《人民英雄（People's Hero）》：天下有青一樣柒

最近我城各大片商都好似幾有興趣將舊片再發行，真係一眾影迷嘅福音。好似本片咁，係爾冬陞執導的第2部作品，仲有狄龍、偉仔、梁家輝、金燕玲等演出，認真有睇頭！

＊＊＊
星期六中午，荃灣的一間銀行分行內，聚了各式人等：似是有私幫要問人借錢周轉的銀行經理、有逼債仔還錢的財仔（今時今日銀行水浸，問銀行借一定唔會逼人封鋪，最多只會搞傾務重組）、有面臨感情問題的男（林保怡飾）女職員、有掛住炒金的Ｃ９及其學生妹阿囡、大大聲鬧銀行職員的老粗古惑佬、仲有一對富貴呆灣夫婦。

這時，兩名有青阿細（梁朝偉飾）與奀仔鬼鬼祟祟地走進銀行，企圖行劫，誰知奀仔卻因為太過緊張，羊癎症發作。阿細待奀仔稍為好轉，便想取消計劃，但離去時裝着手槍的紙袋破了，手槍跌了出來。銀行的持槍印巴藉警衛正欲開槍，卻給阿細及時拾回手槍擊傷。奀仔仲驚過銀行內的職員和顧客，無法搶劫；阿細於是便跳過櫃檯，打開錢箱...結果「昔日阿細，今日暴青」，阿細同樣也被顏色粉末噴了一臉：

這時警鐘響起，一眾黑警趕到，封鎖了正門和後門。太陽底下無新事，阿細和奀仔就如今日保你大中的黑暴青一樣被 PoPo 圍困，唔知點算好，而銀行經理就如校長一樣話會跟匪徒合作，然後就係有青內訌，阿細跟奀仔亙相埋怨。

警方談判專家打電話來，輕易便從阿細口中套取了銀行內的情況。原來奀仔還未成年，就像今日保你大的黑暴青一樣，刑責有限。阿細跟黑暴青一樣，不怕被拘捕，只怕被毒打；談判專家便安撫阿細，又騙他只會判刑兩三年。看來黑警的形象真係數十年如一日：

原來銀行中被脅持的顧客中也包括了十大通緝犯之一的古向陽（狄龍飾）。古向陽見阿細想投降，便祭出密林手槍反客為主，控制了場面，並將即時騰哂雞的阿細打倒在地，關了起來。古向陽向警方報上身份，指名要叫重案組小隊長陳 sir（梁家輝飾）來。古向陽向陳 sir 要一部貨 van 逃走，又表露出其實自己也是想來打劫搵水腳着草：

在等待期間，古向陽充當義務急救員（！），幫警衛包紮好傷勢；又容許人質上洗手間，打電話等，似乎唔會傷害無辜。不過，根據是是旦旦的無線新聞報導，古向陽是殺警悍匪，眾 PoPo 搞過「報仇大會」，誓要緝拿古向陽：

重案組張 sir（秦沛飾）來到，想不顧人質死活，強攻入保你大銀行，但被陳 sir 勸阻，答應提供車輛。古向陽要求在人質找個司機，古惑佬借詞推搪，卻被向陽踢爆，十分樣衰。這時阿細自告奮勇，話自己可以當司機，理由跟黑暴青一樣，自己罪名不輕，唯有繼續抗爭，一齊逃走，反而俾古向陽串：

古惑佬又煙又火機，想擦古向陽鞋，點知卻差點燒了古的眼眉。古跟銀行職員講開感情事，原來數十年前做銀行的也不一定有錢結婚。講講吓，又講到當年我城市面有幾百枝槍「流通」，仲有槍租添，唔怪得黑暴青咁想回到以前的日子。這時，古向陽忽然想起正在坐牢的女友阿萍，便打給陳 sir 要求放人 - 原來阿萍係因為給黑警在手袋內找到古向陽的槍和子彈，於是便被判監５年：

古向陽問阿細，枝槍是如何得來的。原來阿細以前做過拆船，槍是在船艙找到。阿細早前問貴利借了５,０００元入了批假錶到廟街，不料給黑警冚檔充公了，血本無歸，逼住要打劫銀行連本帶利還３０,０００元俾貴利。古向陽充當人生教練點醒阿細，無理由為了三萬元走去打劫銀行；你有槍，貴利來斬你你便開槍射他。阿細登時醒悟，打電話給貴利講數，貴利果然話「萬事有商量」。「誰大誰惡誰正確」，果然是千古不變的真理：

銀行內眾人怕古向陽會殺人，脅逼警方釋放義士阿萍。古向陽重申只係靠嚇，他殺的只是黑警，是在打劫金行時被警方追捕，雙方駁火，古射死了警員。當然，古係認為 PoPo 窮追不捨，是 PoPo 的錯，自己都唔想殺警的。

巴藉警衛（古向陽誤以為是印度藸）被銀行經理欺負，古向陽幫弱勢社群解圍，盡顯公義。警衛想在銀行打工，用儲蓄去開咖哩檔，賺夠錢便回鄉，但卻擔心１９９７，殺人政權收回我城。殺人政權真係恐怖到連巴人都驚咗佢地。古向陽見警衛如此無助，便簽發義務援助基金，塞了一舊錢（賊贓）給警衛去達成夢想：

古向陽從銀行門口的ＣＣＴＶ見到黑警想炸門，便靠嚇話將人質綁在門口，要黑警撤去炸藥；古更鳴槍一響，假意殺死人質，逼令黑警釋放阿萍。張 sir 在這時才發覺忘了拆掉銀行門口的ＣＣＴＶ，真係比黑暴青蠢得多：

呆灣富商受了驚嚇，心臟病發；古向陽又化身義務急救員將他救醒。眾人於是又怪黑警無良心，草菅人命，成班都係人渣（對白係咪似曾相識？）：

古向陽想要殺死一個人質，於是便冷血地叫眾人質玩荷媽決出誰是犧牲者。眾人在恐懼下猜拳，最後就是由學生妹「勝出」。學生妹發揮港女本色，大罵老媽掛住炒金在銀行留連，累死女兒，仲大罵老母街。古向陽見有如此不孝女兒，勃然大怒，出聲斥責，仲問「你讀咩嘢書？邊間學校？」老媽子這時挺身而出，話阿囡都只是「小孩子」，唔識嘢，話自己係廢老，願意為女兒擋子彈（呢段係咪又係似曾相識呢？）：

古向陽愈睇條囡愈唔順眼，繼續「幫人教女」。炒金大媽發揮怪獸家長本色，出來護短；古向陽話咁教女法，阿囡遲早變天使。炒金大媽大暴走，拚死怒罵古向陽，學生妹又大哭起來，古向陽頂唔順兩母女要生要死，便索性 reset game 再猜過。古惑佬唔順氣出來抗爭，反被古向陽捉住要斃了他：

千鈞一髮之間，陳 sir 將阿萍（金燕玲飾）帶來，但阿萍已不再勇武，唔想再坐牢，拒絕跟古向陽離去。古向陽挾了人質上 van 仔，跟阿萍當面對質，話自己要帶阿萍走，都係唔想佢坐監啫；但阿萍原來已厭倦了亡命天涯，擔驚受怕的生活，反而唔介意坐監，唔使古向陽幫自己爭取，要走古自己走好了。這時阿細也明白到逃亡不是辦法，寧願自首，換來了古向陽的一句「叻仔」。至此，古向陽萬念俱灰，走出車門向天鳴槍，引飛虎隊擊殺自己。

＊＊＊
首先，魔術師對本片的第一所象非常良好：尤其是係街坊好友同炒金大媽講，話銀行就關門，唔好掛住個市，一齊去飲茶，意味着這天是星期六，估唔到轉個鏡頭就影到個日曆正正寫住星期六，有 attention to details 即時叫魔術師加咗分。
睇舊片，最好玩的地方就係可以緬懷一下我城在龍獅旗下的人生百態，幻想下有青光復我城、榮光盡歸後的光景。當年的經濟環境跟現在大不同：現在銀行水浸，基本上係逼人借錢，債仔無錢還亦唔會逼人上絕路。當年銀行的持槍啹喀守衛也沒有了，而是換上了笑容可掬的大堂職員，銀行也不再需要將大賊樣貌給分行傳閱，足見我城的治安（截至半年前為止）進步不少，打劫亦已變成夕陽行業。現今傷民無話等錢使（買樓除外），某程度上潮物來說，就算是最新型號的哎瘋也只是數千蜈，跟以前兩萬幾蚊部的水壺大哥大不可同日而語。
另外，本片講及當部份銀行職員沿後門逃去，遇上趕來的 PoPo，給呼呼喝喝，也只是喃喃自語咒罵幾句，證明當年民智未開，公民意識低落。只有大賊才會唔驚 PoPo，唔似得現在，黑警全無威嚴可言。
當然，最緊要的是，當年有唔少地下軍火，連槍都有得租，要革命話都無咁易！

不過，以前跟現今社會都仲有少許共通點，就在有青永遠都係咁柒。好以阿細咁，為咗還貴利走去打劫銀行，而唔係打返貴利轉頭，已經係匪夷所思；更奇的是阿細竟然勸古向陽不要冒險出去，因為 PoPo 會開槍！乜阿細無諗過自己持械行劫， PoPo 一樣會開槍咩？
最後，本片寫銀行中各人的性格十分立體，每人都有一小段 solo 演出，是唔錯的安排。本片 bugs 唔多，最大問題就係無講 PoPo 點解唔從後門攻入去。古向陽只得一人，難以同時黃顧前後門也。
除此之外，本片問題不多，瑕不掩瑜，魔術師評分為９５／１００。