2017年12月25日 星期一

踢波唔跟操

這天冬至,包青天上司話到明佢自己今日開始放假,放到下年先返。以魔術師擔X唔偷食的性格,就算係做僱傭兵,都會照住合約時間返工(基本上包青天上司都容許有大約十五分鐘的誤差,呢個係不成文的共識),不過肥仔就唔係咁諗,遲咗成粒鐘先返到。
而最頂癮的就是,包青天上司雖然話打哂開口牌話放假,但都唔知係唔係工資奴病態發作,竟然依時晨咁早在公司內出現!魔術師準時返到當然無問題,但肥仔遲咗成個鐘,就真係當場臉色一變打個突:「包大人,你今日會返嚟嘅?」
***
是咁的,呢位肥仔僱傭兵同事一直都好想同魔術師做 friend,不過唔知點解佢竟然會期望魔術師手術後一個星期內返工咁無良(見《「出咗院未呀?」》)。就在魔術師出院那天,跛下跛下咁去了薯乜通出 iPhone X 的夜裡(見《跛咗都要出部 iPhone X》),便收到了以下信息
(可惡的 auto correct 將魔術師的 "How come" 改成了 "How one")

魔術師查看一下公司 project 的數個 WhatsApp group,果然見到肥仔已經自動 quit group;但乜唔係佢嘅合約到12月31日先到期咩?咁早 quit group 做咩?魔術師雖然想問,但既然肥仔都話 don't bother 魔術師返工的日子,又話拜山先講,咁魔術師亦懶得理佢無謂勉強佢,咁就慢慢先講喇!
***
返咗工兩個星期,根據同包青天上司加埋同肥仔 on and off 的 small talk,魔術師逐漸理順了個事實:
其實事情好簡單,就係本來包青天上司一向給肥仔的訊息是可以續約至下年年尾。但就在十一月尾,包青天上司召見了肥仔,「反轉豬肚」唔同佢續約;又數說了他一頓,仲「講咗好多好難聽的說話」,主要都係講肥仔粗心大意,做嘢打衝鋒但質素欠佳,包青天上司又「貴人事忙」,實在無咁多 luxury 來幫肥仔「對功課」,睇下佢有無做錯嘢做漏嘢云云。
魔術師都明白,身為上司,如果交帶下屬做嘢,但其質素參差,幫佢「對功課」又浪費自己時間,不如自己做;唔「對功課」呢?又怕就咁交上去,上頭發現有錯自己要孭鑊,精神壓力都會幾大。
聽完肥仔講,魔術師便弱弱的問了一下:「咁係包青天上司要你即時 quit group,定係你自己 quit 架?」
肥仔毫不覺得有問題:「係我自己 quit 的。」
魔術師奇怪地問道:「咁你張約始終都係到12月底先完,你依家 quit 咗 group,咁個 team 有乜事你咪唔知囉?」
肥仔的回應卻非常無厘頭:「但係包青天上司講咗好多難聽的說話...」
魔術師也不理他:「你我都係球迷,球員不獲球會續約係常見的事;但一日合約在身,你都要去跟操先得架?球員同教練拗氣唔練波,呢個係好唔專業的態度喎!」
肥仔的反應也頗快:「但係個 Whatsapp group 係用我私人電話,呢個唔係我 job duty 入面。」
魔術師見他賴皮,便廢事教精佢:「咁你都有你嘅道理嘅!我無辦法駁倒你。」
總結肥仔「問候」魔術師的語句、同包青天上司的爭拗、與及肥仔後來 hand over 給魔術師的工作,魔術師可以話肥仔係一個 都幾無 attention to details,discipline 又差,而且 EQ 都幾低的人(後來在冬至飯聚中,肥仔透露佢有因為工作壓力大,每天放工都會「啤一啤」的習慣,唔怪得30幾歲後生仔便有大肚腩)。
在職場上,除非你自己係老闆,無上司,又或者客戶亦無能力去知道你犯錯、又或者唔介意你有少少錯的話,做事可不能馬虎求其,attention to details 還是相當重要的。
另一方面,雖則大部份僱傭合約都唔會要求員工交出私人電話,但肥仔收得幾萬蚊一個月,又唔使打卡返工,無理由便要好似基層員工咁錙銖必較,反正你當初都肯俾個電話號碼出嚟,平時又肯「無償加班」,依家先至嚟話「合約無寫」、「按章工作」又未免將龍門搬得太遠。
魔術師咁講唔係「工資奴」症候群病發,而係當你還未曾完全「財務自由」,實在不能「無錢便是任性」;況且就算已經「財務自由」,但風水輪流轉,凡事留一線,給人一個好的印象總無衰的。肥仔本身工作質素已經係麻麻地,斤斤計較只會給人的印象更差;包青天上司在主觀感受,加上客觀上 budget 和 headcount 的限制,唔犧牲肥仔就有鬼了。
魔術師沒說的是,當年就係因為跟妹頭搞大龍鳳認識了電車部亞太區舵手,舵手覺得魔術師出了唔少私伙「私器公用」,令到大龍鳳某些部份出來的質素唔錯,所以認識了魔術師這個「員工」,到魔術師弄傷了腿,舵手也有 send message 問候一番。
雖然講真舵手就算認識魔術師,他都不會有甚麼助力幫到自己,但講來講去都係嗰句,風水輪流轉,人有三衰六旺,如果無乜嘢嘅,自己蝕底少少,俾個好印象人地又何妨呢?
***
伸延閱讀:
「出咗院未呀?」
跛咗都要出部 iPhone X

20 則留言:

  1. 「老奉」派。老奉一定續佢。

    回覆刪除
    回覆
    1. 哈哈,依家啲後生係老奉要人地去management佢地嘅expectation的.

      刪除
  2. 其實呢樣嘢唔關財務自由或工資奴事,係關乎專業與責任感。

    回覆刪除
    回覆
    1. 班財務自由/唔做工資奴派咁強調唔使睇老闆面色,我仲以為可以好無責任感咁做嘢添!

      刪除
    2. 財務自由嘅重點,係攞返選擇權。但唔等於做人可以無責任感。即使財務自由,但一旦你選擇繼續返工,就要有應有的態度,這是專業,也是對自己的尊重。

      刪除
    3. 哈哈,風兄説的是。我都只是在調侃那些為了「不受老闆氣」才念茲在茲要財自的人(乜sir嗰邊多的是)。

      所謂「受老闆(或上司)氣」,其實好多時只係自己工作質素差,態度唔好;要做事萬無一失,「工作壓力」就自然大(以我的心attention to derails, 幾時見過我話大壓力?)。

      呢種求其馬虎的人以為「財務自由」便可以「選擇」無責任感,當然是抓錯了重點。

      刪除
  3. 收幾皮一個月,但工作馬虎,無言
    Max

    回覆刪除
  4. 又使唔使group都quit埋…老闆對肥仔點"衰"都好,其他Team member無辜㗎喎,肥仔乜都唔理要其他人點執手尾呢。完全無團隊精神,麥記賣包都要啦!

    回覆刪除
    回覆
    1. //肥仔乜都唔理

      自動 Quit group 呢樣嘢我真係有啲不滿,工作態度實在太差.

      //麥記賣包都要啦!

      睇怕佢連麥記都做唔掂!

      刪除
    2. 唔少呢啲咁嘅人。佢要證明你炒佢炒得啱,炒得遲!XD XD

      刪除
    3. //佢要證明你炒佢炒得啱,炒得遲!

      「我不入地獄,誰入地獄」?

      刪除
  5. 唔跟操:

    http://view.inews.qq.com/a/20171225A0OSEX00

    回覆刪除
    回覆
    1. 我也曾經有一段時間幾睇好普度斯基, 可惜佢係拜仁過得不如意, 然後去了阿仙奴之後就一沉不起了.

      刪除
  6. 做咗咁多年,人工有幾萬蚊,但啲做嘢態度同手法同新仔差唔多,下下要幫你執手尾,點解仲要俾幾萬蚊請你?

    呢個肥仔IQ EQ都係好低喎

    回覆刪除
    回覆
    1. 所以佢正路係無得續約的,初頭上司話可以續約可能只是為了確保保headcount, 依家有其他新人入 team,肥仔自然就無行了。

      刪除
    2. 佢既語氣好似好驚訝自己無得續約,無得做落去既原因好似只係因為上司無啦啦唔妥佢咁...

      刪除
    3. 佢嘅態度係同香討班有青自嘆「懷才不遇」,埋怨俾班老 seafood 阻住無得升職咁。

      刪除
  7. 魚唔過塘唔肥是真的,朋友同事都無料扮四條無厘頭做到份與技能不相關的工,仲要因為工作年資較長高佢一級。不過風水輪流轉,佢同事最近錯漏百出,開始露底了。

    回覆刪除
    回覆
    1. 12月29日肥仔最後一日返工又有嘢講, 下個星期寫.

      //佢同事最近錯漏百出,開始露底了。

      實力呢啲嘢吹得一時呃唔到一世, 如果當事人人際關係又唔好的話, 俾人寫衰份 reference, 過唔到塘就要渴死了。

      刪除