下流Band1

呢篇文的「下流」當然唔係講「卑鄙無恥下流賤格社會既人渣敗類拆白黨死飛仔」，而係對應「下流社會」的「下流意識」，即：
「身處『下流』社會的人，到處可見的百元商品店（註：指日圓）和超低價量販店，其實生活不虞匱乏，甚至還有DVD、電腦等家電娛樂設備。這群人與其說是經濟狀況差，不如說是人生態度的消極性。也就是說，『下流』指的是對於溝通能力、生活能力、工作積極性、學習積極性、消費積極性，乃至整個人生積極性都比較低的人。這樣的結果導致所得無法提升，未婚率較高，終日漫無目的的閒逛，散漫的生活著，並且自認為這有自己風格，生活比較輕鬆愜意。」
而Band1，自然係指魔術師做義工的那一間中學．


事緣上周末，係同學們presentation competition的日子，魔術師也就在此整理一下見聞和感想．
１．事前準備
魔術師本想拜託五師兄在比賽前一星期在他學校裡book個lecture theatre，再找多幾間學校做group rehersal，好讓大家亙相學習．可惜今年遇著復活節假期，學校休息，計劃只好告吹．
魔術師退而求其次，趁假日在辦公室book了一間房給同學們在魔術師面前試演．說真的，英語說得頗為流利，但很可惜，她們都只能對著稿講．魔術師要求她們可以背到或者記熟重點後自然表達，但佢地竟然嫌多！其實第一部份３個人講８分鐘，第二部份１個人講４分鐘，有幾多？兼且她們都只係讀稿，無同觀眾有眼神接觸，又無tone無感情，無gesture無refer powerpoint，魔術師要她們注意，但她們都似是當耳邊風．
2.臨場甩底
當日比賽分７個sessions，每個session有９間學校爭奪１個可以進入決賽的出線資格．但臨場，我們的那個session報了名的９組中竟有兩組缺席．因為呢個日子大會早已通知大家，魔術師唔相信會有兩組全部人都唔得閒，多數會是準備不足，內部有拗撓，又或者義工導師無法推動同學們（其實佢地唔去我地呢班義工都無辦法）．
臨陣脫逃，如在行軍打仗中，會是死罪．而這兩間學校的同學的質素如何，魔術師自然心中有數．而呢班年青人在呢個活動中學到乜野？不得而知．
3.大會編排
大會將每個session分成兩parts，並只準負責present的同學看足全場，如不是我們有份那一part，我們義工導師不能進入場地，結果我們不能幫同學們分析一下其他學校的優缺點．最令人氣憤的是，到我們可以入得，發現只坐了四份一至三份一人，既然如此多空位，為什麼不讓我們也可看足全場呢？
4.競爭對手
在我們那一part，魔術師只能看到兩間同組的競爭對手，分別是都是Band 1的女校和男校．
先說女校，５個人一字排開面對評判，可惜成排人，遮住了個screen，令評判和觀眾都看不到powerpoint．其中只有隊長個lOOK係有大將之風，其餘都唔見得好有信心．而且佢地唔用咪，group presentation最弊係聲線大小唔同，佢地就係除了隊長外，其他女仔都係蚊子咁既聲，真係唔知點解佢地用呢個方式去present．至於內容，so so，頗為一般，敘事多過分析，只有很少是提到遇到的問題和解決方法．
再說男校，他們將整個活動分phases，分別係蜜月期，下沉期，昏迷期和復活期．其中佢地帶出左好多遇到的問題，講左成６分幾鐘，但係點樣解決問題同如何「復活」，就只係略略帶過，變左無point．佢地的表達手法有創意，甚至有人扮consultancy firm做話劇．有個似是印巴裔的同學表現更是很放，拿著mic stand站出來，有點像許冠傑．不過，佢地有個同學成六尺高，同個mic既level唔夾，又唔調較，搞到要彎腰講野，真係唔係咁好，所以話，成班人出來，最好大家身材都差唔多．仲有係，竟然有人在presentation中要當場打呔扮角色做drama，魔術師又唔覺一早打好左出來有乜唔妥，結果做成interruption．
5.至於我地
我地班女仔就叻啦，podium在screen右邊，評判在screen左邊，佢地可以正眼望前，即係其他參賽者，一眼都唔望評判，完全無eye contact．大姐，見到個setting係咁，轉下身望評判都可以掛？仲要四個有三個都梗起塊面，執到金都唔識笑咁，可唔可以寬容ｄ，笑下得唔得？
果然，佢地只係企係度讀cue cards，果然無聽魔術師講唸熟講稿．頭dub dub咁以「流暢」既英語「講完份稿」便算．大姐，presentation同speech唔係一味快就得，要有節奏同停頓位觀眾先聽得明、消化得切，俾個powerpoint你去輔助解釋，但又無gesture去refer，結果你有你講，powerpoint還powerpoint行．至於內容，亦偏向負面，不過無法，佢地的確係唔團結，紀律差，又無乜改進．
其實，前面一組既女校同我地做既野差唔多，如果係醒既，可以搞下gag，出到去可以話人地同我地做既野差唔多，present可以慳返好多時間，咁可以輕鬆下氣氛．如果係魔術師出去，便一定會咁講，當時當地，就係我既舞台，自己就係主角，放ｄ又有何不可？不過對住呢班同學，呢個要求，未免太高．
之後呢，成班人閃哂，連男校既presentation都無睇．有兩個同學有事要趕時間魔術師理解，但係剩果兩個都唔聽埋落去就真係差ｄ．或者係怕左魔術師係散場後debriefing話佢地呢樣唔得果樣唔好掛？但係咁咪學唔到野law!
唉，學習積極性低，乃是呢班同學最大的弊病，亦是下流動能之一．
總而言之，我地呢班同學，academic都可以既，但係太拘謹，太循規蹈矩，唔識睇位執生，隨機應變．至於魔術師睇過既呢三間Band1，表現實在不算得上是很好．
鳴謝：畢典菲爾特提督ｏｎ下流社會
2007/04/16　11:54:40