猶有過之

不是老王賣瓜，魔術師組裡的機械人，比起綿花妹妹組裡的釣魚先生，實在有過之而無不及．
＊＊＊

小茶飯期間，成組全軍盡出咁濟，連來實習的大學二年生都不能幸免．而機械人，當然留在公司看門口．

當我們正在會場忙得不可開交之際，臨時辦公室的電話響起，學生Ｍ接聽，原來係機械人找學生Ｔ（實習學生是一個 pool of resources，Ｔ某程度上會向機械人匯報）．Ｔ剛巧不在，Ｍ便留了言叫Ｔ回覆．

Ｔ回來後，剛巧魔術師也在，便聽到了以下對話：

Ｔ：喂，請問有咩野事？

機：．．．（魔術師當然聽不到他說甚麼）

Ｔ：你試下ｂｏｏｔ機得唔得？

機：．．．

Ｔ：唔（想了一會），咁你可能要熄機ｒｅｓｅｔ．

機：．．．

Ｔ：你要長按個ｐｏｗｅｒ掣，按到佢熄機先得架喎！再唔係，咪拔掉插頭囉！

機：．．．

Ｔ：係呀，機身後面個插頭呀．．．

魔術師聽到呢度，真係幾乎暈低．

＊＊＊

某日，老細叫魔術師將某檔案上載到內聯網給同事們下載．魔術師便吩咐學生Ｔ執行．誰知學生Ｔ便去問機械人（機械人的工作之一是看顧部門網頁），機械人話唔可以，因為檔案太大，內聯網就黎無位，部門Ｂ話會導致內聯網唔穩定．魔術師覺得奇怪，便去問機械人：

魔術師：老細話以前試過咁樣上載架喎！

機械人：老細記錯啫！

魔術師：咁你有無問部門Ｂ，我地用左幾多硬碟空間，係咪真係爭呢個檔案既ｓｉｚｅ便會爆？

機械人：我無問，人地咁講我就信架啦！

魔術師：（試圖引導機械人去諗下點樣可以做得好ｄ）咁其實你會唔會同部門Ｂ了解下我地會被分配到幾多空間？而家用左幾多？會導致系統不穩定既ｔｈｒｅｓｈｏｌｄ係點？

機械人：我唔會同佢地計呢ｄ數架喎！

頂，真係問佢都多舊魚！

＊＊＊

這天，魔術師又將要代老細去開某會議．三個月前，魔術師都曾代老細去開同一個會，期間曾被人問及新版本內聯網網頁幾時會更新，當時魔術師敷衍說要跟老細商量；今次便預見到時必會被追問，於是今天便去問老細邊個負責緊，等魔術師可以去暸解下情況，老細答曰：「我俾左機械人睇，但係佢仲未有ｆｅｅｄｂａｃｋ．」

魔術師見到機械人便生氣，於是便趁今天和組員小組討論時，找個機會當著眾人面前去質機械人：

魔術師：咦，係喎，講開網頁，網頁更新好似係機械人你負責架喎，而家搞成點呀．我過幾日要代老細去開會，想知道個進度．

機械人：（無反應）．．．

魔術師：呀機械人，我講緊個網頁呀．．．

機械人：吓！吓！

魔術師：我想問你，個網頁而家整成點，準備幾時出？有無ｓｃｈｅｄｕｌｅ？我去同人開會，隨時會被人問，我都要暸解下個情況，心裡面有個底先得架！

機械人：其實而家要睇學生Ｔ．

魔術師：（有無搞錯，竟然將個波推俾個學生？）咁佢有乜問題？

機械人：學生Ｔ唔係好識更新個網頁，要俾ｄ時間佢研究．

魔術師：咁大約要幾耐？一個月？兩個月？人地響上個會話我地呢單野搞左成年都無乜結果喎！

機械人：ｅｒ．．．ｅｒ．．．

魔術師：其實部門Ｂ有無俾份ｍａｎｕａｌ我地跟住做？

機械人：有，但係寫得好差下．不如叫部門Ｂ搵人黎教學生Ｔ．

搞左一輪，機械人終於都有一個「建議」，但係睇黎，佢都係唔會主動去搵人幫手．魔術師便暗暗決定，先睇下份ｍａｎｕａｌ係咪真無咁難理解先，費事問人時俾人串．

於是魔術師便向老細匯報，話會跟進．最後加一句：「我諗都唔可以對機械人有咩野ｅｘｐｅｃｔａｔｉｏｎ架啦．」

老細竟然無奈地點頭．
＊＊＊

和同事談起機械人的行徑，有同事話唔能夠期望人人都咁醒，而且每個人都有佢既長處．我地要包容機械人，佢就係即使被質疑，都唔會有反思點樣去做先可以做好ｄ既思維，亦唔會覺得有需要咁做．我地要做既，係俾清楚既ｉｎｓｔｒｕｃｔｉｏｎ佢，當然唔可以俾佢遇到任何困難，因為無可能期望佢去想一個解決辦法出來，遇到問題，佢只會企係度，唔出聲．

魔術師覺得老細真係好好人，竟然可以容忍機械人咁多年．
2007/09/13  00:53:51