一人飯局(2023年6月）

1. 爭鮮

魔術師有個習慣，就係每星期都有兩日食得「輕怡」些少，少啲油膩煎炸澱粉質，多啲肉多啲菜就無所謂。咁講法由沙律餐到烤肉餐都啱魔術師食，另外就係壽司同刺身，少少飯都可以。魔術師在舊舊公司工作時，附近就有爭鮮外帶，3蚊一件買幾件返位食，十幾廿蚊就解決了一餐；去到依家間公司，位置甚為山旮旯，只能間唔中去唔算太近的爭鮮迴轉壽司店食個午餐。

早前有條日本有青好似痴線低低B咁走去舔迴轉壽司店的杯碟豉油樽，真係連黃黑裝修師都做唔出，我城的迴轉壽司店都應該唔會有問題嘅。

魔術師有個強迫症，就係通常都食差唔多嘅「定食」。好似去爭鮮咁，通常都係食100蚊左右，食嘅嘢都係差唔多，會改變的最多只係三幾碟，其中芒果布甸係必食甜品，食完最開心！

魔術師餐單：花碟$16X2、黑碟$12X3、黃白碟$8X4，共$100，連加一埋單$110。

2.  大雞大@屯市 Food Maze

這天周末朝早有事出了九龍一轉，返到嚟剛好中午，去到屯門市廣場落車，想食午飯又唔想同人逼，最好就係去 food court（起碼無大XX咁悶‌）。今次就試吓呢間炸雞：

(圖片來源：大雞大 Facebook 專頁，captured on 13 Jun 2023)

魔術師選咗BB雞配香辣雞味薯條、加一罐 Coke Zero。雞炸得比較乾，但魔術師慢慢食，攤凍咗都竟然唔係太差；講到尾，薯條好食好多。

魔術師餐單：經典BB雞、香辣雞味瘋薯、Coke Zero，共$72。

3. 佐賀山田‧燒肉

早前網友阿力士留言推介屯門市中心呢間烤肉店，魔術師當然就要去試吓（希望無理解錯）：

雖然魔術師一人飯局唔係太啱食放題，但見呢一set 竹放題基本盤嚐味燒肉盛（包括尾國 SRF 安格斯牛肋條'尾國特選和牛一口牛、尾國上級牛肋肉、骨付牛肋肉、尾國牛小排）都已經十分夠食，再加返少許放題就夠了；加上 8:30pm 後入席黑夜優惠8折，計返同食一次牛角差唔多，似乎都食得過。

(圖片來源：Openrice > 餐廳 > 香港 > 屯門 > 佐賀山田‧燒肉，captured on 13 Jun 2023)

基本盤來了：

魔術師另外叫了放題選項中的鯖魚、菠蘿、牛油粟米粒、和最愛的麻油蒜粒：

堂食仲有壽司、汽水、啤酒（另外加錢）等，不過唔係太對魔術師胃口，只係開個茶包算；另外枱上只有燒肉汁和鹽，調味料不多，魔術師就無影相了。

食飽之後就係 Cocoberry 雪糕，正呀！

明明係一人飯局，點解會打咗2人呢？好彩唔使計茶芥啫！

魔術師餐單：竹放題（尾國和牛）100分鐘，常日原價$288，加一之後計埋 8:30pm 後入席8折，埋單＄259。

＊＊＊

伸延閱讀：

一人飯局(2023年5月）

日本迴轉壽司店向舔醬油樽少年索償6700萬日圓

【有線新聞】日本一名少年早前在連鎖迴轉壽司店舔醬油樽，店方入稟向他索償6700萬日圓。

涉案17歲少年1月初，在岐阜市壽司郎分店內舔醬油樽和茶杯，影片在網上廣傳。壽司郎在入稟狀指事件損害店舖衛生形象，令顧客大幅減少。母公司市值一日內減少逾160億日圓，決定向被告索償6700萬日圓，折合約370萬港元。

少年的代表律師反駁指，顧客減少可能是業界競爭激烈所致，與被告行為沒有明顯關係。