正能量真人騷

早前春花／Cherry（註）問魔術師點解唔寫博士Ｋ。原因好簡單，只因博士Ｋ俾魔術師當「眾」（Whatsapp group）省咗幾句，所以潛咗水幾個月。
事緣早前舊同事飯聚，本來話魔術師帶兩枝酒嘅，點知妹頭又帶多咗枝唔知乜酒來，結果就連枝「靚次伯」（Château Lynch-Bages）都飲唔哂之下就要散場，魔術師在飲多咗之下在飯店門外劏起白鶴來。各人慰問了魔術師一下便各自返家，點知...

博士Ｋ竟然追問魔術師的「病情」，又問魔術師三餐食乜，煩咗魔術師兩日，火都嚟埋搞到要當眾抦佢（已經唔話佢寫錯魔術師另一枝酒「女伯爵（Château Pichon Longueville Comtesse de Lalande）」做「queen」）。

註：

＊＊＊
不過博士Ｋ一向以「正能量」見稱，基本上魔術師未見過佢對生活的挫折會有怨言：除咗佢大女已經考入咗某名小學，但在怪獸嘉獎老婆的歇斯底里情緒下，仲要阿女不定面試考其他更名的名校，搞到一家人的壓力都好大，呢件事佢就有呻過兩句。魔術師心諗俾你入到去都只係掹人地啲高等華人衫尾，人地又點會睇得你起呢？
日前妹頭在Whatsapp Group「開心share」了以下文章：

透過5年的財富研究   全方位了解有錢人

以前睇有錢人習慣相當表面，睇完呢份報告之後，即刻有立體印象。

今次呢份財富報告，於2004至2009年間進行，研究前後認真訪問咗233位有錢人（有177個係白手興家），以及128位窮人比較，得出以下結論…

1. 佢哋唔算後生，80%已經50歲以上。平均花32年去累積財富，證明要發達，就要睇長線釣大魚。

2. 86%有錢人喜歡自己份工，61%有錢人從事自己夢想嘅工作；研究甚至指出，為夢想工作，可以快好多發達，成為百萬美元富豪，只需12年。

3. 88%有錢人每日都有閱讀習慣，透過閱讀令他們的工作表現更好。85%人每個月會讀兩本書，有錢人嘅共通點係，佢哋唔會睇八卦雜誌，因為浪費時間。

4. 靠父幹反而「輸在終點線」；研究指大部份有錢人都係靠自己，其中31%甚至出身於貧窮家庭，透過努力一樣可以有錢。

5. 有錢人唔食快餐店，亦唔食糖；76%每日最少做半小時運動，保持身體健康。

6. 有錢人鍾意幫人，72%每個月都做5小時義工，捐錢更係指定動作。研究指佢哋最鍾意唔係睇人衰，而係想別人都成功。

7. 無論生活幾咁五光十色，真正有錢人唔會換老婆、唔會換車、唔會換樓。研究指64%有錢人住間屋住最少20年，而且好少分居離婚，連架車都好少換。

8. 每日都有計劃，81%人有 to-do list。

9. 唔會經常去旅行，呢點同大劉個仔劉鳴煒叫人唔好去日本不謀而合。96%有錢人每年旅遊開支唔會多過6000蚊美金（約47000港元），41%人甚至花少於3000蚊美金（約23000港元）一年。

10. 44%有錢人返工前3個鐘起床。

11. 73%有錢人平均每星期返58個鐘。

12. 佢哋唔會同有負能量嘅人來往，只會同成功嘅人一齊；經常投訴嘅人，做唔到有錢人朋友。

13. 好多人以為以小博大，靠賭可以起家，其實全錯﹗研究指出，84%有錢人，從來唔賭錢。難怪大部份人都係愈賭愈窮。

14. 奉公守法。99%人從未無被拘捕，包括示威上街。

15. 擁有良好儲蓄習慣，自出來打工嘅一日起，就將2成收入，存入銀行等退休。

16. 65%人擁有3個收入來源，45%人有4個，29%有5個，亦證明打死一份工，一定無出頭。

17. 唔睇電視。67%人每日唔睇超過一個鐘，更唔會花十幾個鐘去煲劇。喺累積財富嘅道路上，煲劇等於悲劇。

18. 有錢人一啲都唔使贏在起跑線，研究指77%人喺學校，只係C級或B級學生，不過佢哋放課後運用時間相當聰明，懂得自我增值；所以上班時間hea過一啲都唔出奇，最重要係收工之後，你點運用餘下嘅自由時間，學到發達。

原始貼文由 meteerpeginyaridasonensigarasi 張貼

（研究基準：有錢人平均年收入16萬美元，並擁有320萬美元資產，約一半受訪者為親身見面。）

資料來源：businessinsider

===============

財經精選資訊tumblr網站「中環街市」

FB粉絲頁： https://goo.gl/kKVS7u

博士Ｋ就例牌大讚正能量，魔術師就例牌唱反調，由「贏在起跑線」到「贏在射精前」呢啲咁荒謬的「滑坡謬誤」一概唔buy，故意揀４、９、１８激下呢個起跑線支持者博士Ｋ！
＊＊＊

林志堅冀希望在港踢出快樂足球 2016/07/12 18:20

加盟傑志的前漢堡中場林志堅表示，希望在香港踢出快樂足球，並將德甲累積的經驗帶到香港。 

他相信港超與德甲水平相距不遠，期望盡快融入球隊。二十五歲的林志堅是香港及德國混血兒，他希望日後也有機會披上港隊戰衣。 

傑志將於星期三開操，來季目標是亞洲賽及重奪聯賽冠軍。

啱啱睇新聞，見到由德國「認祖歸宗」返來我城發展足球事業的堅仔，鄭少聰後繼有人矣！講到正能量，又點能夠唔拉埋堅仔嚟講呢？連「港超與德甲水平相距不遠」都講得出，咁性交可以轉運都唔係奇事，真係少啲正能量都講唔出。
睇返下文報導，原來堅仔在德乙球會爭唔贏中前場位置，被教練安插打閘，覺得不被重用（投閒置散），「憤而轉會」到跟德甲水平「相差不遠」的港超聯作賽，果然係「有人辭官歸故里，有人漏夜趕科場」，睇怕傑志教練都唔敢安排佢打第二個位置，成為「傷港Ｃ朗」，指日可待！

港超聯　林志堅投傑志！答謝港Fans！

【on.cc東網專訊】 港超聯堅喜訊！傑志獲猛將加盟！前德甲球會漢堡戰將、港人二代林志堅落實回港發展，加盟傑志簽約兩年，林志堅聲稱今次回港落班係深受港人對佢嘅熱情感動，希望回歸家鄉闖出一片新天地，協助傑志力爭聯賽及亞洲賽佳績。

現年25歲嘅林志堅過去一直未有諗過回港發展，不過去年暑假回港後，想法卻出現翻天覆地變化，經過訪問傑志訓練中心，並同唔少球迷會面後，發現香港人（無論傑志上下同一眾球迷）對佢嘅熱情都超乎想像以外。「我喺德國，即使踢漢堡正選嘅時候，都只係一個普通人，但嚟到香港，傑志上下都視我為上賓，而且有大量香港球迷搵我簽名合照，當中唔少仲攞住我效力漢堡同格雷特霍夫嘅波衫搵我簽名，實在受寵若驚！」當時佢已經有一個念頭：香港人比德國人，更加將佢當做自己人！

志堅上季効力德國乙組球會格雷特霍夫，基於同教練魯芬碧克喺所踢位置上有嚴重分歧，大部分時間被投閒置散，相當冇癮：「我已經同教練講過好多次，我嘅強項應該係中前場，喺訓練分隊賽同熱身賽，我都盡我所能，而且自覺做得唔錯，不過教練話我喺球隊只可以踢二閘，因為中前場佢已經有心目中嘅人選。」志堅認為自己已經唔係初出道嘅小將，現時係足球生涯黃金階段，唔想再喺格雷特霍夫磋跎歲月，於是主動聯絡傑志，希望能夠喺父親林金發生養之地重新出發，闖一番足球事業新天地。

傑志對林志堅亦表現出最高度誠意，除咗付出港超頂級薪酬外，亦答應畀佢踢佢最擅長嘅位置。雖然傑志條件仍然追唔上德國球會，但志堅深感受到禮遇，一拍即合，成為傑志來季生力軍。

＊＊＊
伸延閱讀：
香港美酒佳餚巡禮（２０１４）
http://magician__yang.mysinablog.com/index.php?op=ViewArticle&articleId=5600147