天敵（六）之痾秩（內）

這天公司組內的蝗妹外勞M以蚊滋咁嘅聲量、囁嚅着走來魔術師個位：「魔術師，internal audit 有啲嘢話要同你講。」

蝗妹M雖然蠢蠢哋咁，但起碼可以幫手做啲手板眼見工夫，而且能操流利我城方言，溝通上無問題，唔使組員遷就佢講蝗話。

魔術師聽見「internal audit」兩個字就頭痛，呢班人幾乎係等於「麻煩」的化身，完全是「沒事找事做」的代表。

魔術師忍唔住輕輕拍了一吓枱，小妹妹嚇了一跳，戰戰兢兢地「帶」魔術師到辦公室另一角「見」internal audit。

「我哋依家發現你哋組有幾部測試用手機無裝防毒軟件，而根據公司最近更新嘅XXXXXXXX policy，testing devices 係需要安裝返防毒軟件嘅。有無問題？」四眼娘 internal auditor 以 poker face 問魔術師。

「當然可以。」公司規定嘛，魔術師梗係無問題；同時也真的很佩服四眼娘可以將公司電腦安全政策嘅全名機關槍式好似電話 cold call sales 咁一字不漏咁背誦出來。「咁你哋有無 guideline 叫我哋裝邊啲防毒軟件？」

「我哋係 audit，唔負責講俾你聽裝邊隻軟件，但我哋可以俾你 reference 返公司最新嘅XXXXXXXX policy...」

魔師心諗你唔使又將條 policy 全名再背一次出嚟㗎喎！「我知 audit 唔負責教我哋落手落腳裝防毒軟件，而係問有無安裝軟件嘅 guideline 俾我哋跟啫！」

「咁你要問 IT Security 嘞！」

學劉華話齋「今時今日咁嘅服務態度」真係唔得，不過魔術師呢幾年收咗火，平心靜氣再問：「好好好，我去問。請問有無 contact point?」

「你可以搵 XXX，佢負責出安裝防毒軟件 guideline...」

天呀，竟然有個名俾到魔術師，實在太「喜出望外」了。

在魔術師的認知中，Internal audit 不是一個「服務性」部門，而係「Popo」：即係佢哋只會抄你牌話你亂咁過馬路，但「阿 sir，呢度無斑馬線無紅綠燈無天橋無行人隧道，你叫我點樣先可以『正確地』過馬路呢？」

「你違法就係違法，我地係警察，就係負責抄你牌，唔負責管過路設施。你有投訴話唔夠過路設施就打 1823。」 

作為公務員，界線分得好清楚唔出奇；但私人企業大家都係同事，你要求別人做某些事，執齊一套 policy 同如何更正的 guideline 讓同事去跟好難咩？點解要問一句答一句，講啲唔講啲，要人打哂鑼逐個部門逐個組問呢？

而「我負責指出你嘅問題，但我唔負責指導你解決問題」的習性在 audit 就最「明顯」，魔術師做過幾間公司都係咁。唔知係咪怕一出錯俾人「賴」話「係XXX教我做，唔關我事㗎！」。

可能魔術師真係慣咗做「服務性部門」，即使指出對方唔可以咁做，都會教對方點做或主動講返俾對方聽點樣可以搵到正確的做法跟住嚟做，而唔會好似警察咁只係負責抄牌，唔負責解決方法。