讀番書大

我地呢班係港英政府教育制度下長大既一群人，讀既都係半吊子既番書，但係應該有個好處，就係中英文都有一定既基礎，唔係側埋一面．呢樣野，可能係人以群分，物以類聚既關係，同朋友間溝通上，人地唔明魔術師既用語（專有名詞除外）既機會較低，但係同同事講既時候，一ｄ好簡單既野，魔術師都估唔到對方會唔明．

最近一個例子，就係魔術師講左句成語「罄竹難書」，竟然兩個比魔術師年長兼高級既同事都話「深」，叫魔術師講野唔好咁「難明」，唔好話要佢講返呢句成語既背後意思出黎，點解會咁架？唔通七十惡女小珠渣估空姐ＣＭＣＫ鐵鎚側田小詩怒火大師沈三船山火鶴等等係少數民族？
另一方面，魔術師響ｄ照計係多年青人出沒既電腦，遊戲，同手機新聞組和討論區都會不時見到「睇唔明英文，可唔可以有中文解釋下」之類既問題，而其所謂睇唔明既英文只係教人點去安裝軟件，ｄ英文會有幾難？有時逢投資版都係咁，匯豐寄份表俾ｄ實貨股東填股息要錢定要股，又話睇唔明ｄ英文，睇黎母語教學真係有ｄ料到，港人既英語程度遲早可以同台灣看齊．
當然，作為中國人，理論上唔應該「唔識中文」，但係更令人討厭既係理所當然地唔識，即係一眾娛樂圈青年才俊如陳冠Ａ之流，大條道理好得戚咁去「唔識中文」，小朋友學之，有害無益．
係仲有人係比「理所當然地唔識中文」更乞人憎既，係明明可以用同埋有能力用中文表達，卻又要講英文，賣弄一番．佢地講既唔係我地一般英語夾雜既慣用語，例如ｐｒｅｓｅｎｔ（簡報）、ｌｉｆｔ（升降機）和ｅｍａｉｌ（電郵）之類，而係講出來會好突兀既「語言」：例如小朋友手多多去亂按電梯按鈕面板，港婦媽媽會話：「撈呀！」Ｎｏ就係Ｎｏ，成班中國人係架ｌｉｆｔ度，講英文扮中產咪算囉，但係又要加個「呀」字，中不中英不英，不知所謂之至．
以下有一段錄音，其中既港男港婦在九成以上既時間都能夠以廣府話表達出自己既意思，相信佢地既語言能力並無問題，但係偏偏又要響一ｄ非常突兀（即係ｏｄｄ）既位度講英文，認真乞人憎之至（其中以港婦情況最為嚴重）．
？？？
１．Ａｃｔｕａｌｌｙ，我記得係睇Ｔｉｔａｎｉｃｓ（點會有ｓ？）（港婦）
２．呢套ｍｏｖｉｅ（港男）
３．好ｔａｋｅ　ｃａｒｅ我（港婦）
４．佢（老公）都會ｓｈａｒｅ果個ｈｏｕｓｅｗｏｒｋ（港婦）
５．ｃｈｅｃｋ下佢地（仔女）ｄ　ｈｏｍｅｗｏｒｋ（港婦）
６．啱啱ｇｒａｄｕａｔｅ（港婦）
７．好大既ｓｕｒｐｒｉｓｅ（港婦）
８．佢都係咁ｃａｒｅ我（港婦）
９．我好嚴架，Ｍｏｎｄａｙ　ｔｏ　Ｆｒｉｄａｙ都規定佢地（仔女）唔可以開ｃｏｍｐｕｔｅｒ，唔可以玩電腦（咦，又唔係ｃｏｍｐｕｔｅｒ拿，港婦）
１０．放左學返黎第一件事係做左ｈｏｍｅｗｏｒｋ先（港婦）
１１．做完ｈｏｍｅｗｏｒｋ呢，就規定佢地每日要ｒｅａｄ一本ｂｏｏｋ囉（呢個真係想死，港婦）
１２．我同佢地玩一個ｇａｍｅ先（港婦）
１３．唔使擔心你對仔女無被冚，或者「副」被ｗｈａｔｅｖｅｒ（港婦）
１４．同我分ｄｏｗｎ（應該是「分擔」呀港婦）
１５．媽咪淨係識得叫我地寫字架咋，ｒｅａｄ　ｂｏｏｋ架咋（明明之前有講過「讀書」，港婦）
2007/09/28  02:01:38