2008年1月16日 星期三

自動手錶

雖然從小就對爸爸那只手動上鍊的帝舵很有好感,但魔術師卻記不起從幾多歲開始戴錶和戴哪一款錶,只肯定不會是卡通錶.最有印象的是一只附有計數機功能(果然是數怪!)的金石(當時Casio的譯名)電子跳字錶,當時應該是中學時代吧.

後來魔術師嫌橡膠錶帶不散熱,電子跳字錶又太小孩子氣,便央著爸媽去時間廊買了一只鐵達時給我,當是賀魔術師考完會考的禮物.想起來,讀中六時戴著鐵達時上學,都幾威架,因為真係無乜同學仔會戴呢類「成人手錶」.
雖然話「不在乎天長地久,只在乎曾經擁有」,但呢隻錶都陪左魔術師五年,直至魔術師出來工作,才再幫親時間廊,買了一只金色的司馬.原來呢隻錶個款係扮勞力士既,只不過係boy size,唔怪得睇落個款真係幾唔錯!


呢一隻亦係魔術師第一隻既自動手錶,仲記得當年諗住同隻鐵達時輪流戴,點知無幾日隻錶就停左,魔術師嚇左一跳,連忙拿去問店員,才知曉「自動手錶係要戴先識自動上鍊」的事實,個感覺當堂「高檔」左好多.於是乎,魔術師就開始響搭地鐵時,見有人握著扶捍,都會去留意一下佢地既手腕,睇下係咪戴自動錶.
諗諗下,自動手錶呢個concept幾好喎,好似對愛人一樣,迫住你去長情而專一咁去看護住佢,你一但唔理佢幾日,佢就唔識郁喇!當然後來知道有樣野叫winder(旋轉盒),唔使你戴都可以幫你上鍊,十足娶左個女仔返屋企之後,自己又可以出去包二奶一樣.


又過左好幾年,隻司馬開始故障唔識行,壽終正寢了.結果魔術師就響某日,行過太子喜運佳(唔係渣估幫襯果間)就買左魔術師既第二隻自動手錶-浪琴.仲記得果時,買完錶之後幾日,喜運佳就被大賊光顧,仲響大街上同警方發生激烈槍戰添.


結果,隻浪琴又係戴左好幾年,戴到壞為止,先再去返同一間喜運佳買左隻江詩丹頓(圖為皮帶版,魔術師買既係鋼帶).錶行仲同魔術師整返隻浪琴,不過魔術師都係貫切一直既專一主義,隻浪琴結果都只係放響winder度.


對買錶,魔術師仲有少少看法,可在這兒和大家分享:
1. 魔術師向來不喜鑽錶,因為d鑽「粉」唔係好似一般鑽石咁,可以俾人從各種不同的切割面欣賞,而係以量取勝,未免太沒意思.所以魔術師從不看蕭邦伯爵,覺得呢d品牌唔值賣咁貴也.
2. 魔術師喜歡鋼帶多於皮帶,因為皮帶易損耗,又要打理.魔術師人懶,廢事多隻香爐多隻鬼.
3. 除非隻錶有防磁功能,否則返到屋企要小心擺放,切勿放近帶有磁性的物品,例如喇叭,和手機皮套、手袋銀包的磁石金屬鈕等.
4, 不戴的自動手錶要放進winder裡,否則長期唔郁好易壞.
5. 自動手錶既係秒針係連續運行既,石英錶就一格一格咁跳,甚至係無秒針既.
6. 名不見經傳既牌子出既陀飛輪,千祈唔好買.
7. 魔術師喜愛的品牌是百達翠麗,江詩丹頓,愛彼,積架,和萬國.
8. 魔術師唔鍾意勞力士,覺得太「普及」了,都唔知點解咁多香港人戴.曾經同同事上過一個投資班,個導師都係咁話,之不過佢補充左一句:「你地買百達翠麗時,都要有隻勞傍下身,因為變現能力最高最保值,江湖人必備.」但係,阿sir,我地係做正行架喎.
9. 十大名錶,好像沒有一定的說法,魔術師只係知道,百達翠麗和江詩丹頓無論點選,都係必然正選.
***
伸延閱讀:
在餐廳門口尋找鑽石

智慧型消費一貴買平用
香港人的勞力士
兵姐另有大量談錶既文章,請看日色欲盡花含煙


9 則留言:

  1. 唉,皮帶我真係又愛又恨。事關有啲鑽石款真係對唔同色、唔同皮嘅皮帶先靚,冬天戴上手又唔會凍冰冰。我隻江詩丹頓想換條唔同色嘅皮帶,要$6800蚊,一條皮帶啫,總要返瑞士原廠訂兩三個月先有貨。頭好痛!

    回覆刪除
  2. 數怪哥哥:
    我呢,真係一d都唔明自動錶有乜好,又唔係上月球同潛水,係唔駛佢防壓抗宇宙輻射嫁喎;而且,一隻錶最緊要係乜呢?係準時同reliable呀,石英錶同電子錶仲準時啦,又唔驚佢無啦啦停。
    不過我上次同人講依個問題,比人當係怪物,仲有自動錶愛好者,聽完之後覺得仲恐佈過鬼故!!!
    咁就有樣野仲驚嚇,我有隻Casio電子鬧鐘,由中二用到去上年,只換過兩次電,無論係會考見工出trip做伴娘,從來未試過甩我拖,唉,如果我果日唔係未扭乾晒d布來抺佢,可能依家佢仲行緊。

    回覆刪除
  3. 數怪哥哥:
    好膚淺呀你!
    仲有,快d覆人。

    回覆刪除
  4. 不敗的魔術師2008年1月17日 下午9:49

    兵姐:

    鑽石江詩,我諗都要成廿萬,俾幾千去換錶帶不為過吖.我老豆當年,就係因為無左保用書,結果攞隻上鍊帝舵去某錶行換錶帶,俾佢粗暴地一野夾斷左條原廠錶帶軸承!
    香水妹妹:

    係呀,功能上石英同自動錶係無乜分別,但係全地球,又有幾多個係李+x咁既級數,結果咪又係人靠衣裝(尤其是係香港地)...你咪當我係附庸風雅又好,對抗港女又好,支持精心手工藝術製作又好...

    回覆刪除
  5. 啍,今次算你叻啦。

    回覆刪除
  6. 不敗的魔術師2008年1月18日 下午9:13

    QUOTE
    samsara :

    仲有,快d覆人。

    UNQUOTE

    覆左喇!

    回覆刪除
  7. 唔好拎我啦

    俾人知唔好呀

    妖你知唔知危險點寫架
    仲有

    今日你咪講粗口既

    哇一不離二呀


    講下你個細路呀

    仔定女啫下

    回覆刪除


  8. 唔係又寄失左下嘛

    回覆刪除
  9. 不敗的魔術師2008年1月19日 下午7:55

    QUOTE
    七十 :

    講下你個細路呀

    仔定女啫下

    UNQUOTE

    唔明

    回覆刪除