2018年2月16日 星期五

港女嗒糖屋

見到女主持呢副姣炖炖嘅樣,好似好想用 pat pat 同戶主打招呼咁,水都出哂嚟,唔使問都知都戶主係乜嘢人喇(35:35—46:53)!
樓盤傳真 2018/01/27 2018/01/27 23:30

土瓜灣迷你則新盤津匯,收票屬一眾新盤之中最多,其實市建局在區內同類項目不少,今年起碼有四至五個盤,涉及逾三千伙,而且環繞明年通車的土瓜灣站。
回應觀眾要求搜尋租盤,目標是月租萬五以下的海景單位,地點不限,馬鞍山新港城兩房單位配套、租金皆符合願望,惟海景較遠,交通需花多點時間。
新世界清水灣傲瀧,為了遷就環境地形,有不少嶄新設計,露台有一截叫作溫室,設於走廊一邊的衣帽間,竟是開放式,拆解奇則背後原因。
業主是飛機師,搬進東涌方便工作之餘,假期喜歡留在家中看電影,也喜歡招呼一大班朋友,要求居所兼備娛樂功能。設計要善用五百六十七呎有限空間。
戶主一個人住500幾呎,鍾意睇戲聽歌(同魔術師一樣),又例牌喜歡招呼朋友吃喝玩樂(仲可以扑嘢@my place),要求唔算多,貌似黃凱芹的設計師又可以點搞呢?

一入門口,玄關鋪有地磚(左上),右手邊係鏡同鋪有軟墊的座位,方便戶主出門前著整理儀容同埋著鞋,座位下方是小鞋櫃,用來放戶主返工用的靴(右上),但會唔會發臭就不得而知。戶主返工放工在的拖喼就放在門口的大櫃之內,沿着玄關地磚拖拉就可以唔怕刮花木地板,呢個設計都幾啱大媽用(左中);櫃的上方有層架同掛勾供戶主放制服及返工裝備用(右中)。大櫃對出係吧枱,睇得見的吧椅只有兩張,其餘兩張係「隱藏式」,凳背仲可以放零食例如蝦條等(左下、右下):

客廳飯枱沿用白色條子設計,條子坑紋仲可以用來放冷氣機遙控噐(左上、右上);不過個遙控應該無乜用,因為已安裝了智能系統,用 app 都可以控制到冷氣(其實記者妹根本唔使用部 tablet 對住部冷氣,部 tablet 都唔識發出紅外線指令!左中)。天花有盒仔燈同埋燈槽滲光,仲有多層假天花用來收藏喇叭線(右中)。屋主用的似是5.1.6 ATMOS系統,喇叭用 MK Audio,算係識玩,不過音響櫃隔離的影碟櫃藏碟未免太少:

設計師將兩間房打通,中間以衣櫃間牆,成位一間大主人房連書房(左上、右上),再在廳以隱藏門分隔(左中上)。書房門係玻璃趟門(右中上),書枱面對山景,頗為開揚(左中下)。書房另一邊造了大櫃,淨係頂CX帽已經溝死女(右中下)。計埋吧椅、餐椅、同梳化都可以坐到10零人(行唔行得郁就另計),但可供客人留宿的反床只得一張,也不知是何用意(左下);但其實書房是在主人套房之內(仲用埋同一個套廁),訓得書房就不如同戶主大被同眠,整個窗簾都只係扮君子而已(右下):

主人房以藍灰色設計,加上地台儲物,增加收納空間,不過擺隻熊係到唔知為乜(可能游小三會鍾意,左上、右上)。個衣櫃唔係想像中咁大(左下)。唯一好啲嘅都係開揚山景,同埋床頭的 KEF EGG 無線喇叭(右下)!

設計師原來的雪櫃位拆去,擴大了廚房,卻縮小了套廁(左上、右上)。套廁馬桶用隱藏式,維修唔係咁易(左中);面盤水龍頭幾有型(右中);企缸地磚花紋幾得意,有3D效果(左下)。廚房無乜好講,得一個 shot,都係三尖八角唔係俾人用,轉個身都難:

戶主在去年3月買入本物業,作價600萬,裝潢費為56萬,約為樓價10%,唔算豪,而設計效果只屬一般,最突出的應該是給拖喼用的玄關地磚同埋個廁所:

***
伸延閱讀:
香港網絡大典:我kiss都和律師kiss啦!

20 則留言:

  1. 普通。
    魔術師,新年快樂!

    回覆刪除
    回覆
    1. 謝謝, 祝身體健康, 包包安泰!

      刪除
    2. //櫃的上方有層架同掛勾供戶主放制服
      //淨係頂CX帽已經溝死女

      男戶主唔喺揸巴士喺真.飛機師,可以玩埋制服誘惑。

      //戶主返工放工在的拖喼就放在門口的大櫃之內
      機C可能唔使點執喼,平常人每次出遠門前後始終都要拉番去房或廳執衫。不過大媽走完水貨亦都可以門口解決嘅。

      //凳背仲可以放零食例如蝦條

      真喺有兩大包...XD

      我又睇到梳化上有嗰叮噹

      **

      祝魔兄及網友新春大吉,身體健康!

      刪除
    3. //男戶主唔喺揸巴士喺真.飛機師,可以玩埋制服誘惑。

      花車巡遊啲CX空姐... 睇背影都有唔少似係大媽 -_-

      //大媽走完水貨亦都可以門口解決嘅。

      佢地可以踎係門口搞定.

      //真喺有兩大包...XD

      蝦條, 係唔使呃的...

      //梳化上有嗰叮噹

      真係隨意門,無處不在.

      //祝魔兄及網友新春大吉,身體健康!

      謝謝, 大家咁話!

      刪除
  2. 祝魔術師兄和所有網友萬事勝意、龍馬精神!

    回覆刪除
  3. 祝魔術師先生新春大吉,身體健康,諸事順遂!

    回覆刪除
    回覆
    1. 謝謝,好耐無見!

      大定咁話,最緊要都係身體健康。

      刪除
  4. 魔術師,

    祝你新年快樂, 事業不斷突破, 投資穩中有進, 身體健康.

    桑梓

    回覆刪除
    回覆
    1. 謝謝。去到咁上下年紀,都係祝人身體健康實際啲,哈哈!

      刪除
  5. 新年快樂
    有勞魔術師兄解籤.
    籤文是「頃畝之田歲月深,祖宗創積到於今;勸君勿論多和少,寸土原來一寸金。」
    「寸土原來一寸金」真的沒說錯.

    回覆刪除
    回覆
    1. 也祝QA兄新年快樂,身體健康.

      //有勞魔術師兄解籤.

      今年有錯籤事件, 已寫:

      https://magicianyang.blogspot.hk/2018/02/blog-post_17.html

      刪除
  6. 間屋嘅主色調我又幾鐘意,不過隻熊就真係敗筆,直頭好似多左個人住咁.

    祝魔兄身體健康!工作生活愉快!

    回覆刪除
    回覆
    1. 呢個設計C算係平實架喇. 不過我係唔鍾意吧枱設計同埋隻熊...

      祝無想兄新年進步, 身體健康.

      刪除
  7. //計埋吧椅、餐椅、同梳化都可以坐到10零人(行唔行得郁就另計),但可供客人留宿的反床只得一張,也不知是何用意/ 凳背仲可以放零食例如蝦條等

    魔術兄處處為機師將來既劇情埋下伏線XD

    回覆刪除
    回覆
    1. 反正這些機會不是屬於我的,就咁虛擬plan吓都得掛?

      刪除
  8. //訓得書房就不如同戶主大被同眠,整個窗簾都只係扮君子而已(右下)

    笑左10秒先打字祝魔術師心想事成,身體健康🤣

    回覆刪除
    回覆
    1. 謝謝,大家咁話!新年開懷好兆頭吖!

      刪除