2016年7月4日 星期一

歐國盃2016:蓋世太保十二碼險勝黑手黨

有無搞錯!堂堂12碼「真・強國」、40年未輸過12碼的德國隊竟然頭五輪射失三球,心理質素咁差,唔通傳統日耳曼的鐵血精神已經被移民制度以溫水煮蛙方式「種族清洗」?

魔術師都係鐘意聽返我城講波佬講波,寸寸貢有時都幾生鬼抵死(例如,曼聯(Manchester United)兩個都射失(12碼)),錯又錯得夠cheap:例如話候娒斯(Mats Hummels)少射12碼(其實佢係多蒙特(Borussia Dortmund)的劊子手之一);更好笑係話赫達(Jonas Hector)無乜助攻力,轉個頭赫達就助攻入球俾班講波佬睇,搞到佢地即刻吞返剛剛的恥笑落肚!
又,意粉上半場都叫有啲具威脅攻勢,但下半場就真係唔得,中場都造唔到波,亦無乜build up play,只得零星攻勢,想贏照計應該早早換人變陣。不過唔知係咪意粉教練干地(Antonio Conte)怕班球員年紀大機器壞,又怕德國放快馬(例給利箂桑尼(Leroy Sané))出來搏殺,所以留返啲換人名額,直至到加時最後階段才用完所有換人名額。點知好換唔換,換個生力軍莎莎(Simone Zaza)身都未熱好波又未掂過就出來射12碼,真係機關算盡太聰明了!

片段來源:NOW TV 651台 歐洲國家盃2016 德國對意大利 直播
註:本人並無持帶本節目版權,剪輯純為分享討論用途,並無牽涉任何商業用途。本片段以以下軟硬件剪輯:
Magic TV 8000D
iPhone 6s
iMac 27” Retina 5K display
Camtasia 2 for Mac
Reflector 2
Airplay
作為德國粉絲,就讓魔術師來給德國隊打打分(1為最好,10為最差):
1 紐亞 Manuel Neuer (G)(C):1,除咗有球龍門球省到球證之外,其餘表現毫無錯漏,更救出兩球12碼。
3 赫達 Jonas Hector:2,全場無乜失誤,助攻時唔夠放,不過都算有助攻入球,射入致勝12碼。
4 候韋迪斯 Benedikt Höwedes:3,全場無乜失誤,不起眼的無名英雄。
5 侯姆斯 Mats Hummels (Yellow Card 90’):3,全場無乜失誤,不過未在最佳狀態,體力稍差(德國盃對拜仁時打咗70分鐘就已經要賣老抽),搞到90分鐘賽事尾段領黃,下場要停賽。
6 基迪拉 Sami Khedira (Substitution out 16’):未有表現便傷出。
7 舒韋恩史迪加 Bastian Schweinsteiger (Substitution in 16'   Yellow Card 112’):5,全場駁腳,唔太突出,射12碼見佢頭耷耷好驚青無信心咁,心理質素咁差,唔應該再搵佢做隊長。
8 奧斯爾 Mesut Özil(Goal 65’):3,除入球外,全場表現一般,更射失12碼,致命傳送亦只得一次半次。
11 戴斯拿 Julian Draxler(Substitution in 72'):3,入替後表現一般,不過射入12碼替德國追成2比2平手,可記一功。
13 湯馬士梅拿 Thomas Müller:5,全場表現近乎隱形,必入射門亦被對手後衛以「健威式」踢腿護空門救出,12碼又宴客。其實佢近月的12碼命中率相當低,以前的拜仁劊子手去咗邊?
17 謝洛美保定 Jérôme Boateng:2,如果唔係無端端攤開對手輸12碼,又點使贏得咁辛苦?不過12碼即時死亡嗰球佢射得好靚,可以記返一功。
18 卻奧斯 Toni Kroos:2,以前拜仁裡最girly的小弟弟已經變成球隊的中流砥柱。射入第一球12碼,好重要。
21 甘美治 Joshua Kimmich:3,新人表現不錯,助攻助守非常夠膽色。如果唔係好似「漢堡拿娒」咁扭計要打中場(多謝摩摩提供),有幾會做拜仁及國家隊的「真・拿娒」接班人不過有一次包咗越位搞到幾乎輸波。12碼射得好,能夠克服德國盃對多蒙特時射失12碼的陰影。
23 高美斯 Mario Gomez(Substitution out 72’):2,全場表現出色,係德國隊組織攻勢的第一點,已經係高路斯(Miroslav Klose)退役後的最佳選擇。同時亦證明了德國隊打無鋒陣真係唔係好掂,希望佢傷勢無大礙喇,基迪拉傷出同埋候娒斯停賽都仲有替補,但無咗高美斯就真係唔得。
COACH 教練
Joachim Löw 路維:排陣四平八穩,先求唔輸,最意粉攻勢減到最低。奇在唔放快馬桑尼在尾段爆下意粉的老人防線,全場只換兩人亦令魔術師百思不得其解。
***
圖片來源:
UEFA EURO 2016 official website
***
伸延閱讀:
港超聯 林志堅投傑志!答謝港Fans!

14 則留言:

  1. 小弟都係德國粉絲....
    不過好少睇波.

    回覆刪除
    回覆
    1. 我真人識嘅朋友裡面又真係好少結咗婚有仔女都仲會半夜追波睇的.

      刪除
    2. 夜貓魔術師,只因我只睇四年一度世界盃。。。同埋我無收費電視。
      我都成日半夜三更打BLOG架!

      刪除
    3. //同埋我無收費電視。

      你依家叫我睇返CCTVB真係唔得, 好難接受嗰種質素.

      刪除
    4. 我全家都係睇YOUTUBE....或者睇國內綜藝節目.

      刪除
    5. 我唔想睇CCTVB同死鬼亞視浪費光陰,所以搬新屋時索性唔插天線,只安左NOW,叫做睇下新聞,後來發覺上網都可以睇到了。

      //不過好少睇波.
      70S兄有時間砌模好過啦。

      刪除
    6. 無線新聞台仲可以一睇,唔可以唔插天線啊~
      老人家鐘意睇南方衛視,android box攪掂。

      刪除
    7. //70S兄有時間砌模好過啦。
      Agree X10

      //我全家都係睇YOUTUBE....或者睇國內綜藝節目.
      //老人家鐘意睇南方衛視,android box攪掂。

      我都係鍾意全套影音享受, youtube太難頂, 太多盒又有礎觀瞻.

      刪除
    8. //我真人識嘅朋友裡面又真係好少結咗婚有仔女都仲會半夜追波睇的.

      又未必既,我班已婚波友(不論有無仔女)起碼十二點一點既波係唔會miss的,對d深夜波有人會索性做廳長邊訓邊睇。不過的確只限weekend的聯賽,周中d三點波真係較難捧場。

      //無線新聞台仲可以一睇

      我都係主力睇cctvb新聞台,貪佢唔會對反對派d野報導得太深入,唔係話收費台唔中肯,而係呢班友d野好多係小圈子風波(尤其係笨土派),就好似魔兄的「烏蠅」形容:唔知無影響聽到又盞煩!

      //或者睇國內綜藝節目.
      //老人家鐘意睇南方衛視,android box攪掂。

      都話蝗共密謀「軟性入侵」中啦,而且已經有d效果嘞.
      其實上面d綜藝節目成個格式都係抄台灣的,不過慘得過抄完後好睇過你,題材又多。
      普通andriod盒可以睇一般電視台,不過睇體育台就要有自己專屬server的盒了.

      //我都係鍾意全套影音享受, youtube太難頂, 太多盒又有礎觀瞻.

      魔兄果然一直係「臀部靈魂」啊 XD

      刪除
    9. //我都係主力睇cctvb新聞台,貪佢唔會對反對派d野報導得太深入

      藍可盈由有線過檔去CCTVB, 我都失落咗好一排.

      //其實上面d綜藝節目成個格式都係抄台灣的,不過慘得過抄完後好睇過你,題材又多。

      學基基話齋, 個script寫得好咪得囉... 寶島嘛, 乜仲有愚樂圈架咩?

      //魔兄果然一直係「臀部靈魂」啊 XD

      「臀部」就梗係離地架喇!

      刪除
  2. 哇原來NOW成班人過晒Le仔後,咁大場波都得返個咁弱既陣容。馬啟仁亦算繼大哥瑜同李榮基後第三個我最唔鍾意既講波佬嘞。

    何輝話保定跳起時張開雙臂應該係想表示爭頂時自己手部無動作,點知反而被波打中手。

    小豬射12碼個樣真係好唔掂,佢今年係曼聯已經無左正選,14年捧左世界盃後真係落得咁快?

    PS 我見過射12碼最有信心既樣係03年歐冠決賽的舒夫真高,對眼直情成隻豹咁!

    http://youtu.be/jjYPOj2hros#t=7m40s

    德國踢足120分鐘,再加埋高美斯緣盡今屆歐國盃,下一場對住輕取冰島兼主場之利的法國,魔兄你都係做最壞打算好。

    最後又窒下林生:何輝(又係!)近來成日話,作為球員在你有資格揀位踢之前,係應該教練俾咩位你踢你都要俾心機思考下點踢,始終有得落場就好過坐板凳。當然90後的林生肯返來認祖歸宗肯定有新一代傷民作風真傳,點會有投蝗港奸何輝呢d咁「做爛市」的低等想法呢?

    回覆刪除
    回覆
    1. //馬啟仁亦算繼大哥瑜同李榮基後第三個我最唔鍾意既講波佬嘞。

      佢純粹係搞氣氛...

      //保定跳起時張開雙臂應該係想表示爭頂時自己手部無動作,點知反而被波打中手。

      保定間唔時會傻傻地啲動作特別誇張, 好鬼易出事. 係拜仁都係咁樣, 有次對賀芬咸, 佢排人牆又係將手放在心口,人地一射個波省埋嚟,無故犯咗手球, 12碼兼兩黃一紅出場.

      //14年捧左世界盃後真係落得咁快?

      應該係佢有一年在德國盃對多蒙特重創肩膊後,狀態就急速下滑, 得返以前3、4成武功.
      //我見過射12碼最有信心

      波力克都好勁,未試過射失.

      //舒夫真高

      果然係烏克蘭人...

      //德國踢足120分鐘,再加埋高美斯緣盡今屆歐國盃,下一場對住輕取冰島兼主場之利的法國,魔兄你都係做最壞打算好。

      德國都好少會被人當underdog,睇下路維今次點拆(希望佢唔好再用狀態超沉的Gotze). 又, 德國近年又係少柱躉式中鋒, 搵個做高美斯後備都唔係咁易.

      //作為球員在你有資格揀位踢之前,係應該教練俾咩位你踢你都要俾心機思考下點踢

      甘美治最佳位置係打防中, 身高都無1.8米, 係拜仁俾哥帥叫佢打中堅佢又肯打, 路維叫佢打右閘佢又肯打, 係就係有時會犯錯俾人批評, 做新人難免, 亦都要接受. 呢啲就係德國「新星」的「逆來順受」與傷民「堅持理想」的分別矣.

      刪除
    2. //舒夫真高

      果然係烏克蘭人...//

      他曾經是我的男神啊!好可惜他的國家隊烏克蘭在世界杯中的排名不高…

      刪除
    3. 真係識食,烏克蘭果然係靚人出產地...

      刪除