若生命等候

魔術師老媽子在生的時候成日話魔術師唔係好識做人，禮節性的客套話都唔多講，難開金口。不過，月前魔術師入院期間，大細舅父舅母時來探望，要老人家走來走去魔術師實在無言感激，加上細表弟覆診無發現有癌細胞，於是前幾個禮拜就約埋大細舅父兩家人食餐飯賀一賀佢，兼送上月餅劵當謝禮。過咗成廿年，魔術師都叫有些許長進吧？

席間又談到細表弟買居屋一事，早前抽安達臣居屋揀咗樓，高層290呎折實價約200萬（我城貨幣，下同）；但依家樓價食咗瀉藥，細表弟爸爸二舅父話考慮緊撻唔撻訂好，例如屯門黃金海灣‧意嵐就賣緊 200 萬都唔使。

聽罷，大舅父就問：「咁即係撻幾多訂？」

細表弟明星較大表弟肯講嘢：「都成廿萬㗎！」

大舅父即刻就玩鳩細表弟：「廿萬之馬，就豪俾佢！」

魔術師心諗，細表弟在正苦做個 ACO，廿萬（即係一成樓價）都唔係細數目，就咁因為樓價跌就撻訂想法未免有點兒戲，於是便以超然的態度搭句嘴：「如果用嚟住，都唔係一定要撻訂嘅！」

這時二舅父插口道：「個價跌咗，仲要俾幾十萬裝修，個心唔舒服㗎馬！」

魔術師早就估到二舅父的回應是「感情用事」，於是便繼續以超然的態度回應：「哦，咁係買貴咗啫！你好難話要在最低價入市嘅！」

（圖片來源：香港房屋委員會 > 出售居者有其屋計劃單位2022 > 安秀苑, captured on 18 Aug 2024）

這時，大舅母問到骨節眼上：「咁你（細表弟）當時點解會買呢？買嚟做乜？你係咪就嚟結婚？」

細表弟不好意思地說：「我都係諗住當渡假屋，同啲朋友聚下腳。」

魔術師哈哈大笑，唔怪得咁多切雞C都話班後生客舅要「招呼朋友」：「哦，即係當成係 party room 喇！」

魔術師之後就唔再講喇。那麼，細表弟撻了訂之後，除了無咗個「公猴洞穴」之外，還會有甚麼後果呢？

1. 被罰停公營賽事兩年

根據2023年居屋申請資格，「不論以綠表及白表申請，申請人均要在參與計劃前24個月內沒持有任何物業，包括沒簽署任何買賣協議。換言之，撻訂居屋後，該業主在未來24個月會因為未符申請資格，而無法作出申請」。亦即係話細表弟撻咗訂的話，兩年內要買樓的話就只能買私樓，唔能夠再食正苦優惠了。

（圖片來源：居屋撻訂除被殺訂外　還有一嚴重後果　時限長達24個月, 香港01 出版：2024-02-22 14:42 更新：2024-02-23 14:32）

2. 買私樓筆直有幾多

睇返細表間居屋，平均折扣率有49%，即係話約200萬的居樓其實係值400萬：

（圖片來源：香港房屋委員會 > 出售居者有其屋計劃單位2022 > 常見問題, captured on 18 Aug 2024）

不過，如果實際筆直又只係得200萬的話，以二舅父提及的屯門黃金海灣‧意嵐來說、200萬左右只能買到低層215呎的納米單位，以層數、面積來說屯門私樓較安達臣居屋差，管理費細水長流又貴好多，交通和生活配套則屯門可能會好少少；但問題係200萬私樓只係 gimmick 嘢，你搶到先得㗎？

（圖片來源：利嘉閣 > 黃金海灣·意嵐 GOLD COAST BAY THE UPPLAND 銷售情況, captured on 18 Aug 2024）

3. 二手接貨情況

唔使講，居屋轉售是有限劉的，而且依家再無「原價售回房痿會」呢枝歌仔唱；而私樓當然無買賣限制，但納米盤無險可守，要搵人接手係要大劈價的，只要樓價夠平，租務回報率夠高，自然就有收租仔接貨：

（圖片來源：香港房屋委員會 > 出售居者有其屋計劃單位2022 > 安秀苑, captured on 18 Aug 2024）

4. 心動不如行動

要分析的話，細表弟嗰二十萬定金已經是沉沒成本（sunk cost），在決策時（是否撻訂）不應考慮；但如果撻咗訂，就應該馬上要有下一步行動，即係去買私樓（是否屯門新盤不重要）；否則如果細表弟（其實佢只能聽老豆枝笛）又係坐低「睇定先」，跌又驚買貴咗「個心唔舒服」，升又覺得個市低時無入市，依家買都係「買貴咗」，個心又係「唔舒服」，又再「再坐一會」，最後「一事無成」，永遠都上唔到車唔會有公猴洞穴，咁嗰撻咗的廿萬只會是白蝕...

魔術師無講出嚟的結論就係，以二舅父處事及影響兩個仔的態度（二舅母在探魔術師病時曾提及「我踩成世人都係驚驚青青咁！」），可以話呢啲都係典型老散心態，缺乏執行力，唔係一事無成就係等到見頂才入市，註定做燈神。

＊＊＊

伸延閱讀：

慳稅三寶之可扣税強積金自願性供款

居屋撻訂除被殺訂外　還有一嚴重後果　時限長達24個月（香港01 出版：2024-02-22 14:42 更新：2024-02-23 14:32）1

屯門新盤｜黃金海灣 ‧ 意嵐新盤攻略懶人包｜價單呎價、平面圖、生活配套 (不斷更新)（利嘉閣官網，Published 2024-08-07 · Updated 2024-08-18）