自動手錶

雖然從小就對爸爸那只手動上鍊的帝舵很有好感，但魔術師卻記不起從幾多歲開始戴錶和戴哪一款錶，只肯定不會是卡通錶．最有印象的是一只附有計數機功能（果然是數怪！）的金石（當時Ｃａｓｉｏ的譯名）電子跳字錶，當時應該是中學時代吧．

後來魔術師嫌橡膠錶帶不散熱，電子跳字錶又太小孩子氣，便央著爸媽去時間廊買了一只鐵達時給我，當是賀魔術師考完會考的禮物．想起來，讀中六時戴著鐵達時上學，都幾威架，因為真係無乜同學仔會戴呢類「成人手錶」．
雖然話「不在乎天長地久，只在乎曾經擁有」，但呢隻錶都陪左魔術師五年，直至魔術師出來工作，才再幫親時間廊，買了一只金色的司馬．原來呢隻錶個款係扮勞力士既，只不過係ｂｏｙ　ｓｉｚｅ，唔怪得睇落個款真係幾唔錯！

呢一隻亦係魔術師第一隻既自動手錶，仲記得當年諗住同隻鐵達時輪流戴，點知無幾日隻錶就停左，魔術師嚇左一跳，連忙拿去問店員，才知曉「自動手錶係要戴先識自動上鍊」的事實，個感覺當堂「高檔」左好多．於是乎，魔術師就開始響搭地鐵時，見有人握著扶捍，都會去留意一下佢地既手腕，睇下係咪戴自動錶．
諗諗下，自動手錶呢個ｃｏｎｃｅｐｔ幾好喎，好似對愛人一樣，迫住你去長情而專一咁去看護住佢，你一但唔理佢幾日，佢就唔識郁喇！當然後來知道有樣野叫ｗｉｎｄｅｒ（旋轉盒），唔使你戴都可以幫你上鍊，十足娶左個女仔返屋企之後，自己又可以出去包二奶一樣．

又過左好幾年，隻司馬開始故障唔識行，壽終正寢了．結果魔術師就響某日，行過太子喜運佳（唔係渣估幫襯果間）就買左魔術師既第二隻自動手錶－浪琴．仲記得果時，買完錶之後幾日，喜運佳就被大賊光顧，仲響大街上同警方發生激烈槍戰添．

結果，隻浪琴又係戴左好幾年，戴到壞為止，先再去返同一間喜運佳買左隻江詩丹頓（圖為皮帶版，魔術師買既係鋼帶）．錶行仲同魔術師整返隻浪琴，不過魔術師都係貫切一直既專一主義，隻浪琴結果都只係放響ｗｉｎｄｅｒ度．

對買錶，魔術師仲有少少看法，可在這兒和大家分享：
１．　魔術師向來不喜鑽錶，因為ｄ鑽「粉」唔係好似一般鑽石咁，可以俾人從各種不同的切割面欣賞，而係以量取勝，未免太沒意思．所以魔術師從不看蕭邦伯爵，覺得呢ｄ品牌唔值賣咁貴也．
２．　魔術師喜歡鋼帶多於皮帶，因為皮帶易損耗，又要打理．魔術師人懶，廢事多隻香爐多隻鬼．
３．　除非隻錶有防磁功能，否則返到屋企要小心擺放，切勿放近帶有磁性的物品，例如喇叭，和手機皮套、手袋銀包的磁石金屬鈕等．
４，　不戴的自動手錶要放進ｗｉｎｄｅｒ裡，否則長期唔郁好易壞．
５．　自動手錶既係秒針係連續運行既，石英錶就一格一格咁跳，甚至係無秒針既．
６．　名不見經傳既牌子出既陀飛輪，千祈唔好買．
７．　魔術師喜愛的品牌是百達翠麗，江詩丹頓，愛彼，積架，和萬國．
８．　魔術師唔鍾意勞力士，覺得太「普及」了，都唔知點解咁多香港人戴．曾經同同事上過一個投資班，個導師都係咁話，之不過佢補充左一句：「你地買百達翠麗時，都要有隻勞傍下身，因為變現能力最高最保值，江湖人必備．」但係，阿ｓｉｒ，我地係做正行架喎．
９．　十大名錶，好像沒有一定的說法，魔術師只係知道，百達翠麗和江詩丹頓無論點選，都係必然正選．
＊＊＊
伸延閱讀：
在餐廳門口尋找鑽石
智慧型消費一貴買平用
香港人的勞力士
兵姐另有大量談錶既文章，請看日色欲盡花含煙