開心地買

話說魔術師自小住木屋和公屋，讀既係屋村中小學同鄉村大學，甚至乎第一份返既工都係返火炭工業區，總之咁耐以來都係好天神村ｆｅｅｌ；直到返左中環工，見到同魔術師差唔多年紀（當時都只係廿歲鬆ｄ）既港男港女同事，係能夠講得出人地件衫係咩牌子既！嘩，當時魔術師覺得好神奇，唔通佢地係成日睇ｄ時裝雜誌既？
就係咁，因為受左港女講起樓價節節上升時的貪婪樣子既刺激，為左唔想俾港女看扁，為左唔想俾窮追港女既港男串親（雖然魔術師也不是跟他們爭甚麼），魔術師就開始走去買埋ｄ名牌野，仲要唔貴唔買（指在可負擔的範圍而言）．直到有一日，有港女對魔術師嗔道：「乜你買親ｄ野都咁貴架！？」魔術師先知，原來佢地都只係大隻講，得把口，講就天下無敵，做就有心無力．
以上既野，大致上都響「我是港男」一文中講過．人大左，睇通左，為啖氣既心態少左，但買貴野既習慣卻不減．其實只要不是那些潮流產品和品牌，很多傳統名牌都是物有所值的，最好的例子便是皮革用品，質料和手工好的皮包和公事包，只要保養得好，真是可以用好幾年．
魔術師認為，買質料上乘、用得著、又或者可以欣賞的「貴野」，在搵得來洗得去，在負擔能力以內，又唔會令自己現金流有好大影響的情況下買野，便是理性消費，即使買貴些也不礙事．
因為，買野真係好開心架！
關於購物心得，魔術師會在以後另文再述，但現在先自首，因為少數時候，魔術師買野都會唔理性，例如：
１．鏡頭：就好似最近出既新果兩枝鏡頭咁，其實同舊既兩枝比，差別（起碼對魔術師呢類業餘攝影玩家來說）唔係咁大．兩枝鏡頭成三萬蚊，就算賣返舊果兩枝出去，都要用成萬幾，來買ｄｄ差別．呢個絕對係心癮問題．
２．電子產品：屋企實在有唔少多餘既電子產品，例如唔多用既ＰＤＡ，ＧＰＳ，ＵＭＰＣ，ＰＭＰ，藍芽耳機（六隻！），ＤＶ，仲有支成四千蚊既ＡＫＧ咪！
３．影音光碟：魔術師慣左，見到好似好睇既戲或者好聽既碟都會買左先算，音樂碟仲可以ｌｏａｄ落ｉＰｏｄ，但係影碟就麻煩．魔術師又唔鍾意租碟喎，鍾意拿起手隨時有得睇果種感覺；又鍾意買埋ｄ特別版同ｂｏｘｓｅｔ，好似魔戒呀，ｄｉｅ　ｈａｒｄ呀（竟然無買異形ｂｏｘｓｅｔ），連變形金剛都要買個盒可以變形果個ｖｅｒｓｉｏｎ，買完都覺自己洗腳唔抹腳．
最後，魔術師想奉勸那些在討論區大罵港女的毒男（不過睇得呢度既文既都應該唔係咁既人），逞口舌之便是沒意義的，如果自己真係電車雙失，一事無成無出息，人家看不起自己也不為過，也沒甚麼好怨的，還是努力做好自己吧，不是為港女，而是為自己．
2008/01/07 22:26:46