2017年12月13日 星期三

高速元氣彈

屯門市中心的元氣彈壽司一向係魔術師的食堂之一,皆因貪佢唔使等位之餘,價錢唔算貴,味道亦算係咁,魔術師一人吃通常就係叫一湯四餸一甜品,六道菜色百零蚊落樓:
  • 三文魚湯/麵豉湯
  • 三色剌身
  • 手卷
  • 壽司/軍盤/炸物/芝麻八麻魚(兩款)
  • 泡芙
月前元氣彈壽司搬遷兼大裝潢,拚棄了不合時宜的迴轉壽司帶(反正都無乜客人會吃那些唔知擺咗幾耐的壽司),變成用電子菜單點菜,再由運輸帶將食物運到客人面前的「元氣彈高速店」。
結果,味道無乜變(反而所謂新菜單之一的釀蟹蓋真係好鬼難食),淨係條運輸帶已經夠惹來成班貪新鮮的港豬來排大隊!

這晚魔術師又在元氣彈吃「一人定食」期間,身邊來了兩條夜麻麻又在室內都仲要帶帽的柒青拖友。
為免條女俾魔術師望蝕,男柒青當然是坐在魔術師隔離。
男柒青坐定之後,魔術師就覺得佢有啲唔妥,講嘢有點「Roger 風」,拎住個電子菜單好似飲醉酒咁捉住妹妹仔侍應猛咁問...
「呢一 part 叫『高速限定』,係咪其他唔係『高速』的分店就無得供應架?」
「呢一 part叫 『期限限定』,咁個期限又去到幾時架?」
「呢個 『大滿足』可以有幾『滿足』架?」
魔術師相當好奇女柒青嘅面口係點嘅呢?
男柒青最後叫了清酒,女侍應好不容易才可以將之打發走。
「咦?唧唔出嘅?」
男柒青企圖用豉油「開」wasabi,但倒來倒去卻倒不出豉油。
魔術師怕了條友又怪叫,便冷冷的說:「你要撳個頂先唧得出架!」

「係咩?...又係喎!」男柒青竟然用一隻手拎住個豉油樽,又用另一隻手去按那樽頂的氣泵...天呀,乜唔係一隻手就用以搞頂嘅咩!
擾攘了一輪,柒青拖友要的食物沿運輸帶送來了。
女柒青從運輸帶中取出食物,將碟放在枱上開餐。
「嘟...嘟...嘟...嘟...」運輸帶上傳來聲響。
「咦?咩嘢聲嚟架?...唔好理佢嚕!!」女柒青又繼續大吃特吃。
運輸帶便停在二人面前,郁都唔郁,只是繼續在「響鬧」。
魔術師又開始頂佢地唔順,嘟嘟聲係叫佢地按掣將運輸帶退回廚房,以便廚房再上菜呀!
運輸帶停咗係度豈不是會阻住其他食客(當然包括魔術師)?
於是魔術師便對男柒青說:「取過食物你地要按掣,運輸帶才識得返去架?」
「係咩?係咩?」男女柒青不好意思地訕訕而笑。
唉,聽佢地的口音,都係笨土青年,你睇下人地其他食客點食法都知喇,做乜鬼依家啲新一袋年青人的行為咁奇怪架?

22 則留言:

  1. //為免條女俾魔術師望蝕,男柒青當然是坐在魔術師隔離。

    如果唔小心掂到條女(塊面),被人PO上網#metoo到時真喺要廁紙包頭出街啦。

    回覆刪除
    回覆
    1. //如果唔小心掂到條女(塊面),被人PO上網#metoo到時真喺要廁紙包頭出街啦。

      嘩,正喎呢條橋!

      刪除
  2. //身邊來了兩條夜麻麻又在室內都仲要帶帽的柒青拖友。//

    查實我都係室內都戴帽的柒頭 XD 皆因除咗帽個頭就會俾頂帽壓柒哂

    元氣質素都維持得唔錯,美心管理有道~
    我記得之前有間叫「元綠」壽司,而家好似消失咗咁?

    回覆刪除
    回覆
    1. //皆因除咗帽個頭就會俾頂帽壓柒哂

      咁真係雞先同蛋先的問題: 唔戴帽啲頭髮又點會被壓扁呢?

      //元氣質素都維持得唔錯

      算okay喇, 我始終唔係好食得慣板長...

      //元綠

      睇返都幾唏噓(以前屯門市中心都有元綠的):

      元綠壽司
      始創年份約於1991年由當時栢寧頓集團引入(當時為元祿壽司,到1996暑假改為元綠),第一間將迴轉壽司帶到香港的壽司店,第一間分店於沙田新城市廣場以碟碟10蚊作招來,由於當時未盛行日本菜生意一般,直至1995-96年與香港無線電視合作“超級無敵獎門人”遊戲節目,「辣辣壽司邊個食」將迴轉壽司變成潮流, 全盛時期有41間分店分佈於港、九、新界。後來更作多元化發展食迴轉壽司同時有爐端燒,卡拉ok非常創新,由於部份分店營業時間由上午11時至凌晨4時,於晚上到凌晨都人流不絕,中段時期更設立元綠咭供客人儲份換禮品,禮品中最吸引為自家推出壽司金飾(三文魚,蛋壽司造型足金耳環,手鏈)
      不過到1998年亞洲金融風暴之後,壽司店易手環球飲食集團(亦即英皇),由最初以成龍為代言人,壽司亦變為5種價錢,碟碟10蚊已成歷史;因為經濟下滑,店舖數量亦不停下降,到2000年壽司工場亦結束,2012年後只剩天水圍一間,並已在2016年2月底結業。

      刪除
    2. //咁真係雞先同蛋先的問題: 唔戴帽啲頭髮又點會被壓扁呢?
      戴帽係因為懶得搞個頭,戴咗可以遮醜,除咗就會醜上加醜 :)
      所以唔係有雞定有蛋先既問題XD

      刪除
    3. 頭髮都懶得搞,唔怪得我話自己燙衫做家務,蝗妹會話我「勤力」。XD

      刪除
  3. 呢個高速線, target其實係小朋友, 佢哋中意火車嘛.......

    回覆刪除
    回覆
    1. 咁啲小朋友第日大咗,會唔會變成膠鐵迷? 如果係的話,十幾二十年後將會是販民末日,到時都仲未到2047...

      刪除
    2. 日笨膠鐵....子彈火車嗰類.....

      販民就快同建制一齊摺埋......

      刪除
    3. 販民想唔認自己係蝗國人都唔得。

      刪除
  4. 咁快食生冷野?

    亞力士

    回覆刪除
    回覆
    1. 乜做完手術/骨折唔食得生冷嘢嘅咩?

      又,其實在元氣巧遇柒青,都已經係11月頭嘅事,只不過係依家先寫出嚟啫...

      刪除
    2. 手術後甚麼東西不能吃

      https://member.healthyd.com/space.php?uid=2390&do=blog&id=50307

      https://member.healthyd.com/space.php?uid=2390&do=blog&id=50333

      亞力士

      刪除
    3. 謝謝資訊。
      其實做完手術後一個多星期,吃醫院飯真是淡而無味,同時都無牛肉和蛋的,而家已經做完手術差不多一個月,應該不用戒口了吧(況且我做又不是內科手術)。

      另外,也不知是為什麼,那些嘔呀,敏感呀,身體發冷呀之類的徵狀,跟我是完全絕緣的。

      刪除
  5. 最鍾意睇魔兄描述班柒青, 簡直係繪聲繪影
    隔住個MON都聞到朕柒味

    回覆刪除
  6. 有片睇:柒青掃不盡,痴瘋吹又生
    https://www.facebook.com/hkgpaocom/videos/868951959976747/

    回覆刪除
    回覆
    1. 我覺得gpao啲藍C話佢匪類實在太抬舉,根本係"柒頭扮型".

      刪除
    2. 呢個組織叫「學生動L」, 但就連L都動不起來。

      刪除
  7. 屯門區得一個市中心,聚集自由行及本區居民,諸色人等乜都有,小弟都係屯門友:)

    回覆刪除
    回覆
    1. 呢度都有唔少讀者係屯門友 ^_^

      總係覺得屯門柒青特別多,應該僅次於MK XD

      刪除