話說魔術師在《港燦理財（十九）之北上消費有退稅》北上買眼鏡框再「享有」退稅之後，接續而來的就是搵日再次北上去羅湖口岸呢間網上/AI都有介紹的眼鏡店配鏡片：
搭電梯上去，同𨋢仲有對廢老夫婦、仲有金毛載住大耳仔耳機有青乙名，唔知算唔算係「唔記得自己是黃人」的一類人了。
上到去閒逛，因為是假日關係，都有唔少客人在試框配鏡。魔術師遊了一陣，見除了有非常廉宜的不知名眼鏡框（應該係套餐價專用），行入啲仲有「國際品牌區」，但當然就無魔術師戴開的卡地亞同 Lindberg 咁「國際」。睇咗一陣鏡框，跟住就去留意鏡片，見到枱頭竟然有本《聖經》...一神教典竟然在眼鏡店出現，實在不明所以。
說時遲 那時快，這時就有一名能操流利我城方言的中女服務員來招呼魔術師。
魔術師道明來意，係帶框配鏡，中女服務員便先安排初步替魔術師驗眼。呢一部份係另一名男子甲負責，同傷巷程序一樣都係用架機自動幫魔術師驗度數；魔術師亦不諱言自己除了有眼祝之外，仲有老花和散光，要配有漸進功能的鏡片；而且左眼試過有血管相疊導致血管增生，以致黃斑受損影響眼睛「自動對焦」功能，左眼的確實度數比較難驗。
果然，男子甲就話（都係操流利我城方言）：「你左眼嘅視力比較差喎。」
唔講都知喇。
初步驗完度數後，中女服務員叫魔術師坐一陣輪候；不過都唔使等好耐，就輪到魔術師去驗光室驗度數。
今次就係由男子乙處理。
個程序同傷巷又係差唔多，都係經關上燈黑房測試，通過架機睇英文字母、紅綠色等，夠 sharp 睇得清之後，然後就俾副「試鏡」魔術師試戴，再根據魔術師感受而換鏡片微調...
而最令魔術師感到驚訝的，就係第一次試戴的度數已是相當準繩；再微調一次就更好，這時男子乙給魔術師遞上《聖經》，原來是用來測試老花漸進鏡，望遠再望近，試吓睇細字的閱讀效果如何，果然「實踐就是檢驗真理的唯一標準」...
然之後就係中女服務噸帶魔術師去揀鏡片，魔術師就選蔡司 1.74 智銳系列，配埋 transition，公價過萬但係又打 35 折，即係5千幾人仔（兌返信用卡約 6,000 我城貨幣，相信傷巷應該做唔到呢個價）。中女服務員今次有個扣分位，就係無問魔術師個鏡片形狀（魔術師用的是無框鏡架）興及鏡邊是否需要拋光等，呢一點要魔術師提醒先識得做。
最後，中女服務員就帶魔術師去玩蔡司三維對焦，話佢哋間店係蔡司授權店，呢個係佢哋獨有的服務...放眼望去，都有好多唔知係咪來自我城的妹妹仔在玩呢架機：
另外自備鏡框是要簽生死狀的：
配完鏡之後，中女服務員就帶魔術師去拎嘢飲，又叫魔術師去試按摩椅，佢自己就去食飯...其實你去食飯咪去囉，關魔術師乜事，唔通驚魔術師有嘢要搵返佢呢個「RM」？
總結，魔術師對呢次北上配眼鏡的經驗都幾滿意，係唔知男子甲同男子乙的分工（內地好似係分驗光同視光？魔術師搞不清兩人的「專業資格」）；而且測度數奇快又準，魔術師在傷巷配眼鏡，來來回回都六、七次換鏡片試戴微調，感覺上我城好似「比較認真」，但點解內地兩次試戴就搞掂？傷巷是否做一啲「無用功」只係提供「情緒價值」，俾客人覺得專業啲、安心啲？
話都無咁快，眼鏡店今天(4月12日)就傳來話整好副鏡了，唔使一個星期就搞掂；不過收到短訊時都下午六點幾，都係要下星期才上去取鏡吧。
＊＊＊
伸延閱讀：
沒有留言:
張貼留言