魔術師資產配置(2023年5月結）

尾帝爆完銀行危機就爆債限懸崖，我城則受 Grandpa 經濟復甦不如預期影響，成個月都腳軟，成為全球主要股市包尾大幡。本月結算，以尾股為主的沉船基金本月較上月下跌1.64%，每單位收報＄154.72（我城貨幣，下同），繼續穩守第一位。黃金鈀金升咗一輪亦有回調，商品組合每單位收報＄142.29，較上月跌2.34%，守住第二位。以巷股為主的生活基金竟可逆市靠穩，本月收市每單位報＄137.62，較上月微跌0.42％，穩守第三位。

合格線債券和現金組合因債價反覆，略為回軟，維持第四位，每單位收報＄122.84，跌2.23%。

恒生指數本月跌破19,000點，複式盈富繼續無運行，當係股息再投資趁低入貨機會。複式盈富組合本月每單位收報＄108.74，較上月大跌7.50％，佔第五位。強積金組合由恒指、畢尾指數、及環球債券互相對沖拉扯，不過淨係巷股已夠陀衰家，本月每單位收報$104.16，較上月下跌2.05%，佔第六位。房託組合依然受息魔困擾，地產復甦勢頭亦唔係咁勁，每單位再次跌穿$100，收報＄95.70，較上月跌6.26％，依然包尾。

本月樓價估價企穩，主要係投資組合無差別下跌導致身家縮水。本月資產淨值（身家）埋單每單位收報＄16,694，較上月下跌2.05％，淨流動資產亦較上月下跌3.31％（較2016年3月31日基數升71.38％)：

魔術師的資產負債表依然係正資產，相當健康。樓債估值不變，按揭比率（按揭貸款/樓價）由上月 45.53％ 再輕微下跌至 45.45％，物業淨值佔總資產淨值由上月 36.18％ 升至 37.05％，主因就係因為投資組合下跌，令住宅物業比重增加。而本月最令人料想不到的是3月買咗隻錶，4月信用卡結帳，本來5月找數，但4月中申請月期付款（見《有錢唔還賺息差》），大貓便幫魔術師的，原本卡數一次過找清，再開另再一個分期 plan，變咗5月再將分期 plan 結算一次，6月才找第一次數，搞到魔術師無端白事賺多三個月息。

最後，本月魔術師身家跟我城指數的 beta 值保持 0.30，跟痕指關連性上升 0.30% 至 54.90%；standard deviation of rate of return (month-on-month) 保持平穩，微跌 0.01% 至 3.14％：

＊＊＊

伸延閱讀：

有錢唔還賺息差