一人飯局（2024年5至8月）

1. 生龍清湯腩 (兆和街) 

記憶中魔術師應該寫過呢一間以往都有幾間分店的茶記，近年愈做愈縮得返兩間，呢其就係在荃灣的其中一間：

(圖片來源：Openrice > 餐廳 > 香港 > 荃灣 > 生龍清湯腩 (兆和街), captured on 16 Aug 2024)

雖然呢間嘢網上妄想劣評都唔少，但魔術師食嘢不嬲唔揀擇（尤其呢間都算少數開得比較夜的食店），亦唔係平民食家，對茶記來說有「疑似」係巴人風味的咖喱食已經唔錯，幾十蚊一餐更唔會食神上身，即使佢啲牛肉有時真係哐口同乾身咗一啲，只要比對返個價位就唔會咁多怨言。

畢竟北上消費飲飲食食服務同質素可能真係好好多，但對魔術師來說，最貴嘅就係時間成本（睇「巷燦理財」，魔術師一年都返唔到幾次「真鄉下」收租就知）。與其上上落落「食好西」，倒不如求求其其留巷消費振興經濟，食餐頹飯算了。

魔術師餐單：巴基斯坦薯仔咖喱牛肉飯（$60），加特飲咸檸七（$8），埋單$68。

＊＊＊

2. 屯門市廣場 Food Maze：梨泰院

早在去年已經講過，魔術師對泡菜國食物無感，人參維湯除外（見《年尾晚餐推介》）。以快餐來說，位於屯門 food court 的呢間食店都叫做可以：

（圖片來涼：Openrice > 餐廳 > 香港 > 屯門 > 梨泰院, captured on 16 Aug 2024）

魔術師早前出院之後，想食返啲嘢補下，最鍾就係飲以前老父在生時煲的田七雞湯，退而求其次人參煲雞都可以，再退而求其次由傳統中式老火湯變泡菜國絕活，也無不可。魔術師又唔係咩嘢平民食家，平平地移船就磡，去 food court 解決亦無不可，無需吓吓北上消費呀！

魔術師餐單：人參雞湯飯（$98)

＊＊＊

3. Delifrance Bistro

舊年去過錦曹坊當時「新開」的 Delifrance（見《一人飯局(2023年5月）》），想搵返以前食返的醬燒豬肋骨，但卻只在二人餐有供應：

(圖片來源：Openrice > 餐廳 > 香港 > 屯門 > Délifrance Bistro, captured on 12 May 2023)

事隔一年再度幫襯，今次就有一人餐的醬燒豬肋骨，馬上叫咗個餐來吃：

（魔術師有叫餐湯的，但吃得太快唔記得相機食先了。）

味道同以前係差咗嘅，無燒得咁脆，亦鎖唔住啲肉，切起來會「散」的 - 唔知係咪依家食材用料差咗，以前啲肉係會「緊緻」啲。結果最好味都係杯即磨咖啡、其次就係保持水準的餐湯和包，主菜豬肋骨就比較失色了。

魔術師餐單：醬燒豬肋骨一人餐（$199），加餐湯（$15）、即磨咖啡，連加一，$235.40 埋單。

＊＊＊

伸延閱讀：

一人飯局(2023年5月）

年尾晚餐推介