魔術師資產配置（２０１７年２月結）

每年２、３月期間都係港股公佈業績的旺季，不出所料匯豐控股（00005.HK）因成績差強人意而終於回落，拖累沉船基金亦有所下調；尤幸組合內的宏利金融（00945.HK）與及摩根亞洲股息（人民幣對沖-每月派息-現金）表現尚可，撐住沉船基金整體表現。尤其是係摩根亞洲股息（人民幣對沖-每月派息-現金），近月可謂賺息賺價，明明係有貨幣對沖（應該係怕亞洲股票以各國貨幣結算，如果人仔升而各國貨幣下跌則會導致匯價損失，所以「貨幣對沖」應該係買咗人仔升），在人仔下跌的大環境下應該無運行才對，不太可能「賺息賺價」，呢點暫時存疑，等魔術師有空時再作研究。沉船本月收報＄１２７.９６，依舊領放。
排第二嘅係複式盈富（$１１８.０６），足證呢類大藍籌指數基金的確是很難被擊倒的大山；第三位為生活基金（$１１５.４７）；第四位為房託組合（＄１１２.５０），暫時都係增長類跑嬴收息類。
合格線係以收息為主的債券及現金組合（包括類似債券表現的 HSEA/HSEB），收報＄１０６.１６，排第五；強積金組合一半環球債券一半係恆指，更仲有當資產配置若有 overshoot 便用來做微調，故表現落後，收＄１０４.７２，屬不合格。包尾的是商品組合，金價雖有反彈令組合不用再蝕錢，但仍跟合格線有一段距離，收報＄１００.９４。

二月份流動資產與自住樓估價都有上升，淨身家繼續上漲，由去年３月底４月頭開始已上升超過３成，報＄１３,０６５.３６：

自住樓佔條 bar 愈來愈長，再咁升法佔總資產值愈來愈多，隨時「被動地」會變成五成按揭：例如８００萬樓做６成按揭就俾３２０萬首期，借４８０萬，如果樓價升到９６０萬，或２０％，即時可以變成５成按揭，做個心安理得的收租仔。魔術師會唔會行呢條路？應該唔會，畢竟小業主收租其實有部分情況係等於同租客打工，燒盞燈膽都要扑倒去換，咁折墮都唔知為乜。