《紮職（Triad）》：而偉霆卻不知道韮菜是如何收割的

又係一齣已經唔記得咗點解入 list 的巷慘片，但日前咁啱見到影碟鋪$59一隻 DVD 便掃入。又唔知係咪片源本來就不太高質，再經影碟機同 Amp upscale 到 4K 之後假作好多，質素有如電視電影一樣，放返落電腦睇又唔同咗：

＊＊＊

在黑社會頭目明哥的喪禮上，兩條二打六在討論「誰惡誰大誰正確」的「硬道理」，並帶出社團坐館敏哥（陳惠敏）、明哥頭馬子健（吳浩康飾）、明哥未亡人 Irene 姐（溫碧霞飾）、與及「字頭猛人」耀文（譚耀文飾）。 

時間回到 1997，阿霆（陳偉霆飾）母親在女人街的生果檔被收陀地，阿霆出面干預被黑大漢圍毆。阿霆朋友見狀，急 call 耀文哥前來幫忙。耀文來到，輕而易舉便打發了陀地九紋龍，又俾錢孝敬霆母，待人相當有義氣。阿霆話想跟耀文，入黑社會護母，耀文本不願意要阿霆這個有為青年行古惑，但經阿霆好友阿祥和阿棟遊說，結果都係收咗阿霆做𡃁，正式紋身燒黃紙入會。

阿霆三人組在閒談中提及，敏哥曾提議耀文領導油麻地地盤，但耀文卻只想留在果欄，於是油麻地話事人便由明哥接上。某夜，阿霆等人在有份「睇場」的 Disco 內慶生，阿棟遇上自稱被人落藥的阿怡（湯怡飾）。阿棟和阿祥找到懷疑落藥的有青，眾人初則口角繼而動武，阿祥更以啤酒樽爆了有青個頭。原來有青叫太子剛，係黑幫龍頭的二世祖，今之吃了虧便拖馬逼大哥文交人。耀文保住阿霆三人，放低水腳安排阿祥着草過灣灣，而耀文自己則獨闖龍潭跟對方龍頭講數，表明人就唔交，擺和頭酒就得，否則要打亦奉陪，但兩個幫派打起上來只會惹來 popo 冚檔，大家無運行。由於眾人都無求財唔係求氣，對方龍頭亦只好答應耀文哥的要求。

過咗幾年，阿棟同阿怡結咗婚，仲生埋仔，繼續幫大哥文打打殺殺；阿祥則在灣灣搵食，過了幾年終於返來；而阿霆則死了老母，大學畢了業。阿霆在負責睇場的酒吧遇上舊同學，獲引薦認識了老闆王波（盧海鵬飾）。王波要求阿霆幫手收數，阿霆一口答應，又獲得大哥文的支持，順利完成任務。跟阿霆有過幾面之緣的 Michelle(連詩雅飾)在酒吧裡得罪了 Irene 姐，被捉去懲罰。阿霆英雄救美，硬食了 Irene 姐跟班子健幾嘢。阿霆得知她是王波女兒，便在後巷跟 Michelle 拿取了「福利」。

Irene 姐跟耀文講起阿霆，原來二人是有舊情；亦是因為爭地盤時耀文害死了兄弟，所以「甚麼都不要，甚麼都不管」，反而由老表阿明接任，Irene 亦跟咗阿明。阿霆三人組轉型幫有錢人辦事，搵到第一桶金，而且開始建立自己的勢力。但阿霆雖然表面風光，出到去跟 Michelle 的朋友聚會，卻依然被人串係撈偏。阿霆被子健捉了去見明哥。阿霆被除淨條底褲，給明哥（林利飾）打了一身，原來係阿霆跟班有錢佬搵食，損害了明哥老闆的利益；好在 Michelle 通知了阿霆的首觸，由大哥文出面，講唔掂數便直接打倒明哥，把阿霆救回。阿霆自忖咁嘅衰相無面目面對 Michelle，先是發脾四自暴自棄，繼而發奮決心要做「最惡嗰個」。

阿明睇唔過眼敏哥連任三屆坐館，表明想搶敏哥的龍頭位，否則就轉投別個幫派，激怒一眾叔父。阿明叫頭馬子健攪亂自己堂口的夜經濟場地，眾叔父決定要剷除阿明，耀文自告奮勇出面搞定。耀文先勸 Irene 姐叫阿明收手，不果；又暗中叫阿霆三人放阿明一條生路；但阿霆對上次的屈辱懷恨在心，不惜違反「軍令」，公報私仇殺死了阿明。阿霆三人立了戰功，升職上位，於是就返回 2003 年電影開頭的片段。

阿霆呢位方丈好小氣。這天在街上遇到當年的陀地九紋龍正被追數，便叫人大打特打。Michelle 問阿怡會否介意阿東是黑社會，但阿怡說當初就已經知道老公是甚麼人，而且依定有車有樓有工人，也不能介意甚麼，最重要是老公愛回家；於是 Michelle 就跟阿霆和好了。2006 年，朗豪坊取締了砵蘭街(實際上朗豪坊在 2005 年落成)，阿霆認為舊式黑社會時代告終，現在就要由有青話事。有錢佬豪叔叫阿霆來傾生意，自己做幕後金主，阿霆就出面答理公司做畜牲地產收地收樓擺平各方勢力，然後上市 cap 水，阿霆則有 20% 股份。

敏哥做坐館的任期即將完結，下個月會由投票產生新坐館。Irene 姐推舉子健出來選，而阿霆就走去搵大哥文做推薦人，以免給子健做了坐館，文哥阿霆一黨就會被 Irene 姐針對；若果阿霆做了坐館，則大家悶聲發大財，齊齊洗白白。阿霆得到耀文支持，跟子健文攻武鬥，為爭坐館之位勢成水火。阿霆比較吃得開，形勢大好，Irene 姐決定買起阿霆。阿霆遭到伏擊，阿棟為救阿霆壯烈犧牲，留下孤兒寡婦。阿祥怪責阿霆當日殺死明哥、今日又要爭做坐館想跟班有錢佬食大茶飯，最終惹下仇口，害死阿棟，於是跟阿霆反面。

子健被 popo 周去問話，旗下夜經濟場所又被警方掃場，無啖好食，於是返去同 Irene 姐反面。王老闆跟 Michelle 打賭，如果她能成功勸阿霆退出黑社會，王老闆便將尾帝的生意交給他打理；否則 Michelle 自己就要去尾國。Michelle 連結婚戒指都買埋來求阿霆，但阿霆依然是眷戀權位，Michelle 無奈分手離去。選舉前夕，Irene 姐買兇要殺阿霆，耀文知阿祥知，但只有阿霆自己唔知。當阿霆仲懶得戚話要將子健送入監倉時，在耀文知阿祥嚴刑逼供下，某古惑仔終於爆出突襲阿霆的刀手所坐的車輛車牌。

阿祥正想親自出馬幹掉子健，卻見子健已被數名口罩男劈低。正當阿祥回去果欄跟文哥慶祝阿霆必勝之際，但此時阿霆卻去了哄 Michelle，話三年之後就退出江湖。就在 Michelle 跟阿霆和好之時，刀手前來在 Michelle 眼前斬死阿霆。阿霆出事的消息傳來，耀文和阿祥都十分震驚。原來係敏哥指使 Irene 姐出手「割韮菜」，兼且可以報仇剷除子健和阿霆，敏哥順利「冧莊」，班叔父便又袋袋平安了。最後，刀手就是電影開頭介紹人物的有青，夾硬來都算是「彩蛋」喇！

＊＊＊

本片就係《古惑仔》系列、《黑社會》系列的「雞精版」，90分鐘走過場乜都講啲，由阿霆自願入會到遇上紅顏知己再到同兄弟一齊打拼、遇上人生起跌，邊度跌倒邊度起翻身，然後撈到風山水起，最後曲終人散。所有劇情水過鴨背（神奇地黑社會入會儀式及切口卻做得煞有介事），無論兄弟反目定係情侶分手，前一分鐘反咗面，話咁快劇情過咗兩分鐘就和好了，真係唔話佢係雞精版都唔得。

另外，本片角色方面貌似有個講唔哂的世界觀，但有似是係思慮不周加上片長關係講啲唔講啲，多過刻意留白：例如耀文哥跟 Irene 姐以前的一段情，點解 Irene 姐會轉軚咁愛明哥？淨係因為耀文寧願屈在果欄毫無大志，而明哥則是「夠進取」、夠哂 Man？但在社團，太進取出位就會威脅到班叔父的利益，隨時死於非命，明哥、子健、阿霆就是好例子，Irene 姐又焉知道耀文哥的做法才是明哲保身之道？

魔術師本來都諗住耀文跟咗敏哥咗多年，之前又寧踎果欄俾明哥上位都話唔爭坐館，應該係睇穿坐館呢個位爭唔過；如是者竟然唔將敏哥「冧莊」的手段告知阿霆？睇劇情耀文同阿霆又真係有情有義，對阿霆嘅死十分錯愕婉惜，唔似係利用阿霆佢哋幾個。

抑或魔術師真係「諗多咗」，一眾角色上根本係腦殘，沒有好似魔術師咁諗法？例如阿明又唔係第一日出嚟行，要爭坐館同班叔父搞到咁僵，仲爆響口話要轉會，豈非自行申請「被追殺令」？阿霆同子健兩位「坐館候選人」，擺明容易受受伏擊，卻又經常落單，為乜？又，點解電影中的油尖旺的 popo 好似完全唔存在，阿霆眾人殺人可以無後果（叫嘅𡃁仔出來頂罪的情節都無）；反而電影開頭阿祥扑穿另一個字頭的太子爺爺要着草，咁搞法豈非明落 popo 面？

演員方面，魔術師真係唔知陳偉霆是誰，只見佢 gel 起個頭還有點似張智霖，咁就走去行古惑做高才生溝死女，未免太過無說服力。魔術師就寧願佢唱主題曲好過做男主了：

眾多演員之中，譚耀文依然係最有戲味嗰個，而溫碧霞就真係十年如一日，無端端成套戲都以性感裝束示人，但最尾一段竟出現「八字X」，實在令人倒胃。

最後，睇完先知原來《紮職2（Triad 2)》即將上映，魔術師唔覺意幫手賣咗廣告添！

魔術師評分：60分（基本）- 5分（溫碧霞）＝ 55分（100分滿分）

＊＊＊

伸延閱讀：

維基百科：朗豪坊