港燦理財（十九）之北上消費有退稅

話說魔術師成日都睇唔順班「兩蚊人」好似放監咁成日走出街走周圍 wet，搞搞震無幫襯，生霸死霸公共或私人空間，但魔術師自己可能都臨近廢老年紀，數月前放工時在巴士上除下眼鏡打瞌睡，臨到站時才驚醒，趕住落車卻不慎把眼鏡遺漏在巴士上，搞到呢幾個月（包括同靚姐姐去旅行的日子）都要靠副後備眼鏡為生（明顯度數唔太準，欠缺散光同老花，睇唔清之下就連本 blog 的錯別宇都多咗）。捱吓捱吓嚟到三月中，又接近魔術師做年結的日子，便順便北上深圳打吓薄更新吓老父留下來間屋收了幾多租，兼撳些人仔出來螞蟻搬家拎返我城：

搞完一輪銀行嘢，諗起我城廢老喜歡北上消費，除了吃喝玩樂之外，就係睇牙同「配眼鏡」！於是魔術師便做了一陣 research，再信步去萬象城行一轉，順手買返副 Lindberg。呢啲名牌嘢，公價照計同傷巷無乜分別，但就諗住睇吓羅湖附近配鏡片係咪真係又平又爽：

出奇地，就在魔術師揀完付款的時候，一直以我城方言同魔術師溝通的店員哥哥竟然問魔術師是否巷客，原來仲可以退稅。手續就係要登記返姓名、return home card 號碼、可以收發短訊的內地手機號碼（好在魔術師有一卡兩號，唔知無內地手機號碼退唔退到稅），然後店員哥哥將貨品連同發票和退稅文件放入特製袋中封口，千叮萬囑叫走嘅時叫魔術師唔好拆開：

魔術師離去時才發現萬象城有大大隻宇寫住可以退稅：

退稅手續簡單，羅湖關口就係在出完大陸關口之後，在羅湖橋上有一間專責退稅的辦公室（一路上都有清晰指示，就連洋腸都可以找到），職員只需檢查過封口袋和文件、證件無誤，便可以用信用卡或支付佬即時收款退稅：

魔術師用支付佬收款，會自動由人仔兌回等城貨幣。不過，要 attention to details，就係退稅機構會扣除 2% 貨物金額的服務費：

睇返退稅單，魔術師就覺佢計錯數：

件貨 6,280，13%稅。逆向計算，before tax 件貨係 6,280/1.13 = 5,557.52；稅金 5,557.52 x 13% = 722.48 無錯，退稅應為 5,557 x 11% = 611.33，而唔係就咁以稅後價 6,280 x 11% = 690.80 去計。

當然，魔術師只係業餘，唔敢質疑國家的計算方法。如果用返退稅 690.80 來計算，減去 2% 貨物金額的服務費或 111.15（＝5557.52 x 2%）後，寶收 579.65（= 690.80 - 111.15），兌返我城貨幣 634.77，得出支付佬兌換率為 1.0951（＝ 634.77/579.65）。 

＊＊＊

伸延閱讀：

又再消費，帶動經濟