別人恐懼時佢回流

當傷民紛紛話要續ＢＮＯ跳求雨舞希望米國俾個居留權之時，今時今日仲有「三代同堂舉家由外國回流」我城，仲不惜工本搵設計Ｃ「愛炫美」一番，真是不知人間何世：

樓盤傳真 16/5/2020 第四節　2020/05/18 09:04

三代同堂舉家由外國回流香港，選擇荃灣西海之戀．愛炫美的四房單位，運用隱藏儲物櫃、裝修成時尚簡約的空間，讓一家人在港共聚天倫。

戶主為有米一族，財力不受疫情影響，２０１８年尾以３,１００萬買入海之戀．愛炫美的四房單位，現市價為２,４００多萬，但戶主依然不為所動，豪花近２００幾萬搞裝潢：

由於男戶主需要書房工作，而原則兩個客廁黐埋一齊唔實用（左上），設計Ｃ便將其中之一個客廁拆去，打通成為一個較大的書房（右上）；書房出入口設在原客廁那邊，把貼住客廳的牆封起來做「迷你 pantry」（記者妹說的，左中、右中），令牆身可以一氣呵成，但...水源呢（ec 腔）？書房櫃一高一低，好易墥親，但呢個係設計概念，一般人識條鐵；另外仲有遙控反床，鋪有海馬牌床褥（左下、右下）。記者妹話如果男戶主工作（睇ＡＶ？）得夜的話，可以係度訓，又唔使嘈醒女戶主（或者係俾女戶主踢走都得）；總之就係學主持人話齋，「成功地解決了男戶主的需要」。

主人房一開門便見到另一間房（左上），原係係設計Ｃ在主人房做多了一間小型衣帽間俾女戶主放Ｈ牌包包，更用上透光不透影的玻璃做牆身，引入光線，但如何透風就不得而知（右上、左中）。主人房加建了衣帽間之後入口變得較窄，床尾櫃同衣帽間牆要做彎避免墥親，但設計Ｃ就只係話「同衣帽間呼應做返四分一圓」（右中）。床尾櫃可以用來放書，也藏有電視機乙部（左下、右下）：

廢老房間以樸素為主，尾床頂住電視，床隔離就係企身衣櫃，住外國應該唔使咁逼（左上）；廢老房間門外設有扶手加滲燈，痾夜尿亦唔怕跌親（右上）。同其他設計Ｃ一樣，有青阿囡又係要訓碌架床，仲鬼死咁近天花板，想坐直都有啲難，牆角仲要加埋啲「舞台花妝枱燈」，未開都已經覺得熱（左中、右中）。記者妹話有青阿囡鍾意繪畫，設計Ｃ便造了架「畫板車」給她，畫完便可「泊」回衣櫃後的空位，朝桁晚拆，慘慘豬（左下、右下）：

設計Ｃ唔將屏風裝在玄關之前，反面係將個屏風用來分隔客飯廳。屏風以立體斜面設計，相亙交錯，另加滲燈（左上、右上）；客廳一角用 designer 釣魚燈，另一角的茶几又係以相亙交錯的設計（左下），理念一直引伸至男戶主書房。最後就係飯枱對住設計Ｃ用咗好多年（亦俾魔術師笑咗好多年）的 memory wall 燈箱設計，話可以俾屋主貼值得記念照片，但實情上今時今日仲有邊個會哂相呢？食飯時對住好似醫務所睇Ｘ光肺片一樣的燈箱，認真夠哂醒胃（右下）：

最後，因為戶主係回流人士，特多行李篋，於是設計Ｃ便將工人姐姐的床升高（但明顯工人姐姐的床位空間比阿囡更多），床底下通到客廳企身櫃底，可以擺行李篋及其他雜物（左上、右上）。另外，天花通風槽只係裝飾，實際上好似飛機艙手提行李位咁可以擺嘢，但由於樓底高，睇怕都係唔好放重物，拎上拎落易生危險（左下、右下）：