2017年6月1日 星期四

魔術師資產配置(2017年5月結)

話說魔術師初出茅廬之時,遇上同級的藍大港青港女同事,言必名牌西裝手袋化妝品高跟鞋「出艇」遊船河水上活動去旅行去到盡呢樣嗰樣,又晚晚去LKF飲嘢宜落,「在天神村出嚟」、住公屋家有兩老(好彩沒有一身學債)的魔術師實在是有 communication gap;加上那兩位港女同事在當時置地廣場地庫的惠康話「問阿爸阿媽借錢買樓都係想收租啫」,嗰副「無樓無高潮」的貪婪德性簡直就給從來沒有父幹的魔術師弱小的心靈造成不小的創傷,令魔術師從此敬港女而遠之。
魔術師為了「追上列車」,所以潛心修練經濟和投資,由BB班一路讀起,幾年後學有小成,下山初試牛刀(就係雙龍閃時期),仲想搵當年的港青港女同事較量一下。誰知魔術師這時竟然變成《九陰真經》作者黃裳,神功大成下山搵仇人復仇,點知山中方一日,世上已千年,仇人老的老死的死...而魔術師的「仇人」呢?卻是一一被金融風暴吞噬:當灝景灣變成浩劫灣,由去旅行去到盡變成死死地氣餐餐帶飯,當時魔術師只會覺得跟佢地講投資策點只會是對牛彈琴而已。
N年咁就過咗去,那些舊同事,離職的離職,被分手的被分手,港女要不吃洋腸、要不就是嫁人生仔做個好似博士K一樣的窮中剷怪獸嘉獎得閒上BB王國哂下命咁...
睇返今日,依家公司有不少後生男女同事都係帶飯,沒有當年會被恥笑的氛圍;反而魔術師日日身光頸靚,晚餐一個人等閒食百幾蚊飯卻被視為異類,實在是十年河東十年河西。要知道百幾蚊並不足夠去買那些來來去去三幅被、永遠滿足於BB班程度的「投資理財哲學」書籍(魔術師實在不明白點解可以日日都BB班書籍,永不升班都唔覺得悶),更遑論參加那些針對連市盈率(P/E)都唔識的港豬學生,由(無牌?)年青財進主辦的投資班,而其投資組合卻永遠不會好似魔術師咁以基金化去計算回報率以呈現不同時間點投入的資金的功效了。
***
本月各投資組合回報排序無大改變。排首位的依然是沉船基金($139.29),次席同樣係複式盈富($128.21),第三位仍是生活基金($122.21)。房託組合雖然仲係第四,但今個月已開始發力追上,收報$121.93,僅輸生活基金一個馬鼻。
作為合格線的現金與債劵類組合排第五,收報$112.60;強積金組合緊隨其後排第六,收報$111.44;包尾依然是聊勝於無的商品組合($102.47)。

淨資產值又再向上,比較特別的是本月流動資產的升幅較急,應是樓價(以大貓、小貓、與及蝗銀的網上估價平均數為準)稍為回落所致(畢竟金管局加辣再加辣之後,銀行估價的確無以前咁離譜地進取):

話說回來,魔術師身家在好幾個月前已開始大升,逢關破關;不過花無百日紅,好多嘢包括樓價始終都係賬面數,心理上開心下無傷大雅,但太過認真就無謂。無錯,如果賣咗層樓再重組投資組合,魔術師應該可以達成「基本財務自由」;不過魔術師都係辛苦命,一日有工作能力,一日都未至於咁快想退休住,你話係咪犯賤呢?

***
伸延閱讀:
計算投資組合回報
我是港男

16 則留言:

  1. 如果工作有滿足感,所需的時間又不是極多,有足夠空閒去做自己想做的事,繼續做都無可厚非既

    魔兄有無諗過假如唔做之後有咩搞作?

    回覆刪除
    回覆
    1. 而家份工基本上係一般,無話特別鍾意亦無特別唔鍾意,麻煩事總會有但都叫尚可接受;至於滿足感,我已經好多年沒有企圖或意圖從工作中找滿足感。畢竟傷港是個 sales 城市,你就算唔係從事前線銷售工作,但工作內涵或多或少都有 sell 嘢成份,你主要做口嘅嘢係 make you client/boss/colleague happy,而唔係 make them know what they should do and let them make their own decisions, bearing their own accountability。

      或者咁講,如果我真係「唔撈」,我可能先要搵下有無呢類「真.consultant」的工作。

      刪除
  2. //由去遊行去到盡變成死死地氣餐餐帶飯

    是否typo,應該是“遊埠”?如果系“遊行”,似乎“由死死地氣餐餐帶飯到去遊行”...

    另外講呢段往事篇嘢系乜?我好似以前睇過,但搵唔返...

    //嗰副「無樓無高潮」的貪婪德性簡直就給從來沒有父幹的魔術師弱小的心靈造成不小的創傷

    “新手司机和老司机的却别就在于 新手司机胎爆了只会打电话哭诉 而老司机早已经换上备胎上路”

    大家都變“老司機”了,哈哈

    回覆刪除
    回覆
    1. //是否typo,應該是“遊埠”?

      哈哈,係「旅行」至啱!

      //另外講呢段往事篇嘢系乜?

      我 on and off 都有回帶呢後的. 最初期就係呢一篇:

      https://magicianyang.blogspot.hk/2006/10/blog-post_58.html

      //大家都變“老司機”了,哈哈

      「老而彌堅」?

      刪除
  3. 魔兄呢篇點解好似有D感觸咁.其實好多人發奮圖強都係源於某些心靈創傷,小弟都係.

    //好多嘢包括樓價始終都係賬面數,心理上開心下無傷大雅,但太過認真就無謂。

    我層樓都升左唔少,開始時係有D開心,不過其實都冇乜用,反正都唔諗住賣了,驚買唔番.

    //https://magicianyang.blogspot.hk/2006/10/blog-post_58.html

    呢篇有實體化呢

    回覆刪除
    回覆
    1. //魔兄呢篇點解好似有D感觸咁

      係睇返最近有報導將海之戀同浩劫灣相比啫!

      //不過其實都冇乜用,反正都唔諗住賣了,驚買唔番.

      財自大師會教你加按 (當然負債大了, 就要假設自己人工隨通脹上升,唔會被分手先得).

      刪除
  4. //一日有工作能力,一日都未至於咁快想退休住

    我亦喺咁諗,就算真喺達到所謂嘅"財務自由",累積咗咁多年經驗人脈就咁退休我覺得好似好嘥。

    //我 on and off 都有回帶呢後的. 最初期就係呢一篇:

    https://magicianyang.blogspot.hk/2006/10/blog-post_58.html

    十幾年前歷史真悠久啊...當年留言嘅博客好似都靜晒了,十年後呢度又會如何呢

    回覆刪除
    回覆
    1. //累積咗咁多年經驗人脈就咁退休我覺得好似好嘥。

      所以我依家都有考慮裸辭,睇下搵唔搵到其他唔同的工種試下.

      //當年留言嘅博客好似都靜晒了,十年後呢度又會如何呢

      去年今日此門中,人面桃花相映紅;人面不知何處去,桃花依舊笑春風.

      忽然好掛住DY, SONY, AK47, 亞力士 佢地...

      刪除
    2. //忽然好掛住DY, SONY, AK47, 亞力士 佢地...

      我相信好多都睇緊的,至少是不定期追看.

      一直以來,呢度留言最熱鬧一定是牽涉黃C/笨土法西斯言論的文章,其次是對飯民自以為是作風的評論,但唔知係咪應驗車公去年中簽同今年上簽,前者已經對外收皮(雖然一定維持圍爐自嗨,但自嗨之餘亦會狗咬狗),鼎爺膠行本來俾飯民食住上,但雞娼唔知所進退反而被賤仔成功轉移焦點(呢樣又唔怪得早輪689開足火力), 笨土們更對成件事not give a shit而只自顧鬧交... 魔兄新聞雜評講佢地都少好多,更應驗no news is good news的真理...

      "最受歡迎題材"無咗,大家自然少出沒啦,就連我呢個客席主持都少咗留言.

      刪除
    3. //呢度留言最熱鬧一定是牽涉黃C/笨土法西斯言論的文章,其次是對飯民自以為是作風的評論
      //魔兄新聞雜評講佢地都少好多,更應驗no news is good news的真理...

      咁又係,我都唔想呢度變網上版城市亂彈. 依家寫返多啲其他嘢, 講下投資理財呀, 工作呀, 見聞呀, 影評呀咁, *(當然唔少得不定期刊出塞內設計與及原創故事)...雖然點擊率比較少,但卻是另外的一返滋味

      //"最受歡迎題材"無咗,大家自然少出沒啦,就連我呢個客席主持都少咗留言.

      每一日都要有「最受歡迎題材」,咁呢啲叫稿匠了, 你估我係19陶藝才子咩!

      刪除
    4. //更應驗no news is good news的真理

      等777 1.7.17 上任就有㗎啦..

      //依家寫返多啲其他嘢

      仲有博士K同埋舅父表弟們

      //每一日都要有「最受歡迎題材」,咁呢啲叫稿匠了

      因住俾「匿名」又話選擇性講啲唔講啲喎 XD

      刪除
    5. //等777 1.7.17 上任就有㗎啦..

      聽日應該有話題...

      //仲有博士K同埋舅父表弟們

      佢地都幾好笑架!

      //因住俾「匿名」又話選擇性講啲唔講啲喎 XD

      佢自己應該周身唔得閒...

      刪除
    6. 其實我仲係度,繼續爬文觀看

      刪除
  5. 謝謝魔術師兄掛念:)

    //我相信好多都睇緊的,至少是不定期追看.

    正是

    回覆刪除