2017年5月5日 星期五

六七躁動

嘩,好睇喎!如果老媽子還在,肯定大把古仔講!
《六七記憶》第一集:躁動 2017/05/01 20:31

五十年前的六七暴動,歷時超過半年,這場暴動造成五十一人死亡,八百多人受傷,超過二千人坐牢。一場人造膠花廠的勞資糾紛,演變成一場政治風暴,除了因為社會存在不少矛盾,更大程度是受到當時國內文革的影響。新聞台特備節目《六七記憶》第一集,找來當年左派的參與者,以及一位資深中共黨員,分享他們的經歷。
1. 提起那個火紅的年代,順便又回下帶。魔術師外公後生時行船,結識到東江縱隊指揮官曾生,便加入了縱隊一起打日本仔,戰後在新華社撈了一份差事(所以梁威林之類的名字,魔術師小時候都聽過下)。老媽子自小受革命思想薰陶,讀嘅係左校,可謂根正苗紅;最激嘅就係為咗對抗萬惡嘅龍獅政府的洗腦殖民教育而唔去考會考!結果咪就係老媽子自己受罪,拿着個「中五畢業」的學歷,卻沒有任何證書佐證。尤幸左校的校長睇得起老媽子(抑或是外公有面靠父幹?),給她一份教「管教班」的差事,其中有個超齡女學生有個同村宅男阿哥剛來了傷港無耐...咁老媽子就識咗老豆了!嗯,自從老豆老媽去後,魔術師都好耐無見過呢位「媒人」了,不知佢是否健在呢?
2. 見到所目講開毛語錄,心念一動,拉開貯物櫃,雖然搬過屋,但老媽子的某些遺物還是保存得頗佳,就連老媽子用牛油紙包的《毛澤東選集》依然完好無缺。當然,擺係度嘅書還擺係度,魔術師自細個知老媽子想自己「好好學習毛主席思想」,不過「原諒我這一生不羈放縱愛自由」,70後出生的魔術師又怎會咁老套去讀毛語錄、毛選輯呢?但同樣,魔術師(以致當時一眾受龍獅政府普及教育,自小被西方民主思想洗腦的「一袋年青人」),就 miss 咗好多可以學習上一輩的經驗之談和交流心得的機會了。

3. 講返個節目,圖魔術師就唔截嘞,有興趣者自己睇,23分鐘而已。其實六七暴動的主因,咪又係民眾生活困苦,貧富懸殊之類;當然仲有比依家勁得多的就係貪污囉。咁啱當時蝗國在搞暈鴿,輸出極左思想,煽動群眾鬥倒當權派(龍獅政府)。結果唔重要,無論成功抑或失敗,總之都可以搞到你內傷,不亦快哉!
4. 睇返啲片段,原來龍獅黑警真係用警棍兜心口墥,打到你內傷吐血架喎!咁講法特衰黑警啲警棍咁斯文(even for 朱警司的「伸延手臂」),又的確同慈母差唔多!
5. 又,原來早在澳門123事件,廣東省已經出動禁運糧水嘅手段,叫澳門政府跪低簽「投降書」。毛主席思想果然有成效,給老港豬們打了一記強心針。
6. 鬥倒當權派,趕走港英,係要好有組織嘅,尤其是要有「自己的醫院」(在澳門123事件中,鏡湖醫院是「鬥爭醫療中心」,呢一點對「革命派」非常有利)。
7. 睇返依家收收地友的黃C同笨土派,又話革命又話滲透,學咗幾個 term 就係度也文也武;你睇老共搞鬥委會搞到出神入化,班有青就連BB班煮飯仔的水準都不如,點同老共鬥?更神奇的,班中剷港豬之前仲話傷港嘅未來要靠佢地,真係唔知好嬲定好笑。
***
伸延閱讀:
怪醫譚有為 原來一碌柒

16 則留言:

  1. 尚有一個月,魔兄咁快就寫定呢篇“週年紀念文”?

    回覆刪除
  2. //黃C同笨土派,又話革命又話滲透
    冇得鬥,一早被滲透的係佢地。好明顯冇認真讀過老毛果招「掺沙子、甩石頭、挖墙脚」。

    回覆刪除
    回覆
    1. //「掺沙子、甩石頭、挖墙脚」

      用傷講人話來說就是「離間、要脅、剷除」,基本上兵法和商業戰事都常見到. 黃C 最叻就係離間, 問誰未覺醒; 要要脅到人,你要有返咁上下點子同本錢, 但就連佔派都未能達成目標, 更遑論其他; 「剷除」就係藉着 reorg 將對手的心腹戰力調走, 要有返咁上下權謀先做到, 對班有青來說太advanced level 了.

      刪除
  3. //70後出生的魔術師又怎會咁老套去讀毛語錄、毛選輯呢?

    唔係講笑,我十零年前閒逛書店,真係買咗本«毛語錄»---諷刺既係,我係同池兄講嗰本重要知識書«計得精彩»一齊買的..

    當時想法是: 呢條pk絕對是一個梟雄,要學下佢既權謀方略同思想境界。我真係睇晒的,不過束之高閣好耐,好多都還返俾毛主席了.

    回覆刪除
    回覆
    1. //我係同池兄講嗰本重要知識書«計得精彩»一齊買的..

      嘩, 原來摩摩一早就識貨!

      //我真係睇晒的,不過束之高閣好耐,好多都還返俾毛主席了.

      由讀書學到的 strategical 嘢唔容易消化, 你一定要有返咁上下ambition 去實現你的 strategy, 咁先至唔會將知識「有借有還」.

      刪除
  4. 六七暴動跟文化大革命一樣,一個精神領袖有精神病,就播其癲於眾也!

    回覆刪除
    回覆
    1. 當年陳百祥話,「叻人最高境界,自欺欺人」,冇錯。

      刪除
    2. 首先要呃到自己係「叻人」..

      刪除
  5. 魔兄你好,
    正在研究hsea hseb ,知不知可以有甚麼方法查到call date, 收回價, 收回形式(美元or股?) 等資訊? Thanks!

    回覆刪除
    回覆
    1. Google到你個blog 其他都係英文資源

      刪除
    2. 英文資源有問題嗎? 美股唔用英文,難道用中文?
      再給你一個提示,Google 「魔術師 資產配置 HSEA HSEB」,舊文有寫,請花少許心力逐篇查找。

      刪除
  6. 請問魔術師兄及各位有沒有看過「消失的檔案」紀錄片?幾個月前傳媒有頗多報導,最近又有左派人士講對導演不滿。此片暫只作社區放影。

    回覆刪除
    回覆
    1. 我好背, 直程唔知有呢套紀錄片, 等出碟先再評.

      唔知點解, 一見到社區放映又有分享會咁, 就覺得好鬼《十年》feel, 未睇都唔多開胃.
      https://www.facebook.com/vanishedarchives/

      刪除