試用期完畢小結

話咁快就係新公司返咗三個月工，剛剛過咗試用期，係時候作少少總結。
強積金
新公司規模當然不及舊公司之萬一，預咗無咁 systematic 同 organised；不過最令魔術師最「不滿」的，就係強積金用大貓ＭＰＦ，點解唔用暈梨呀？
港妹
新公司的同事都比較 young，仲有短裙仔鬆榚鞋港妹添。魔術師有次見佢去北角見客，之後緊接着又要返嚟中環開會，便說：「北角地鐵站有排你行喎！使唔使將個會推遲些少？」
點知港妹話：「唔使！我有車。」
魔術師唔知佢一個月搵幾多，只是不期然便低頭，順着她的大腿，看到那鬆榚鞋，再想像隔着鬆榚鞋踏油門煞掣的情景...只覺依家啲後生女真係估你唔到，臥虎擒羊臥虎藏龍也。
同 team 同事
話哂同 team 同事（一半係男一半係女）都係 young，自然同魔術師呢位「大叔」有代溝，格格不入。最攞命的是因為中環午飯時分難搵位，佢地就最興兩點鐘先食晏，有時仲可以「盡享下午茶」優惠，食平幾蚊。不過咁晏先食飯就唔太啱魔術師的飲食習慣，唔同佢地一齊食飯就變得更疏離。
重聚
查實魔術師在舊公司的美顏組工作，屬於是「內部僱傭兵」，即公司內部的外判商；現在的新公司，就是「外部僱傭兵」，名正言順「向下流」做外判商 — 結果就係兜兜轉轉接返舊公司的生意，甚至同以前合作過的同事聚下舊。其實，舊公司有「內部僱傭兵」唔用，要真金白銀請「外部僱傭兵」做嘢，亦證明的「內部僱傭兵」的概念唔太 work：養埋班做又３６唔做就３７的「內部僱傭兵」，cost efficiency 不彰也。
重操故業
最令魔術師意想不到的便是要重操故業，網頁系統出錯時要看住電車仔幫手救火（查實魔術師係 Theory Y manager，唔係咁鍾意「夾住」比較 junior 的同事做嘢的），事關個客仔係某歐洲球會（唔係拜仁），暑假有賽期要刊登，仲有買賣球員，賣下波衫咁，特別重視，又多嘢搞。
上司
以行業論，新公司的行頭 turnover rate 都幾大，唔似舊公司咁會有人賴死唔走，就好似聘請魔術師的上司在魔術師入職後一個月便已雜職，新請來的上司卻是一名黃Ｃ。黃Ｃ出咗名係表面開明內裡獨裁，唔俾人唔聽話，呢下嘢就最濕滯。不過又咁講，話到明本公司行頭闊，轉工當成生菜，又唔怕好似喺舊公司咁，萬一得罪咗妹頭、美顏咁，俾佢地寫衰你就萬劫不復，長做落去又轉唔到 team 只會非常無癮。
＊＊＊
伸延閱讀：
Theory X and Theory Y