唔好話用 AI 工具整段 MV 出嚟，就連整張硬照出嚟都唔識喇！寓娛樂於學習，有得學真係想學吓！
在未有 online training 的日子，魔術師在做得最耐最後被分手的舊公司是上過「真人教授」的訓練課程，尤其是係會教新同事寫 email。由於有導師真人指導，各位新入職同事都不敢怠慢，唔似依家 online training 水過鴨背。
其實教嘅嘢好簡單，就係 Audience oriented。你寫電郵嘅目的都係要將信息傳達出去，令對方「清楚明白」，所以一定要以受眾角度去寫。例如：
- 電郵儘可能言簡意賅，一個 screen 內睇完，唔使對方 scroll。
- 如果內文太長，不妨先寫一個目錄，簡短列出有幾多個重點以免對方遺漏重點
- 先寫可以容易解釋，內容比較短的重點；內容較多的重點擺後。以免對方睇完長解釋後大腦疲勞，簡單的重點反而消化唔到
- Table，圖、screen capture 等不宜過大要碌左碌右去睇，如果對內文無大影響儘量擺到最尾，以類似 appendix 的形式出現。
講就好簡單，好似唔使讀過廣告、傳訊有關學科都會識咁，但係做落嚟唔係咁易。
尤其是魔術師出咗舊公司，在其他公司做都有啲唔慣同事們寫 email 的 structure。
又尤其是好似依家呢間公司咁，電郵的目的除了表達信息之外，可能更重要的是作為「我已講了你知」的證據，你睇唔清楚係你嘅錯。
魔術師最近有踩中咗陷阱，有個平時都同句無乜兩句、亦唔同組嘅有青電車妹在一堆長長 table 的 table 之後，加了一小行字；魔術師睇漏眼無 scroll 到落最底，就去問返佢係咪漏咗呢行字嘅信息。
結果梗係俾有青電車妹窒返轉頭：「去到最底咪寫咗囉！」
魔術師將電郵碌到 table 最底，果然就係有嗰段信息。魔術師心諗乜無人教你寫 email 嘅咩；同時暗嘆自己年紀大咗，attention to detail 老化之餘，心諗寫電郵寫成咁就好似海味鋪將「＄XXX 一兩」寫成「＄XXX 一錢」，再收收埋埋放在最不顯眼的地方，你睇唔到就係你嘅問題喇。
有時覺得呢種工作模式好鬼似公墓園。以自己為先，諗到乜就做乜，做咗自己功課就算，而唔理對方是否接收到（即係好似條女團片咁，以為 AI 靚女受宅男歡迎就 go go go，唔理個信息是否能傳達出去）。
又睇返，由 twitter 限住字數開始，到識字文盲睇圖唔睇字，再到依家興微短劇，AI 劇本，霸虎總裁之類，基本上電影電視圈好似能說好一個故事的能力，表達清楚的人都愈來愈少。睇嚟表達能力和技巧可能會成為「稀有資源」，愈來愈值錢了。
最後，呢段海關片，又係開頭用咗長篇幅去講點樣呃人，段半段才講正確做法，表達方法同 AI 女一樣；魔術師就寧願睇窄身短裙妹說教了：
＊＊＊
＊＊＊
伸延閱讀：
沒有留言:
張貼留言