這是一個古怪的夢。
魔術師夢見了死去了十幾年的母親。
夢見母親不奇怪，奇怪在老媽竟然識上網。
仲知道魔術師的銀行戶口密碼（老媽無理由識用 Interactive Brokers，因此唔係登入咗大貓就係美帝銀行）。
然後沽咗魔術師一百萬貨。
魔術師卻懵然不知。
直班老媽興高采烈地對魔術師說：「我幫你買咗層樓！只係俾咗一百萬！」
魔術師跟老媽子上現場視察，原來單位是低層單位，面向內園，坐擁園林泳池景緻。
魔術師大驚，走去查找點解會有如此荀盤...
赫然發現呢間係凶宅！
住屯門的戶主在港島區自殺身亡！
魔術師馬上拉阿媽去找地產代理理論，「大辯論」一輪之後，果然發現佢係誤導老媽！
魔術師正欲踢契...
然後，便沒有然後了。
＊＊＊
一覺醒來，夢境記憶猶新，連忙將其記下。睇返福山堂之周公解夢，原來大部份都吉兆，只係有一項係同人霎氣（係公司都幾多呢類周圍搵交嗌的無聊人）：
見到先人：見先亡尊親大吉
買賣股票：拾得錢物皆大吉
夢見買樓：屋宅更新主大吉
夢見內園：庭前竹木喜重重
買到凶宅：搬移破屋得美妻
母親被騙：被人作賤者大吉
跟地代理論：與人互罵者主吉，與惡人言有口舌
企圖踢契：入官詞訟主大吉
得美妻，恭喜恭喜
回覆刪除倫
哈哈, 美妻=美藉妻 都得架! 死喇, 前幾日偽ABC港女真係用pat pat 同我打招呼添!
刪除得美妻，恭喜恭喜 X2
回覆刪除//一覺醒來，夢境記憶猶新，連忙將其記下。
我床頭有筆記簿記錄發過啲咩嘢夢，有時睇番都幾有趣。
綺夢通常都會唔記得.
刪除撇開玄學論調，夢可以視為“潛意識”向“顯意識”（理性思維，or aka 大腦皮層，亦即是大腦外側的“皺紋”）發送訊息或啟示。由於潛意識（大腦皮層以外的神經系統）主管本能及情緒而毫無邏輯可言，所以夢境亦通常無乜邏輯。
回覆刪除而由於大腦皮層是在神經系統進化中最後出現，亦只佔神經系統的小部分，所以雖然功能最高級，但其實主導性很弱；潛意識雖然無邏輯，但processing power反而很強大。顯意識經過理性學習分析資訊後，要正式寫進潛意識先算“內化”完成--聽起嚟好似好玄，但最簡單的例子就系：綁鞋帶。你可以綁鞋帶時唔使諗步驟仲可以諗住其他嘢，就系因為潛意識幫你完成綁鞋帶的動作。
撇開潛意識能否預知未來，但gut feeling及靈感之類，其實就是顯意識不停接受及分析資訊再向潛意識輸出，然後潛意識background process的結果；而由於潛意識的長期記憶及multitasking能力比顯意識強大得多，所以當事人往往對靈感及gut feeling知其然不知其所以然。但實情是潛意識利用了來自顯意識長時間分析的資訊而成，背後邏輯已埋藏在平時的分析及學習中（潛意識沒有自創邏輯的能力，處理資訊的邏輯仍要由顯意識輸入），只是當時人一時搵唔返而已。
有時靈感及gut feeling會以夢的形式向顯意識輸出，但其實夢的另一種資訊是潛意識的深層情緒反應，告訴顯意識現在情緒最在意什麼東西--小弟從夢中得到靈感的經歷好少，但較不快系間唔中會有啲遠至讀書時但已不為意好耐既恐懼，會在夢中以近來的生活方式表露出來--可能正是小弟有啲自小既心結，從來無正式解開過 :(
潛意識系咪真系可以預知未來人言人殊，但一類好多人都證實有既經歷就好大機會系潛意識既結果：例如坐長途車訓著一定會在到站前就醒、或第二朝有重大事情時無鬧鐘都可以準時起身。
東拉西扯一大堆，希望幫到魔兄解夢 XD
//由於潛意識（大腦皮層以外的神經系統）主管本能及情緒而毫無邏輯可言，所以夢境亦通常無乜邏輯。
刪除原來如此, 展知識了.
//可以綁鞋帶時唔使諗步驟仲可以諗住其他嘢，就系因為潛意識幫你完成綁鞋帶的動作。
有啲人成日懶係嘢咁一面同人傾計一面揸車, 其實我唔係咁信駕駛時可以隨意分心.
//當事人往往對靈感及gut feeling知其然不知其所以然。但實情是潛意識利用了來自顯意識長時間分析的資訊而成，背後邏輯已埋藏在平時的分析及學習中（潛意識沒有自創邏輯的能力，處理資訊的邏輯仍要由顯意識輸入），只是當時人一時搵唔返而已。
老媽子放哂我啲 HSEA HSEB，結果今日真係贖回呀！
／／可能正是小弟有啲自小既心結，從來無正式解開過
割包皮與靚護士？？ XD
//一類好多人都證實有既經歷就好大機會系潛意識既結果
係, 同自己講咗話要起身, 便真係會起身.
//老媽子放哂我啲 HSEA HSEB，結果今日真係贖回呀！
刪除應該係你平時接收到既資訊，background process已經有被贖回的預測。
我有個一世都記得既夢: 讀書時發夢話有兩隻馬跑頭兩名，結果我就買佢地連贏位，點知結果佢地真係頭兩名但我無錢收--因為佢地平頭第二 %$@!*~¿
//割包皮與靚護士？？
撇開啲較私密既恐懼，近年我偶爾會發夢夢到考試讀唔切書--但我夢中既身份就是我而家既身份，仲要打緊而家份工，而我已經無讀任何part time course好多年...更玄既係，夢中既恐懼感受同我讀書嗰陣遇到相同情況時完全無分別...
//大壮 最新翻唱迪克牛仔经典歌曲《梦醒时分》
呢首歌我始終中意最原始的文青版本
https://youtu.be/nku5zFMZAdU
當年的寶島才是真正的good old days.
//應該係你平時接收到既資訊，background process已經有被贖回的預測。
刪除哈哈, 應該都有可能 XD
//因為佢地平頭第二 %$@!*~¿
真係要講粗口!
//夢中既恐懼感受同我讀書嗰陣遇到相同情況時完全無分別...
摩摩應該係考試成績並唔能夠映真正能力嗰類人?
//當年的寶島才是真正的good old days.
短髮台妹, 又真係另有一番韻味...
最近我都有發考試夢. 不過唔係讀唔切書, 係連考試時間都唔記得咗. 忽然發覺要考試,一路係咁沖返屋企拎計數機 (唔好問我點解拎計數機, 因為我都唔知點解要考, 同埋考乜) 個計數機仲要無電
回覆刪除點知, 去到試場, 發覺自己連筆都唔記得拎, 又唔知自己坐邊, 好明顯無拎考試證. 最後點? 憑記憶, 諗住自己應該坐係邊個同學前面, 就咁坐咗去嗰個位度.
跟住點.....醒咗.
//個計數機仲要無電
刪除//自己連筆都唔記得拎, 又唔知自己坐邊, 好明顯無拎考試證
哇，簡直係公開試的童年陰影呀！