爽歪歪澳洲遊（2023年12月）（四）之開恩茲篇（下）

魔術師跟靚姐姐去旅行，「日夕相對」，總會傾下心事，當中自然包括愛情觀。話說靚姐姐係就係多人追，但奇人異士、心懷不軌、或者操控狂、「沙沙滾」者亦不在少數。今次去遊袋鼠國，靚姐姐亦有不少人叫佢「唔好去」...

魔術師明知故問：「點解？」

靚姐姐沒好氣：「佢哋妒忌你呀！」

好彩嗰班「狂蜂浪蝶」中應該無人識魔術師，否則就大鑊鳥！

Day 4

伴妳起錨

前一天由於原班機取消，要改道由悉尼飛墨爾本再飛開恩茲，到達時雖然已是夜晚，但吃過串燒做晚餐後，反而可以早點回酒店休息，養足精神。第二天早點起身，在酒店吃過早餐便出發去碼頭。

這天要去遊船河，加埋可能要落水，靚姐姐換上一身短打，水陸兩用緊身 bra top，仲要細半個碼，熱褲踢拖鞋，3D 身材盡顯陽光氣息，雖然出發時披了外套，依然睇到魔術師晨早就頭暈。

魔術師和靚姐姐出發去碼頭，雖說前一晚大媽司機兜過我們去過門口，畢竟夜麻麻有啲睇唔清路，都要搵咗陣問吓人才去到碼頭。行咗一輪熱焫焫，靚姐姐已經一身汗，要除衫以 bra top 示人了！

上到船之後到上層坐定，起程後不久 local tour 的工作人員就俾生死狀和健康申報表我哋填。

魔術師水性不佳，唔玩浮潛（snorkeling）了；靚姐姐雖然識游水，但都唔想潛水了，卻想玩「水底綿羊仔」：

可惜我們這個 trip 沒有「水底綿羊仔」，只有 Hemlet Diving：

於是魔術師便返回下層的 office desk 張羅，報名 hemlet diving...可惜又係額滿了！

偶遇小鮮肉

靚姐姐 bra top 魅力果然沒法擋，當魔術師從下層折返，赫然見到一條巷仔小鮮肉正在跟靚姐姐搭訕！

魔術師連忙坐返埋去，借故攬吓靚姐姐（其實咁多日來攬都攬過 N 次，靚姐姐樣靚身材正，仲有啲肉地，唔係網友想像的纖瘦版。），再同小鮮肉閒聊起來。

小鮮肉年約 30（再後來閒談證實無錯），原來係獨自來袋鼠國玩(水肺)潛水（scuba diving），想儲夠上潛水課的時數考牌。

說時遲那時快，這個 local tour 的工作人員便叫咪，話要潛水者都去聽 briefing，我們就跟小鮮肉暫別了。

魔術師懊惱地向靚姐姐報告完無得玩 hemlet diving，笑住捉住佢隻手摑了自己幾巴，「嚴懲」自己「辦事不力」（笑）。

之後船泊到海中心的一個中途站，想潛水的可以換水 wet suit；如果係廢老唔玩咁多嘢，亦可以在中途站坐玻璃底船及半潛艇去遠啲觀賞海底景緻...可惜由於日前大風雨，水底比較渾濁，看不到甚麼好東西：

魔術師和靚姐姐去完以上的「廢老船河」後，斷續跟暫時返回甲板休息的小鮮肉閒聊幾句，又怕他掛住潛水誤了食飯時間，便幫他留了飯（靚姐姐大讚魔術師心地好，也不知是喜是悲）。午飯時小鮮肉大談潛水經，搞到靚姐姐心郁郁都想玩陣浮潛。不過 before that，靚姐姐都係曬返陣太陽先：

（Nikon Z7 24-1=200mm f/4.0-6.3 @24mm f/6.3 1/800s ISO 100，當然有 crop 圖）

講到曬太陽當然會講到搽太陽油的笑話，靚姐姐就取笑魔術師個（咸濕）樣似足《精裝追女仔》的馮淬帆：

（網上圖片）

To snorkel or not to snorkel

爾後，小鮮肉又潛完一 round 回來，便問靚姐姐浮唔浮潛。魔術師見靚姐姐唔潛必定後悔，便鼓勵佢去潛。小鮮肉教了靚姐姐一些清空呼吸管的技巧，二人便落水去了。小鮮肉就潛落水底，靚姐姐則穿有救生衣，可以浮在水面，探頭到水底睇魚魚。而魔術師就在船些替靚姐姐拍照，其中一幅「上水相」，靚姐姐更 send 回去給伯母睇。

(靚姐姐上水照從略。）

無孔不入支付佬

到了下午，船要回程了。跟小鮮肉交換了聯絡方法便道別。魔術師和靚姐姐返回酒店，途中又經過夜市。靚姐姐話肚餓，便在 Night market 食越南河粉，想不到的是竟然可以以巷版支付佬俾錢（經 Alipay+ payment channel），都算係以往魔術師錯曾經參與過的。project。

玩了一整天，我們都倦了。食完飯返酒店梳洗休息，期待明天熱帶雨林之旅。

Day 5

做隻樹熊可愛迷人

這天的行程比較輕鬆，主菜就係去熱帶雨林乘水陸車遊一圈，睇「土著」表演掟茅狩獵、吹吓喇叭、載歌載舞等。

我哋都有得試吓掟回力鏢，魔術師就可以掟得比較遠（可惜唔識飛返轉頭），而靚姐姐就直接掟落地（可惜「事發突然」，拍唔切片）...

在熱帶雨林的最後重頭戲當然就係抱樹熊影相...當靚姐姐抱住樹熊在胸前的時候，魔術師都想做返隻樹熊呀！

(靚姐姐樹熊照從略。）

亞瑟頓高原

再然之後大媽司機就車返我哋去第一天因航班延誤而 miss 了的景點。在亞瑟頓高原的遊人接待處中遇上了這隻很可愛的動物（當然不是洋孩）：

靚姐姐攬住這毛茸茸的動物影了幾張相，但卻換來了一泡尿撒在風褸上。接待處中也有另外一些動物，例如抓得魔術師背脊好狠痛的鸚鵡：

（靚姐姐 iPhone 15 拍，有 crop 圖)

另外也有餵小袋鼠活動，但靚姐姐話佢哋搶嘢食的樣子很惡，不敢靠近：

咪當我窮撚

再之後大媽司機開始有的沒的介紹一些所謂「好靚」的景點，但可能各花入各眼，魔術師和靚姐姐都覺得不過爾爾：

（米拉米拉瀑布，Nikon Z7 24-1=200mm f/4.0-6.3 @24mm f/22 1/10s ISO 64）

再唔係大媽司機就帶我們去一些 cheap cheap 購物點閒逛，搞到靚姐姐問魔術師：「乜我哋好似窮撚咩？」

雖然呢段遊車河去景點的旅程比較無聊，但值得欣慰的是伯母打給靚姐姐問平安，靚姐姐話玩得好開心，魔術師安排得好好！

跟小鮮肉 say goodbye

與其漫無目的 kill time，倒不如叫大媽司機車我哋返回市內海濱 hea 吓飲杯嘢，再找一間靚餐廳吃晚飯。靚姐姐醒起之前小鮮肉都係和我們住同一區，我們明天便走，於是便留言叫埋小鮮肉食讓飯 say goodbye。

魔術師不禁失笑：「你同我都唔係窮撚，專挑埋啲貴價餐廳當然無問題，但小鮮肉來到會唔好意思的。」

靚姐姐恍然大悟：「係喎！我都無諗過人哋的感受添！」

魔術師和靚姐姐邊吃邊等。果然，小鮮肉在附近潛完水，和團友吃過飯，便來跟我們飲杯嘢，傾吓計。因為小鮮肉都係物理系的毒撚（不過係藍大畢業），同魔術師呢位「大師兄」都講得兩嘴，仲令靚姐姐明白到「請公司同事一齊去旅行，唔知點解佢哋都避開我」的「CEO 盲點」。

飲飽食醉，都係各自返酒店道別的時候。不過，靚姐姐卻留下了一個有趣的問題：

靚姐姐：嗰班淚員扮土著都扮得幾似。

魔&肉：吓！佢哋真真土著嚟㗎！

靚姐姐：點證明到佢哋係真土著呢？佢哋都識講英文！

＊＊＊

伸延閱讀：

爽歪歪澳洲遊（2023年12月）（三）之開恩茲篇（上）

爽歪歪澳洲遊（2023年12月）（五）之墨爾本篇（上）

SNORKELING、SKIN DIVING、FREEDIVING，有什麼分別？