2017年5月15日 星期一

摩摩電影節之《綫人(The Stool Pigeon)》:張翼德之死

其實港慘片有一類電影係特別耍家,甚至乎連荷李活都瞠乎其後的,就係以警匪片包裝講人性矛盾和黑暗面的電影(尤其是係 sad ending,道盡了「人生不如意事,十常八九」的無奈),經典如《無間道》都係呢個類型。今次《綫人(The Stool Pigeon)》都係一樣,劇情簡單,犯駁比較少(不過都被魔術師捉幾個比較刺眼的 bugs),主要係刻劃人物性格、遭遇、和心理鬥爭:


李滄東(張家輝飾)是警隊情報科的隊長,平日的職責就是和線人打交道索料。在一次毒品交易案中,毒犯孖狗(尹揚明飾)知道有臥底和線人在場,企圖毀滅證據;李 sir 不得已下令即場拘捕,令線人廢噏(廖啟智飾)身份曝光,孖狗卻乘亂逃脫。廢噏雖然收了李 sir 的錢,但未幾已被孖狗找到,被斬至重傷。一將功成萬骨枯,李 sir 破了案有得升職,更是關人個關,在夜店裡找了件波波妹扑嘢去了:

一年後,黑警收到消息,逃亡多時的悍匪巴閉(陸毅飾)從寶島回港犯案,上頭於是發了150萬線人費,要李 sir 搞定。李 sir 知道巴閉手下太平(姜皓文飾)要招攬車手,便去獄中找來駕駛技術高超而又即將放監的細鬼(謝霆鋒飾)幫忙。原因細鬼的老父四哥身前欠下100萬貴利數,貴利便抓了細鬼的妹妹婷婷去做G,錢債肉償。細鬼本來並無答應李 sir 做二五仔,出獄後想用自己的方法跟貴利講數,卻給痛打了一頓:

無奈之下,細鬼唯有答應李 sir 的要求。李 sir 便跟細鬼簽好合約,「底薪」竟有2萬(使唔使供強積金),破案情報另有 bonus:

細鬼在黑市賽車中大顯身手,成功被太平招攬。巴閉、太平、細鬼和新招來的三名手下共商大事,話所有事由巴閉老婆阿弟(桂綸鎂飾)出面接頭。這時阿弟卻說自己有咗,嚇了巴閉一跳。阿弟帶細鬼四處視察,又操得一口流行偽蝗語,故此得到珠寶金行職員青睞。阿弟看中了一枚鑽戒,叫細鬼留意。然後又非常親密地跟細鬼拍照消夜講心事,一邊講偽蝗話一邊講我城方言,但溝通絕對無問題。細鬼查到消息告訴李 sir,並索價100萬:

阿弟跟細鬼去交收槍枝,途中遇上黑警路障,二人慌忙逃走,東躲西藏間阿弟更主動跟細鬼大打車輪戰。原來巴閉叫阿弟打胎,原因係巴閉從寶島回港無耐已經「識咗另一個」,仲俾李 sir 跟蹤到佢同小三開房短聚:

廢噏自去年被孖狗斬傷後,因為害怕連累家人,瘋瘋癲癲的流落街頭。李 sir 覺得自己虧欠了他,也多加照顧;最終趁孖奇回港時通知夥記出動拘捕,並帶同廢噏親眼目睹孖狗被捕的過程,幫助廢噏解開心結,令他安心回家。不過孖狗雖然被捕,會唔會好似黃C咁,黑警呢邊拉人,假法人那一邊便放人,廢噏會唔會開心得太早就不得而知了:

李 sir 工餘時常到舞蹈學校學跳舞,又跟老師阿雪(苗圃飾)混得頗熟。原來阿雪係李 sir 的老婆,因為李 sir 去年在升職慶祝派對上跟波波妹來了一手,並惹上梅毒,又傳染給老婆,連帶腹中塊肉都保不了。阿雪在醫院中企圖自殺獲救,但失去了記憶;李 sir 時常來親近便是想彌補跟咸蟲大哥一樣「係男人都會犯的錯」 (咁依家李 sir 啲性病醫返好未?)。誰知這天李 sir 剛學完舞便給阿雪爸爸(劉江飾)發現,雪父一嘢扑濕了李 sir,並罵了起來,給阿雪聽到了。阿雪不知是否回復了記憶,慌亂間奪門而出,胡亂衝出馬路給車墥到重傷:

另一邊廂阿弟跟巴閉攤牌,巴閉坦誠有小三,做完呢單案後便要跟阿弟分手,然後竟然就像沒事似的跟同黨商議打劫金行,要劫走250公斤黃金,又唔諗下咁重點拎。眾人連地點都要守密,但檯上卻有地圖,呢個劫案會議實在令人費解:

去到案發當日,細鬼要通知李 sir,人急智生,便將李 sir 的電話號碼寫在手板上,叫路過的抹車阿伯代為通報。好在阿伯並無老人痴呆,幸不辱命通知了黑警。另一方面,巴閉及同黨們唔用拖喼而用背囊將金條裝起,送上車上;門外持AK47的劫匪唔使學葉國歡咁用手按住枝槍,便可辣低黑警:

眾匪回到巢穴,將本來9999金條鎔掉,企圖消滅證據,但土法重鑄少不了混有雜質,二手應該賣唔到好價。細鬼暗中通報黑警巢穴所有位置,但就在這時阿弟發難黑吃黑要搶走巴閉的金條,雙方發生槍戰,細鬼為了保護阿弟,後腰中了一槍,二人慌忙逃去。這時黑警殺到,拘捕了巴閉;但太平及另一名柒青手下(吳浩康飾)卻逃走了:

因為眾匪犯案時蒙了面,槍枝和車子都燒了,金條又給鎔掉,黑警無證據證明巴閉犯案,便要求細鬼行出來做證。李 sir 不欲細鬼送死,但自己又係工資奴隸,上司指令不得不聽,陷入兩難局面:

阿弟和細鬼逃到茶果嶺安頓,細鬼致電李 sir 帶錢來。奄奄一息的細鬼不忘從褲袋裡掏出早前阿弟叫他留意的鑽戒,如此深情真係冧死女。細鬼跟阿弟說出真相,為了100萬去營救妹妹而做二五仔,叫阿弟自己拎啲金走。意想不到的是,阿弟竟然提議二人一起逃去寶島,得享民主政制:

剛接到老婆死訊的李 sir,混混噩噩的拿了錢出發去茶果嶺。這時阿弟請來的黃綠醫生通報了太平,眾匪也帶刀來襲。一場混戰之後,細鬼與阿弟逃到了一所荒廢校舍。細鬼為保阿弟,堵住課室門口,被太平斬死。李 sir 這時來到,竟然唔用槍而跟柒青手下打爛仔交,最後用磚頭將柒青扑死。太平連李 sir 都斬埋一份,但顧了前顧不了後又給阿弟扑死。最後阿弟被捕,為了報復,答應黑警做證人指控負心的巴閉;都話咗張飛之死,你既然對人唔好,鬧完打完就不要留佢在身邊喇:

結局係李 sir 委託江湖大佬幫婷婷還債;又答應每月付錢給被廢噏誤認為老婆的歌女,希望她能幫手照料。但鏡頭一轉,李 sir 已因挪用公款(細鬼死了連線人費都慳返)被捕,隨時連長俸都無埋,試問點樣每月供款奉養廢噏呢?剛剛承諾,轉頭便走數,豈不是仲衰過689?

***
魔術師覺得港慘片寫人性矛盾真係有一手,可能傷民都係矛盾一族,最明顯就係一面痛恨萬惡的極權蝗國,另一方面又要為生計向這班蝗民豪客陪笑臉;就如李 sir 教導同事如果跟線人達成「亙惠互利」的關係,大家只是交易不能放感情入內一樣。
之但係,大方向寫得好,但小處的 bug 卻從來唔着意去修正,呢啲毛病港慘片唔知點解係要做得唔好,唔知係咪跟本無心機去「執正佢」。最明顯的就是阿弟的國語跟細鬼的廣東話可以完全無溝通問題(應是無厘頭蝗巷呆合拍的問題),最後決戰李 sir 竟然無槍要打爛仔交等等;另外250公斤黃金點拎點鎔、阿伯竟然記得李 sir 電話號碼報警、阿雪失憶、李 sir 臨被人拉都仲話要俾錢照顧廢噏等小節,其實可以做得用心啲,唔好搞到咁突兀好似攞戲嚟做咁。
仲有,桂綸鎂的演技真係好差,淨係識得反白眼!

17 則留言:

  1. 會唔會喺250公克黃金呀?嘻嘻!

    回覆刪除
    回覆
    1. 真係弗弗地,根本有幾多黃金係隨個劇本點寫都得,徧就寫個咁唔 make sense 嘅。

      刪除
  2. //最明顯的就是阿弟的國語跟細鬼的廣東話可以完全無溝通問題(應是無厘頭蝗巷呆合拍的問題),最後決戰李 sir 竟然無槍要打爛仔交等等;另外250公斤黃金點拎點鎔、阿伯竟然記得李 sir 電話號碼報警、阿雪失憶、李 sir 臨被人拉都仲話要俾錢照顧廢噏等小節//
    呢啲需要邏輯同知識,顯示出編劇導演嘅質素。
    內地亦好興西人講西文,中國人講中文,全靠字幕補助。
    阿伯記得唔奇,點解要信細鬼先奇。
    阿雪失憶可以係 suppress 痛苦嘅記憶。佢又唔係壞腦,李 sir 係痛苦源頭,見面時係咪應該感到好唔自在?
    溶金要成千度,點溶?所以編劇導演連呢啲都唔知?
    我冇睇電影,以呢篇講述,李 sir 由事不關己到自身難保都要幫廢噏嘅轉變太奇怪。

    回覆刪除
    回覆
    1. //內地亦好興西人講西文,中國人講中文,全靠字幕補助。

      我好怕呢類「無縫銜接」.

      //佢又唔係壞腦,李 sir 係痛苦源頭,見面時係咪應該感到好唔自在?

      阿雪唔知以前係咪又係教跳舞的? 否則舞蹈學校的職員無理由唔識李 sir.

      //溶金要成千度,點溶?所以編劇導演連呢啲都唔知?

      阿導演覺得用個 pan ,開個爐就熔到, 好似牛油咁.

      //李 sir 由事不關己到自身難保都要幫廢噏嘅轉變太奇怪。

      只能想像佢對老婆單嘢太內疚, 而件事就係由佢「出賣廢噏」所以有得升職而起.

      刪除
  3. 較早前《保持通話》同呢套奸角都係內地一級男演員。
    暫時我都冇見過內地片用香港演員做奸角。

    回覆刪除
    回覆
    1. //暫時我都冇見過內地片用香港演員做奸角。

      真係有笨土意識.

      刪除
  4. //去到案發當日,細鬼要通知李 sir,人急智生,便將李 sir 的電話號碼寫在手板上,叫路過的抹車阿伯代為通報。//

    點解唔用個腦記住? 都係8個冧巴遮...叫得阿伯代打,又點解唔自己擔阿伯電話自己打?

    //雙方發生槍戰,細鬼為了保護阿弟,後腰中了一槍,二人慌忙逃去。這時黑警殺到,拘捕了巴閉//
    //槍枝和車子都燒了,金條又給鎔掉,黑警無證據證明巴閉犯案//

    即係見到黑警,前一刻仲勇武抗爭與同黨搏火,下一秒就完善法治,仲有時間燒毀槍枝棄械投降,難道黑警可以用眼神制服悍匪?

    回覆刪除
    回覆
    1. //叫得阿伯代打,又點解唔自己擔阿伯電話自己打?

      驚俾同黨見到自己打電話...

      //即係見到黑警,前一刻仲勇武抗爭與同黨搏火,下一秒就完善法治,仲有時間燒毀槍枝棄械投降,

      我寫得唔好, 槍係一入巢穴就燒了, 然後再熔金, 熔完金就笨土內哄.

      刪除
  5. 火速留名先。

    其實片尾播«每當變幻時»真係淒涼到非常:

    https://youtu.be/GEbnSGWuu5M

    //較早前《保持通話》同呢套奸角都係內地一級男演員。

    不過陸毅在蝗片主要演文藝角色,佢今次做大賊好多蝗民是攞嚟笑的...雖然我覺得佢做得恰如其分。

    //暫時我都冇見過內地片用香港演員做奸角。

    有«讓子彈飛»的發哥和«回家的誘惑»的李彩華。後者是電視劇,幾年前套嘢紅到發紫,不過我只是偶爾轉台或在外面睇過唔夠幾分鐘---基本上是呆胞文化侵略蝗國,將其耍家八婆言情劇倒模入蝗國之作.

    回覆刪除
    回覆
    1. //有«讓子彈飛»的發哥和«回家的誘惑»的李彩華。//
      嘢~ 《讓子彈飛》根本無個好人~

      刪除
    2. //其實片尾播«每當變幻時»真係淒涼到非常

      加咗條片上正文了。

      7、80年代歌真係特別好 feel,歌靚詞靚,近年港慘片成日攞嚟做插曲,感染力當堂倍增(笨土派又可懷舊一番)。

      //我覺得佢做得恰如其分

      佢同阿弟鬥分手嗰場戲真係好鬼文青。

      //基本上是呆胞文化侵略蝗國,將其耍家八婆言情劇倒模入蝗國之作.

      呆胞反攻大陸就靠C9劇了!

      刪除
  6. 呢套算系我近年最喜歡的港慘片之一了,在電影台都睇過N次,所以有啲劇情可以補充下。

    //經典如《無間道》都係呢個類型

    過咗咁多年,我反而覺得臨尾陳永仁識破劉建明系內鬼時竟然急急腳咁走唔合理,佢話晒都出生入死咁多年,都會唔扮傻仔攞返個身份先算?(先不論臥底身份無可能只有直屬上司知道咁無稽勒)

    //一將功成萬骨枯,李 sir 破了案有得升職,更是關人個關,在夜店裡找了件波波妹扑嘢去了:
    //李 sir 由事不關己到自身難保都要幫廢噏嘅轉變太奇怪。

    我記得戲內有提過李sir情緒轉折的,不過近年少翻播,自己又少咗煲電影台,所以都幾模糊。

    //原因細鬼的老父四哥身前欠下100萬貴利數,貴利便抓了細鬼的妹妹婷婷去做G,錢債肉償

    你仲乜夾硬改人地老豆個名,佢叫“細鬼”系因為佢老豆叫“阿鬼”...

    //一邊講偽蝗話一邊講我城方言,但溝通絕對無問題
    //阿弟的國語跟細鬼的廣東話可以完全無溝通問題

    戲內講阿弟被老母賣咗身俾一個我城大佬,話佢在傷港轆咗一段時間識得聽我城方言都講得通.

    //阿弟跟細鬼去交收槍枝,途中遇上黑警路障,二人慌忙逃走,東躲西藏間阿弟更主動跟細鬼大打車輪戰

    呢段追逐戰拍得幾好睇,尤其系細鬼發難衝block之後邊揸車邊戴手套抹軚盤然後背景響起“White Christmas”,好有黑色幽默feel.

    //仲俾李 sir 跟蹤到佢同小三開房短聚:

    呢段巴閉使計撇甩狗仔亦幾好睇的

    //並帶同廢噏親眼目睹孖狗被捕的過程,幫助廢噏解開心結,令他安心回家

    智叔呢段由恐懼至慢慢懷疑地解開心結亦做得好正

    //咁依家李 sir 啲性病醫返好未?

    哈哈!

    //阿雪不知是否回復了記憶,慌亂間奪門而出,胡亂衝出馬路給車墥到重傷:

    張家輝報警時壓抑情緒故作冷靜處理亦睇到人好心酸。基本上成套系張家輝都系木口木面的,但又感覺到系因為呢個角色系因為有心結不能釋懷...在辦公室過夜,突然一條友着跳舞鞋跳啲生硬舞步,感覺亦很唏噓

    另外魔兄你仲有段無講:李sir約細鬼去警察部租俾細鬼間公屋密會(應該是食屎大下面的南山邨),點知太平原來一直吊住細鬼,一露面就在門外,最終李sir使計避過識破亦很驚險

    唔知點解細黑近年做過咁多角色,我對呢個太平特別有印象!

    //要劫走250公斤黃金,又唔諗下咁重點拎。眾人連地點都要守密,但檯上卻有地圖,呢個劫案會議實在令人費解:

    黃金個重量我又真系無留意。其實佢講50kg就已經好合理了。

    個會議系要各人記住行事時自己企位,但應該該範圍有幾間金鋪,所以話巴閉刻意唔透露確實邊間亦講得通。

    呢段仲有一幕頗震撼:會議中其中一個柒青突然發難要重新傾過條件,巴閉一句“做低佢、你地分埋佢嗰份”,其餘各人就立即將發難者按在地上監生箍死...

    //這時阿弟發難黑吃黑要搶走巴閉的金條

    同阿弟串通的柒青系由同系呆胞的金剛飾演,唔知系咪刻意安排了

    //李 sir 這時來到,竟然唔用槍而跟柒青手下打爛仔交

    好多時睇到呢度情緒都帶起咗,都無留意李sir點解唔帶槍?

    //剛接到老婆死訊的李 sir,混混噩噩的拿了錢出發去茶果嶺。
    //李 sir 已因挪用公款(細鬼死了連線人費都慳返)被捕

    李sir攞錢去茶果嶺時已經挪用公款了,因為上司系話細鬼肯出庭先肯發錢的,但李sir認為要執行最初承諾(拉到巴閉就要俾錢),所以就私下由夾萬攞錢出來。

    //魔術師覺得港慘片寫人性矛盾真係有一手
    //其實港慘片有一類電影係特別耍家,甚至乎連荷李活都瞠乎其後的,就係以警匪片包裝講人性矛盾和黑暗面的電影(尤其是係 sad ending,道盡了「人生不如意事,十常八九」的無奈)

    我幾中意嗰幾年林超賢啲戲:《證人》、《線人》、《激戰》和《魔警》等,都系用比較簡單的劇情去寫人性。老實講呢一期都系港慘片最後一波,呢幾年又差過嗰幾年一皮了。

    《線人》基本上是《證人》原班底的,只是謝霆鋒就靠前者做最佳男主角,張家輝就靠後者...但以我喜好,我覺得兩人攞獎的電影應該倒返轉。

    //之但係,大方向寫得好,但小處的 bug 卻從來唔着意去修正

    近來睇你啲捉bug影評多,搞到自己睇戲都不期然捉bug起來:例如《拆彈專家》,成套戲的確節奏快夠刺激感情位亦豐富,但一睇完冷卻返就即刻覺得好多位好唔合理;甚至大受全世界好評、由被蝗民稱為“阿三劉華”的阿米爾·罕(Aamir Khan)主演的《Dangal》,我都從一個真正體育迷角度睇到好多不合理地方,大大減低被感染度...

    奇怪是《Dangal》而家在蝗國收過四億了,但仲未有傷港排期上的消息,計正呢啲咁正面既戲好啱傷民扮中慘的口味,唔通傷民真系咁睇唔起南亞裔?不過呢套戲我都推薦的,因為我想知究竟系我有問題定全世界大部份俾好評既人都唔知乜野叫專業體育...

    //7、80年代歌真係特別好 feel,歌靚詞靚,近年港慘片成日攞嚟做插曲,感染力當堂倍增

    所以你都embed埋呢段Youtube落去啦.

    我都好奇怪《春嬌救志明》點解要問凹凸匙隻《傳說》...老實講呢隻嘢在70後中亦不算大路,雖然凹凸匙嗰短短兩年代表小弟其中一段最美好的回憶(嚴格來說不是《傳說》,而系《沒有路人的都市》時期...)

    回覆刪除
    回覆
    1. //我反而覺得臨尾陳永仁識破劉建明系內鬼時竟然急急腳咁走唔合理,佢話晒都出生入死咁多年,都會唔扮傻仔攞返個身份先算?
      //近來睇你啲捉bug影評多,搞到自己睇戲都不期然捉bug起來:例如《拆彈專家》,成套戲的確節奏快夠刺激感情位亦豐富,但一睇完冷卻返就即刻覺得好多位好唔合理

      摩摩你就嚟好似我咁,會變 debug 怪!

      本來我鐘意睇碟嘅原因係鐘意睇伏線,可以翻來覆去唔明睇到明,但練下練下愈來心愈 attentive to details,伏線位好多時都可以預早捉到,副作用就變咗捉 bug。

      //你仲乜夾硬改人地老豆個名,佢叫“細鬼”系因為佢老豆叫“阿鬼”...

      因為諗起謝老四因為欠債所以幫霆鋒簽下片約...

      //我記得戲內有提過李sir情緒轉折的,不過近年少翻播,自己又少咗煲電影台,所以都幾模糊。

      係由李 sir 回憶,廖啟智同佢講個仔大學畢業之類的家庭開心事,話自己竟然會信警察,在李 sir 心中同佢平日教導下屬,話要跟線人保持距離的關係有 conflict。人地咁信你,依家李 sir 反而做咗二五仔,心中不免有鬼。

      //呢段追逐戰拍得幾好睇,尤其系細鬼發難衝block之後邊揸車邊戴手套抹軚盤然後背景響起“White Christmas”,好有黑色幽默feel.
      //呢段巴閉使計撇甩狗仔亦幾好睇的
      //智叔呢段由恐懼至慢慢懷疑地解開心結亦做得好正
      //張家輝報警時壓抑情緒故作冷靜處理亦睇到人好心酸。

      同感。雖然話係分枝劇情,基本上有同無呢啲小故事對整體劇情無影響,但都相當刺激和感人,甚至可以好似《樹大招風》咁俾新晉導演拍呢啲佔戲幾分鐘的 side story 當練習。

      //點知太平原來一直吊住細鬼,一露面就在門外,最終李sir使計避過識破亦很驚險

      呢個 side story 有 bug。以隔離阿婆的墥聾程度來說,點會咁精靈同李 sir配合到一齊做戲騙過太平?何況當時李 sir 仲要係爬窗過隔離屋,唔當佢係賊叫救命都算係咁。

      //黃金個重量我又真系無留意。其實佢講50kg就已經好合理了。

      任佢作的對白,偏偏都要寫啲 bug 出嚟,你話死唔死?

      //會議中其中一個柒青突然發難要重新傾過條件,巴閉一句“做低佢、你地分埋佢嗰份”,其餘各人就立即將發難者按在地上監生箍死...

      係,細鬼都有份勒死條柒青手下的。

      //同阿弟串通的柒青系由同系呆胞的金剛飾演

      劇情又無交帶點解阿弟可以說服到金剛(依家去咗CCTVB),可能大家都係呆胞?

      //我幾中意嗰幾年林超賢啲戲:《證人》、《線人》、《激戰》和《魔警》等

      哦,咁下次睇《證人》喇!

      //《線人》基本上是《證人》原班底的,只是謝霆鋒就靠前者做最佳男主角,張家輝就靠後者...但以我喜好,我覺得兩人攞獎的電影應該倒返轉。

      我都覺得張家輝表現好過霆鋒好多。

      //計正呢啲咁正面既戲好啱傷民扮中慘的口味,唔通傷民真系咁睇唔起南亞裔?

      可能見到南亞,傷民就中剷唔起來了,廢事人地將自己當成同南亞同一level嘛!

      //嚴格來說不是《傳說》,而系《沒有路人的都市》時期...

      我最鍾意是《人海中我是誰》,《沒有路人的都市》、《傳說》、《傾心》(為周慧敏度身訂造)、《別人的歌》都是第二。

      刪除
  7. 片尾《每當變幻時》呢種手法其實好 cliche。好似《半支煙》入面曾志偉都有類似一段。

    回覆刪除
  8. //港慘片寫人性矛盾真係有一手,可能傷民都係矛盾一族

    原來矛盾特色強到有正面作用..

    //佢又唔係壞腦,李 sir 係痛苦源頭,見面時係咪應該感到好唔自在?

    心理創傷太大果種失憶應該唔會唔自在..

    //阿導演覺得用個 pan ,開個爐就熔到, 好似牛油咁.

    XDDD

    //你仲乜夾硬改人地老豆個名,佢叫“細鬼”系因為佢老豆叫“阿鬼”...

    原來係改名,仲以為套戲真係用人屋企人名XDD

    呢啲咁heavy嘅戲我最多只能睇影評,謝魔&摩兄分享

    -Z

    回覆刪除
    回覆
    1. //呢啲咁heavy嘅戲我最多只能睇影評,謝魔&摩兄分享

      希望摩摩早日回歸喇.

      刪除