三訪東洋

東洋，唔係指日本，係指東洋山．
尋日(2 Sep 2007)，魔術師偕友人再一次行東洋山，是近年來的第三次．今次也和以往一樣，是友人參加了雷利行動，魔術師便一起陪行兼拖累之．

記得第一次行東洋山是在三年前既九月，果次係練習衛奕信徑第三至四段，由油塘行西到沙田坳，經西貢井欄樹，共１７公里．果次由於響油塘經將軍澳到井欄樹已經消耗左唔少體力，結果上到東洋山一半雙腿一齊抽筋，真係躝到上，結果到基維爾營後便要call的士返歸，未能完成全程．
衛徑第三段

衛徑第四段

第二次行東洋山，係同年十月正式活動．果時已經經過了兩次既練習，分別係衛徑第九段，淋住雨行八仙嶺；同衛徑第六至八段，由城門水塘至噩夢數千級樓梯既九龍坑山，其間有月餅紅酒賞月慶中秋，再到九龍坑山頂看日出，再在太和飲早茶，體能便有所增強．
結果當日做完義工，便去西貢滿記買甜品再到井欄樹良好士多前支援友伴，然後陪行．由於當日狀態頗佳，上東洋山並無難度，途中更用冰水（是的，魔術師背囊是經常有一支冰的）幫助了一位抽筋既行山友舒緩痛楚，該行山友話：「大會都唔知有無搞錯，呢條路都唔啱一般人行既，又唔講清楚！」
魔術師只好苦笑，想：「你有無搞錯至真，唔睇清楚就黎參加．」
該行山友既同伴更搞笑，問魔術師係咪基督徒，原因係「會幫助別人」．吓！？呢個係咩邏輯黎？難道世上只基督徒會幫助別人！？
其實果段路真係好辛苦下，魔術師行到上基維爾營，果真見到有白車在等候．
之後行行重行行，去到大埔公路重有友人當時男友而家老公車汽水蛋糕響checkpoint邊來替魔術師慶祝生日，真係感動到極．
之後又係行行重行行，直至城門水塘才退出．司機哥哥問魔術師由邊度行過黎，答曰：「西貢．」竟然嚇了司機一跳，其實友人行畢７８公里更是厲害呢！
魔術師呢次行了衛徑第四至六段，共２０．７公里，大約花了７小時．
衛徑第五段

衛徑第六、七段

衛徑第八段

衛徑第九段

今次行東洋山，反而無咩好講．中午十二點九係良好士多出發，淋住雨行到東洋山一半時腳踝暗暗坳了一下，大腿和小腿肌肉也開始酸痛，幸好友人馬菲鍾幫魔術師孭了一程背囊才可以平安完成第四段，到師子亭吃山水豆腐花．
之後第五段淨行引水道悶到發慌，好在可以跟友人傾傾講講才可以「飛快地」完成．到達大埔公路已經係六點，行左五個多小時，共１５．４公里．
2007/09/04　01:14:39