又再消費，帶動經濟

話說魔術師近月發覺自己睇細 fonts 字型開始感到吃力（最憎啲 Powerpoint slides 寫字寫到密質質，fonts 用到 ６），尤其是在前公司開會用細字打落大螢幕，自己又坐得遠時就更加感到似在「驗眼」，寧願睇返自己部電腦好過。今次波叔派清費劵，雖然魔術師會將所有「橫財」用落特別新開的發達通卡（見《小藍人喪跑消費劵》），但卻無阻魔術師的消費興緻。繼上次買咗部洗眼鏡機之後（見《齊齊消費，帶動經濟》），跟住當然就係配返副新眼鏡。

畢竟依家戴緊的 Lingberg 已經係幾年前的貨仔（見《Lindberg 眼鏡初體驗》），鏡片花戴架亦開始老舊，兼且鼻托位個設計麻麻，如果夾唔實就容易鬆脫。只要係長期讀者，都知道魔術師有鋪巷女癮，只要工作上一唔開心就會去鳩嗚（上次係《在黃Ｃ上司面前放閃》），但呢幾年包青天上司對魔術師甚好，所以都好耐無買過嘢了，也是時候執一執自己順便返新工。

（舊眼鏡鼻托位）

魔術師今次就轉咗眼鏡鋪，唔去以前那一間 sell 味較重的鋪頭，轉到呢一間在中環的家庭式眼鏡店。點解揀佢？因為鍾意個招牌的６、７０年代懷舊字型囉！

魔術師一入到間店，說明來意，話想配副新眼鏡，都係用 Lingberg 鏡框。售貨員也沒落什麼嘴頭，便實鋪實作的拎咗幾到 Lingberg 俾魔術師試，兼且眼框上標明價格，唔使問來問去，甚合魔術師口味。試咗一輪之後就揀咗呢副 spirit titanium collection 鏡框：

（圖片來源：Lindberg 官網 > Collections > spirit titanium, downloaded on 7 Nov 2021）

然後就係去真．驗眼，結果是魔術師的老花係深咗，近視就無乜變，都係６００幾度。由於工作、生活上都係睇 mon 為主，所以都係配返到差唔多的度數，將來有需要再配返副老花。最後就係揀鏡片，售貨員出乎意料的鏡然唔 sell 最薄（當然也是最貴）的１.７４鏡片，反而話１.６７都夠。魔術師見佢咁有心幫客人慳錢，就欣然答應，唔試過又點知唔得呢？結果唔使一萬落樓，俾舊鏡平咗幾千：

過咗個幾禮拜，便可以收貨了。開箱 check 清楚（有提供原廠眼鏡布，不過無入鏡啫），最緊要鼻托個 design 係唔會跌！

＊＊＊

伸延閱讀：

齊齊消費，帶動經濟

小藍人喪跑消費劵

Lindberg 眼鏡初體驗

在黃Ｃ上司面前放閃