給自己的聖誕禮物：iPhone Not for Life

話說魔術師兩年前在著乜通買咗部 iPhone 12 Pro 256GB，作價我城貨幣8270；仲用埋 iPhone for Life 呢個分期付款計劃，供完24期之後只要部手機無穿無爛，拎返去著乜通可以拎返＄2,562，疑似高過一般回收價唔少。

魔術師見回收計劃將於12月底到期，又見到大貓信用卡個 iPhone for Life 計劃 唔錯，似乎可以用「loop loop loop 大法」將個折扣額永續落去。

（圖片來源：匯豐信用卡最紅優惠 > iPhone for Life 付款計劃, captured on 24 Dec 2022）

魔術師去到屯門市廣場的著乜通分店問，查詢有無心儀的 iPhone 14 Pro，答案係因為早前富士康大逃亡搞到缺貨（笑），但就做唔到 iPhone for Life：

（圖片來源：Smartone > iPhone 14 Pro, captured on 24 Dec 2022）

（圖片來源：Smartone > iPhone for Life, captured on 23 Dec 2022）

魔術師再問落去有冇替代方案，服務員開始答不上嘴，便叫魔術師等另一位專門做開買機的店員來服侍魔術師。魔術師等了一會，終於輪到有 SME（Subject Matter Expert）招呼，便不厭其煩地將自己的「問題」重覆一遍（近年魔術師的EQ真係好咗，無咁容易覺得重覆又重覆係好煩嘅事而語氣不佳），而那 SME 也很快地提供了解決方案：就係由著乜通自己回收返魔術師部 iPhone 12 Pro 256GB，截至目前為止個 Trade-in 價都仲好過 iPhone for Life，...

（圖片來源：Smartone > 手機及其他配件 > Trade-in 服務, captured on 24 Dec 2022）

「1iPhone for Life 呢啲嘢，gimmick 嚟嘅啫！」SME 如是說。

咁就一天都光哂。SME 當然補返句，如果魔術師要訂機的話，到時個回收價可能會唔同咗；但既然 iPhone 14 Pro 依家無無貨，今日亦不可能即時放棄而家部機去 Trade in，呢個時間差的風險便不能避免。於是魔術師便叫 SME 幫手訂返部 iPhone 14 Pro 256GB（魔術師唔多影相拍片下載，256GB 夠用有餘）。顏色方面，2023是八運最後一年，2024年轉九運，揀紫色 iPhone 應該無錯，蓋九運屬火，顏色為紫；魔術師是水命人，水剋火，我剋者為財，紫色 iPhone 應該有利財運也。

（圖片來源：Apple HK > Buy iPhone > iPhone 14 Pro, captured on 24 Dec 2022）

魔術師問 SME 大約要等幾耐，SME話「幾日內可能有貨返，大陸啲廠依家開返。」聽就聽住先，雖然成件事同官網報價幾乎一模一樣（官網回收價仲比薯乜通高＄30），但薯乜通應該唔需要等得耐過街客，而且 Trade in 呢味嘢，都係即場搞定愈快愈好，免得 online trade in 寄來寄去唔知會唔會整壞，盞夜長夢多也：

（圖片來源：Apple HK 官網, captured on 24 Dec 2022）

＊＊＊

伸延閱讀：

信報 2022年12月12日 中國財經

富士康鄭州廠所在地高風險區域全解除

富士康iPhone廠房所在的中國鄭州航空港區公布，自今日12時起，全區所有高風險區域全部解除。

富士康上周四(8日)已恢復鄭州園區的通勤班車運行。

富士康鄭州廠房早前因疫情封控及員工抗議等事件，導致生產持續受到干擾。外電早前引述消息人士透露，該廠的產能正在慢慢恢復，公司積極招聘新員工，若過程順利，預期最快本月底至明年1月初可全面恢復正常生產。

信報 2022年12月21日

凌通 中環解密

滙豐卡免息分期買Apple Watch

滙豐首次推出靈活免息分期付款計劃，客戶以滙豐信用卡選購Apple Watch系列，可以低至65元免息免手續費分期購買Apple Watch Ultra、Series 8或SE系列，毋須簽訂任何服務計劃，並獲高達300元「獎賞錢」。

這項計劃只適用於以滙豐信用卡購買Apple Watch，並透過商戶免息分期作24個月以上的分期付款。客戶可到4間指定本地電訊商，包括csl/1O1O、香港寬頻、數碼通及電訊數碼SUN Mobile參與。於24個月後，客戶可選擇升級更換最新Apple Watch，以「回購價值保證」抵消餘下分期餘額，亦能保留原有Apple Watch，繼續分期繳付餘額至供款期完結。

滙豐香港區財富管理及個人銀行業務信用卡及私人貸款主管甘家儀稱，滙豐在今年較早時與各本地電訊商合作提供的「iPhone for Life」計劃深受客戶歡迎，因此推出嶄新的分期付款計劃購買Apple Watch，希望客戶在佳節當前以靈活的消費方式，為自己或親朋好友挑選心頭好。