2008年1月8日 星期二

開心地買

話說魔術師自小住木屋和公屋,讀既係屋村中小學同鄉村大學,甚至乎第一份返既工都係返火炭工業區,總之咁耐以來都係好天神村feel;直到返左中環工,見到同魔術師差唔多年紀(當時都只係廿歲鬆d)既港男港女同事,係能夠講得出人地件衫係咩牌子既!嘩,當時魔術師覺得好神奇,唔通佢地係成日睇d時裝雜誌既?
就係咁,因為受左港女講起樓價節節上升時的貪婪樣子既刺激,為左唔想俾港女看扁,為左唔想俾窮追港女既港男串親(雖然魔術師也不是跟他們爭甚麼),魔術師就開始走去買埋d名牌野,仲要唔貴唔買(指在可負擔的範圍而言).直到有一日,有港女對魔術師嗔道:「乜你買親d野都咁貴架!?」魔術師先知,原來佢地都只係大隻講,得把口,講就天下無敵,做就有心無力.
以上既野,大致上都響「我是港男」一文中講過.人大左,睇通左,為啖氣既心態少左,但買貴野既習慣卻不減.其實只要不是那些潮流產品和品牌,很多傳統名牌都是物有所值的,最好的例子便是皮革用品,質料和手工好的皮包和公事包,只要保養得好,真是可以用好幾年.
魔術師認為,買質料上乘、用得著、又或者可以欣賞的「貴野」,在搵得來洗得去,在負擔能力以內,又唔會令自己現金流有好大影響的情況下買野,便是理性消費,即使買貴些也不礙事.
因為,買野真係好開心架!
關於購物心得,魔術師會在以後另文再述,但現在先自首,因為少數時候,魔術師買野都會唔理性,例如:
1.鏡頭:就好似最近出既新果兩枝鏡頭咁,其實同舊既兩枝比,差別(起碼對魔術師呢類業餘攝影玩家來說)唔係咁大.兩枝鏡頭成三萬蚊,就算賣返舊果兩枝出去,都要用成萬幾,來買dd差別.呢個絕對係心癮問題.
2.電子產品:屋企實在有唔少多餘既電子產品,例如唔多用既PDA,GPS,UMPC,PMP,藍芽耳機(六隻!),DV,仲有支成四千蚊既AKG咪!
3.影音光碟:魔術師慣左,見到好似好睇既戲或者好聽既碟都會買左先算,音樂碟仲可以load落iPod,但係影碟就麻煩.魔術師又唔鍾意租碟喎,鍾意拿起手隨時有得睇果種感覺;又鍾意買埋d特別版同boxset,好似魔戒呀,die hard呀(竟然無買異形boxset),連變形金剛都要買個盒可以變形果個version,買完都覺自己洗腳唔抹腳.
最後,魔術師想奉勸那些在討論區大罵港女的毒男(不過睇得呢度既文既都應該唔係咁既人),逞口舌之便是沒意義的,如果自己真係電車雙失,一事無成無出息,人家看不起自己也不為過,也沒甚麼好怨的,還是努力做好自己吧,不是為港女,而是為自己.
2008/01/07 22:26:46

2 則留言:

  1. >>買野係好開心。
    非常同意。
    不過買野同人一齊分享我覺得仲開心呀!(當然包括自己父母啦.)

    回覆刪除
  2. 蝙蝠俠,乜原來你都係咁架,好野,多個共犯好開心。

    回覆刪除