2017年1月17日 星期二

摩摩電影節之《寒戰II(Cold War II)》:揭開劣政司司長唔辭職選特首之謎


本片承接《寒戰》第一集,警務處處長曾向榮(上集由王敏德飾演)與及警務處副處長(行動)李文彬(梁家輝飾)已申請提早退休,特衰正苦辦事效率超高,話口未完便已通知樁秧,任命本來是警務處副處長(管理)劉傑輝(郭富城飾)為警務處處長。劉 sir 上任未幾,第一單嘢就係為在寒戰行動上殉職的鄺智立高級警司(上集由林家棟飾演)的冚區旗儀式,剛剛被便在浩園前以蹩腳港式英語讀出悼詞,足證唔使英文嘞嘞聲都可以飛上枝頭。好景不常,劉 sir 隨即接到威脅,在視像鏡頭面前挾持着劉 sir 老婆,呆等劉 sir 打嚟的匪徒竟然要求釋放在上一集最尾中槍受傷被捕的李 sir 之子李家俊(彭于晏飾)。

匪徒要劉 sir 親自交人。劉 sir 身為一哥卻連老婆都保護唔到,點有資格保護我城?於是一於負全責親自押犯,勇過禿鷹、sorry sir 等多多聲。警務處副處長(行動)韓孝忠(黃德斌飾)叫劉 sir 不要擅自行動,要小心傳霉與及妄民的瘋言瘋語,卻給劉 sir 訓斥了一頓,並解釋了「建議(advice)」和「意見(comment)」的分別:

匪徒要劉 sir 擺脫一眾黑警的跟蹤,並射了劉妻肩膊一槍以作示威(照計真正的恐怖份子應該用刀砍掉劉妻手臂更殘忍更有震懾效果吧?)。李家俊在車上誣蔑劉 sir 貪污出賣特首與三司十三局的保安安排,一眾黑警竟然又傻又天真地O了嘴似是信以為真(喂,惡名昭彰的犯人的無證據指控,一眾總部的高級黑警應該見慣不怪吧?)。匪徒要求劉 sir 帶上炸彈去到西營盤港鐵站。家俊被同伴救走,以炸彈製造混亂逃去。炸彈爆炸搞到一鑊粥,劉 sir 唯有出來面對公眾認錯,承擔責任。

(註:呢度有一個大 bug,《寒戰》第一集係貪曾做特首,今集的時間線係緊接直落,但卻出現2016年啟用的西營盤港鐵站,時間跳躍到689執政時期。)
家俊的幕後大佬出現,原來是前警務署長蔡元祺(張震個老豆張國柱(唔係工黨嗰個)飾)。蔡 sir 本來屬意將李 sir 父子「打造成」未來的警務署長,但中途卻殺出個 劉 sir,所以便要用計將之剷除;並語重心長的暗示鬍鬚仔財爺,李 sir 就算在提早退休前休假,一樣可以復職,故此鬍鬚仔財爺萬一辭職不被批准,都係一樣要返工的:

另一方會,立法會已有議員動議用權力及特權法查明寒戰行動搞邊科,於是律政司司長黎永廉(李子雄飾)便去拜會跟公文袋毫無關係、報稱獨立的議員兼超級大狀簡奧偉(周潤發飾),想憑師兄弟關係拉攏一下,要求簡參加委員會鋤死劉 sir,最後卻給簡大狀噴了一面屁,謂其「司法干預立法」(689卻出奇地非常剋制),並退還律政司司長用來送禮的相機。鏡頭一轉,導演竟不忘交待了上集給李家俊打了一身的男版 Amina 的下場:

這時出現了奇怪的議會投票:在功能組別無反對票,反而地方直選有些微反對票的情況下,通過了運用權力和特權法調查寒戰行動。簡大砲一來便質疑黑警報告書上的「最成功的失敗例子」只是語言偽術,狗屁不通。李 sir 在會上作證,臨場爆肚公開大爆李家俊誣蔑劉 sir 貪污的無證據指控,令劉 sir 和 簡大砲都大惑不解。劉 sir 和 簡大砲都在分析李 sir 為何忽然想鋤死劉 sir,分析的觀點一樣(錢、權、個人、家庭,偏偏就係無「女人」),只不過黑警劉 sir 是用中文,藍大出身的劣師當然就用英文:

在一間秘密房間裡,李 sir 知道了終極秘密:原來律政司司長想參選特首,三個未來司長的班子已經定好。目前特首選戰的最強對手是保安局局長陸明華(上集由劉德華飾演),而劉 sir 係陸局長提拔上來的人,隔山打牛鋤死劉 sir 便可扳倒陸局長。同時蔡 sir 亦已拉好人脈(暗示功能組別為何可以一致通過運用特權法),萬事俱備只欠東風只要李 sir 肯幫手,未來特首已開好空頭支票俾個保安局局長李 sir 坐:

另一邊廂,劉 sir 又被簡大砲遭質,簡狂抦劉 sir,謂其胡作非為(怪唔得縮骨遮革命要出到催淚彈?)話「程序」就係用來規限權力者不能濫用「非常時期用非常手段」。劉 sir 只能弱弱的以「不依常規跟不合法是兩回事」來反駁:

又在另一個秘密地方,蔡 sir 和家俊帶李 sir 去參觀第一集劫回來的衝鋒車的收藏點。原來蔡 sir 已買起了負責為黑警提供通訊設備的外判公司,故此能夠掌握到令衝鋒車「消失」的技術。同時有幾名勁裝男子出現,原來係當年李 sir 的O記舊部,因做過臥底,龍獅正苦為其提供另外身份移居他國。現蔡 sir 將他們召回來,繼續為他們「打江山」:

由於簡大砲不欲成為他人殺人之刀,便叫一眾「大律司」徒弟放下搵真銀的機會,化身議員助理幫師父調查。其中滿口偽ABC口音的女徒弟 Bella(Janice Man飾)跟上了李 sir。就在李 sir 跟蔡 sir 與家俊在窩藏衝鋒車的秘窟處回來時拍下了照片。Bella 跟到去城門隧道,給尾隨的蔡 sir 手下發現了,並非常腦殘地即時發難用車墥向 Bella 的車子,造成嚴重交通意外。大佬,你地成班人包括逃犯李家俊都在隧道內,一出事只要黑警截住兩邊出入口你就無路可逃,要發難對付 Bella 一個弱女子,也不在一時吧?果然,劉 sir 已借助上集認識的廉政專員 Billy(李治廷飾)勾了 Bella 線,截聽了她跟師父的對話,知道 Bella 正在跟蹤家俊。車禍發生後不久,劉 sir 趕至,與眾匪發生激烈槍戰,視港豬生命如草芥。最後劉 sir 槍傷一匪,另外家俊亦身中多槍倒下:

Bella 在車禍中死去,簡大砲懊悔不已;而李 sir 因自己個仔被劉 sir 打殘,亦在醫院用槍指住劉 sir,結果簡大砲發哥上身,已無比氣勢壓倒二人,並訓斥了一頓:

黑警辦事不力,竟然仍未能分得出匪徒所用之自動步槍與警槍子彈的分別,話唔知劉 sir有無在槍戰中誤傷市民。由於劉 sir 已成為警隊負資產,被官至「警務處高級助理處長/刑事及保安處處長」的莫錦泉(蔣志光飾)逼官,要求前下屬梁紫薇(楊采妮飾)一齊簽名支持罷免劉 sir。原來莫 sir 已被李 sir 收買,層壓式下線一判再二判,空頭支票開完一張又一張,莫 sir 就連龍頭大佬都唔知係邊個,便胡裡胡塗的上了賊船,為一個黑警管理副處長便賠上前程:

劉 sir 扮腳痛接受休假的安排,黑警一哥轉完又轉,特首依例要呈報樁秧,咁搞法689真係唔得佢地死。鏡頭一轉見到劉妻,咦,佢肩膀唔係在影片開頭中咗一槍架咩?乜依家好似無事咁?簡大砲約劉 sir 見面,原來 Bella 影相時已將相片上載至雲端,其中有一幅係影到李 sir 父子和蔡 sir 一起。簡大砲嘆謂,議會制度已被人利用成為剷除異已的手段,睇怕689同「官到無求膽自大」的林鄭都感同身受:

劉 sir 與 Billy 重組 Bella 死前的案情,發現李 sir 的車子停在某處超過30分鐘,而 Bella 亦在同樣地方等候;二人推斷李 sir 換車去了某秘密巢穴見家俊和蔡 sir,而該巢穴很可能就是收藏被劫衝鋒車的地點,於是用圓規劃起圖來...咦?阿劉 sir 你又唔知人地車速係幾多,點樣計到個半徑出來?而更大的問題係...「李 sir 的車子停留了30分鐘」,即是來回程連秘密會面「共用去」30分鐘,單程半徑應該係少於15分鐘車程才對...點都好喇,劉 sir 是主角,呢啲細 bug 當睇唔見。劉 sir 早就懷疑莫 sir 有份整自已,故此欺騙莫 sir 謂自己有一隊秘密小隊在追查失蹤衝鋒車的下落,並告知所謂的「匿藏地點」。《三國演義》在蔣幹中計,《寒戰II》有蔣志光中計,果然匪黨來到突擊不果,反而被 Billy 以無人機跟蹤至真正的巢穴(都話咗圓規劃圖係唔 work 的)。

就是劉 sir 下台前數小時,劉 sir 要求李 sir 帶領行動,突擊匪幫。李 sir 唯有含淚進攻自己兄分,又腦殘地叫韓 sir 通知 蔡 sir,自不然又被勾線喇!至此韓、莫二內鬼暴光被捕。另一方面黑警圍剿匪幫,死傷慘重,但也能將所有前O記成員擊殺。行動中發生大爆炸,衝鋒車疑似被毀:

蔡 sir 想走佬,被劉 sir 截住,並帶來689口信,以人治方式有條件交換其「特赦」:1. 李 sir 從此「真・退休」,不得復職;2. 蔡 sir 要將通訊公司的股份賣掉;3. 蔡 sir 走咗就唔好再返我城:

導演可能想再拍第三集,最後家俊身中多槍依然死唔去,好似植物人咁插喉維持生命...
***
不過,呢一集《寒戰II》啲 bugs 多到不合常理(淨係發哥比較好睇),魔術師真係睇到O哂嘴,第三集成唔成事頓成疑問。其實選特首使乜搞到咁大單,十足十外國勢力搞事咁,飛虎隊死完又死,幾乎要搵老解入城咁濟。喂,埸埸大龍鳳一鑊大過一鑊,張小明肯定頭痕過乜,你阿劣政司司長睇怕都唔使旨意獲批辭職了吧?
***
伸延閱讀:
摩摩電影節之《寒戰》:傻的嗎?爭住做一哥?
基本法》第四十八條
香港特別行政區行政長官行使下列職權:



( 五 ) 提名並報請中央人民政府任命下列主要官員:各司司長、副司長,各局局長,廉政專員,審計署署長,警務處處長,入境事務處處長,海關關長;建議中央人民政府免除上述官員職務;


第五屆立法會 (2012至2016年) 坐位表

12 則留言:

  1. 如果有第三集, 睇怕要升級為中南海同國務院, 為左下屆特首人選, 在香港來場中美暗戰
    不過香港編劇的國際觀, 寫到咁大, 恐怕bug會多到潟

    回覆刪除
    回覆
    1. 成套片最大的bug是: 在這個官不聊生的時代, 區區一個問責局長究竟有幾多櫂呢? 值得李sir咁搏?

      刪除
  2. 呢套已經係近年少有嘅港產「大片」,我都有入場睇。導演想拍trilogy ,野心就太大。

    好唔鐘意佢啲橋重用。文,又逼宫。武,又係個犯叫劉sir一個地點轉另一地點玩佢。中間仲要整多鑊劉李對罵(系列名場面?),好鬼刻意。

    不過啲Easter egg 又整得唔錯,好似俾彭于晏打嗰條友,劉華(想)做特首,都幾有玩味。

    又,香港真係無晒演員咩?見到兩個前主播伍孖謙同方面儀逐隻字讀對白真係頂唔順。

    回覆刪除
    回覆
    1. //文,又逼宫。武,又係個犯叫劉sir一個地點轉另一地點玩佢。中間仲要整多鑊劉李對罵(系列名場面?),好鬼刻意。

      淨係得啲bug係新嘅.

      //好似俾彭于晏打嗰條友,劉華(想)做特首,都幾有玩味。

      呢幾段算有心機整,值得稱讚.

      //見到兩個前主播伍孖謙同方面儀逐隻字讀對白真係頂唔順。

      人地都係客串下啫.

      刪除
  3. //(註:呢度有一個大 bug,《寒戰》第一集係貪曾做特首,今集的時間線係緊接直落,但卻出現2016年啟用的西營盤港鐵站,時間跳躍到689執政時期。)

    其實港慘片有好多呢類背景地區與劇情所述不配合的情況,我印象最深刻是杜sir《文雀》最後話拍咗半年的扒手對決,劇情聲稱是發生於中上環一帶,但一幕過馬路卻明顯是拍攝於觀塘工業區駱駝漆大廈附近(背景有個大大的“青年桌球會 官塘”招牌)。杜sir是非常喜歡在東九工業區一帶取景的,或者是佢認為容易掌握拍攝角度吧。

    對呢d情況我通常會比較寬容,只要對劇情推進無影響我都無乜所謂;除非你是擺明賣理念--例如懶笨土、講明賣大埔concept的《紅VAN》,最後取景的超市位於西營盤就是非常不要得之舉。

    至於西營盤站(其實是於2015年3月啟用)的問題,其實劇中出曾出過鏡的貪曾外,所有角色都是虛構,時間點亦語焉不詳,此幕重點是“地鐵站”,只要確實位置對劇情推進無反駁,我會比較寬容,俾佢過關

    (不過相信除了終亂辦有示威外,西營盤站一年都好難有一日好似戲中咁多人...)

    //律政司司長黎永廉(李子雄飾)便去拜會跟公文袋毫無關係、報稱獨立的議員兼超級大狀簡奧偉(周潤發飾)

    李子雄處女作就是1986年《英雄本色》同發哥做對手戲,以港產片之王的database,估唔到下一次合作已經要到三十年後呢一幕.

    另外魔兄你都無cap簡大炮“我要講潛規則,律政司個位幾時到你做”霸氣側漏呢一句...

    //(錢、權、個人、家庭,偏偏就係無「女人」)

    如果是“物化”的“女人群”,可以包括在“錢”一列(“權”其實亦可,但得到“權”只為“玩很多女人”,似乎只是街邊R爛腳的屌絲之言);如果是有真感情的單一個女人,可以包括在“家庭”一列,例如為初戀情人而寧可得罪兩個細佬的郭炳湘(雖然佢本身有父母之命所娶之妻,但佢眼中初戀情人之間又是“另一個家庭”)。

    如果是指“對單一女人不能自拔而無真感情的慾念”,的確是可以另開一列...不過對於去到呢個階層既人,將呢種青頭仔行為另開一瓣,又似乎說不過去...

    另外是否應該用“異性”替代“女人”,光用“女人”有性別歧視之嫌~~

    //這時出現了奇怪的議會投票:在功能組別無反對票,反而地方直選有些微反對票的情況下
    //蔡 sir 亦已拉好人脈(暗示功能組別為何可以一致通過運用特權法)

    真系頂魔兄你唔順,竟然咁都被你留意到...事實上對白可以在這方面做文章,編劇做了個投票結果而唔用是大大的浪費

    //並非常腦殘地即時發難用車墥向 Bella 的車子,造成嚴重交通意外。大佬,你地成班人包括逃犯李家俊都在隧道內,一出事只要黑警截住兩邊出入口你就無路可逃,要發難對付 Bella 一個弱女子,也不在一時吧?

    這的確是我在睇過兩次都無諗到呢一點

    //劉 sir 趕至,與眾匪發生激烈槍戰,視港豬生命如草芥

    佢趕到後見到Bella重傷唔系諗救人,而系追問target系邊度,似乎已經反映佢重視權力多於自己的職責

    //鏡頭一轉見到劉妻,咦,佢肩膀唔係在影片開頭中咗一槍架咩?乜依家好似無事咁?

    這亦是小弟一直無留意到的

    //阿劉 sir 你又唔知人地車速係幾多
    //反而被 Billy 以無人機跟蹤至真正的巢穴(都話咗圓規劃圖係唔 work 的)

    我在NOW睇第二次時先發覺佢起個竇是靠無人機跟踪,同佢之前講乜9“單程半徑”毫無關係

    //劉 sir 早就懷疑莫 sir 有份整自已,故此欺騙莫 sir 謂自己有一隊秘密小隊在追查失蹤鑏衝鋒車的下落,並告知所謂的「匿藏地點」

    呢段好似系劉sir對唔同人講唔同地點,然後睇邊個地點出事就知邊個系內鬼

    //又腦殘地叫韓 sir 通知 蔡 sir,自不然又被勾線喇!

    李sir呢刻都無棋,情願可能被人勾線都要搏架啦.

    //至此韓、莫二內鬼暴光被捕

    我反而覺得最正系蔣志光面懵懵想握手當無事既表情...我在蝗戲院睇時呢幕全場都笑

    //蔡 sir 想走佬,被劉 sir 截住,並帶來689口信,以人治方式有條件交換其「特赦」

    有d遺憾系呢幕可以安排劉華出場,不過你話保安司俾返個credit署長等署長親自攞返個彩都講得通。

    另外與其話“特赦”,不如話正苦“不起訴”:根據《基本法》,所有傷民都有出入境傷港的自由,蔡sir當然可以隨時返嚟,只是你下次返嚟就會被拘捕而已。

    另外我留意到蔡sir check in時,系手持米帝護照...不過當然無交代系咪BNO

    //導演可能想再拍第三集,最後家俊身中多槍依然死唔去,好似植物人咁插喉維持生命...

    以第二集蝗傷兩地票房計,拍第三集就一定,其實第一集臨尾話有人夾持劉sir家人就知道佢想拍第二集...只是我覺得家俊死唔死都大把線拍落去,如果再延續呢條線就實在狗尾續貂

    //不過,呢一集《寒戰II》啲 bugs 多到不合常理(淨係發哥比較好睇)

    的確有好多bug我都系要魔兄你提先睇得出的,套戲節奏太快令我睇時太投入miss咗好多細節

    另外好似最初劇本未定時系想搵發哥演特首的

    //第三集成唔成事頓成疑問。其實選特首使乜搞到咁大單,十足十外國勢力搞事咁
    //如果有第三集, 睇怕要升級為中南海同國務院, 為左下屆特首人選, 在香港來場中美暗戰
    //導演想拍trilogy ,野心就太大

    我周圍睇過第二集既人都話即使明知佢想拍第三集,但都唔知點樣拍落去...編劇視野都系其次,最重要系:個雞棚搭到咁大,第三集無可能唔上升到樁秧Level,個劇本點樣可以又好睇又過到上面審查呢?????

    //前警務署長蔡元祺(張震個老豆張國柱(唔係工黨嗰個)飾)

    又要借題發揮一下:連埋彭于晏,戲裡面主要角色已經有兩個寶島人...又唔見d友嘈?可見用唔用傷民演員不是重點,重點系唔可以用蝗國演員嗻...

    另外周筆暢又有份宣傳又拍海報,但只系行行企企做個可有可無角色...我估有第三集的話佢會做第二集JM的counterpart.

    回覆刪除
    回覆
    1. //除非你是擺明賣理念--例如懶笨土、講明賣大埔concept的《紅VAN》,最後取景的超市位於西營盤就是非常不要得之舉。
      //的確有好多bug我都系要魔兄你提先睇得出的

      成套片第一個bug就係家俊在警察總部內受審, 話劉sir要在10分鐘之內打視像電話俾佢啲同黨. 喂,既然大家都在總部內,邊個負責通知同黨開始計時? 同黨亦無可能知道家俊何時開始受盤問, 唔通佢一直捉住劉妻在鏡頭前呆等?
      就係呢一點令我決意幫套戲debug...

      //另外魔兄你都無cap簡大炮“我要講潛規則,律政司個位幾時到你做”霸氣側漏呢一句...

      我覺得呢句麻麻地,可能當時劇情張力唔夠,仲係在鋪陳階段。

      //另外是否應該用“異性”替代“女人”,光用“女人”有性別歧視之嫌~~

      左膠得你吖!

      //事實上對白可以在這方面做文章,編劇做了個投票結果而唔用是大大的浪費

      伸延閱讀有個座位表, 我真係將個畫面逐個位去對...

      //不過對於去到呢個階層既人,將呢種青頭仔行為另開一瓣,又似乎說不過去...

      西楚霸王都有虞美人喇!

      //我反而覺得最正系蔣志光面懵懵想握手當無事既表情...我在蝗戲院睇時呢幕全場都笑

      蔣志光怕呢類劇情片都會變笑蛋的.

      //另外我留意到蔡sir check in時,系手持米帝護照...不過當然無交代系咪BNO

      呢度我反而無留意.

      //遺憾系呢幕可以安排劉華出場,不過你話保安司俾返個credit署長等署長親自攞返個彩都講得通。

      係囉, 依家乜都由一哥去做, 就嚟出位過689了。

      //連埋彭于晏,戲裡面主要角色已經有兩個寶島人...又唔見d友嘈?可見用唔用傷民演員不是重點,重點系唔可以用蝗國演員嗻...

      以女論女,我覺得景甜靚過哂本片的青春少艾喎...

      //另外周筆暢又有份宣傳又拍海報,但只系行行企企做個可有可無角色...

      如果佢戲份多,又會被班傷民話架喇!真係難得周小姐仲可以講到煞有介事咁:

      http://www.youtube.com/watch?v=v-eF0VRkcDQ&t=1m15s


      刪除
    2. //就係呢一點令我決意幫套戲debug...

      呢一幕我覺得佢暗示總部有內鬼...不過事實上成套戲之後都無交待是否如此

      //西楚霸王都有虞美人喇!

      對西楚霸王嚟講,虞美人係"家人",屬"家庭"類嘞,而不是一個"慾望icon"的"女人"..oh sorry,是"異性".

      //值得李sir咁搏?

      人性的事好難講的,某些人對看似與職位不相稱的權力鍥而不捨,並非我等閒雲野鶴能理解. 況且,以李sir之自負,甚至對四大地產商禮聘都不顧,有得搏更上層樓總好過on99睇住份長粮過埋下半世的.

      //真係難得周小姐仲可以講到煞有介事咁:

      我覺得應該講掂數,佢第三集會孭JM個角色(又開空頭支票)

      //以女論女,我覺得景甜靚過哂本片的青春少艾喎...

      我都覺得景甜幾好,不過似乎魔兄對佢都rate得幾高呀下~

      咁我就冒昧推一套我從來無諗過推俾魔兄(甚至其他人)的港慘片: «賭城風雲1»! 推的理由只有一個: 有人話晶哥能拍出成名女星未被發掘的美艷一面,並在此片作用在景甜身上,而以我用«特殊身份»比較嚟計,我是同意此言的(尤其是情挑發哥一幕...)

      劇情構思其實不差: 主角受邀對付一個洗黑錢集團,主腦自認為世上最聰明的人。以晶哥近年狀態,算叫做有d鬥智鬥力,亦不算齋胡鬧硬滑稽,當然你都可以debug下。總之如果你真係睇時,記住摩摩係叫你睇景甜即可,其他有乜不滿唔好D9我...

      刪除
    3. //呢一幕我覺得佢暗示總部有內鬼...

      但如果timing準確,則「有內鬼」(其實就係韓sir)呢件事就會被劉sir知道。

      //呢段好似系劉sir對唔同人講唔同地點,然後睇邊個地點出事就知邊個系內鬼

      其實呢條橋唔work的 — 如果係有多過一個內鬼的話。只要有同謀間對口供,就知道劉sir是在玩嘢。

      //得搏更上層樓總好過on99睇住份長粮過埋下半世的.

      但係點睇都唔覺得保安局焗腸係好有social status的一份工。

      //記住摩摩係叫你睇景甜即可,其他有乜不滿唔好D9我...

      D,咁睇電影台算了。

      刪除
  4. //另外是否應該用“異性”替代“女人”,光用“女人”有性別歧視之嫌~~

    左膠得你吖!//

    一左還有一左膠

    "異性"O米歧視佐同性戀或者什麼"跨性別人士"囉

    要講"伴侶""仰慕者".....甚或"娘娘(觀音係亦男亦女, 各有傳說)" ^O^

    //Bella 跟到去城門隧道,給尾隨的蔡 sir 手下發現了,並非常腦殘地即時發難用車墥向 Bella 的車子,造成嚴重交通意外。大佬,你地成班人包括逃犯李家俊都在隧道內,一出事只要黑警截住兩邊出入口你就無路可逃,要發難對付 Bella 一個弱女子,也不在一時吧?果然,劉 sir 已借助上集認識的廉政專員 Billy(李治廷飾)勾了 Bella 線,截聽了她跟師父的對話,知道 Bella 正在跟蹤家俊。車禍發生後不久,劉 sir 趕至,與眾匪發生激烈槍戰,視港豬生命如草芥。最後劉 sir 槍傷一匪,另外家俊亦身中多槍倒下//

    成件事好錯, 搞到我出晒戲

    逃犯唔係想逃走, 而係想殺人 - 想殺JM 已經唔明, 最R頭係想殺劉SIR, 帶劉SIR 遊花園果陣大把機會殺佢啦, 我仲以為佢要劉SIR 揹鑊拉低埋劉華添

    警察有本事系全部都係無辜市民既隧道同逃犯搏火又係恐怖

    段戲好似純為佐要有動作/槍戰場面而硬塞落去, 完全違反佐常理
    ...我明既, 最重要係要JM死同彭受傷, 輔排之後既人物沖突, 都係太著跡

    //由於劉 sir 已成為警隊負資產,被官至「警務處高級助理處長/刑事及保安處處長」的莫錦泉(蔣志光飾)逼官,要求前下屬梁紫薇(楊采妮飾)一齊簽名支持罷免劉 sir。原來莫 sir 已被李 sir 收買,層壓式下線一判再二判,空頭支票開完一張又一張,莫 sir 就連龍頭大佬都唔知係邊個,便胡裡胡塗的上了賊船,為一個黑警管理副處長便賠上前程//

    我真心覺得劉SIR係一條廢柴, 俾班賊玩到一桐都無, 又老婆第一法律第二
    踢佢走係每一個真警察既公義之為
    唔知點解要包裝到莫SIR係為佐升職先咁做
    夾硬打做一個壞人咁, 再次, 都係太著跡

    加埋簡大狀無理頭既:雖然係非常時期, 都唔可以用非常手段

    好多都係擺到明既計算.....唔知點講, 總知睇得好出戲

    //總之如果你真係睇時,記住摩摩係叫你睇景甜即可,其他有乜不滿唔好D9我
    摩摩推介埋睇邊個時間段O米得咯^O^

    回覆刪除
    回覆
    1. //我仲以為佢要劉SIR 揹鑊拉低埋劉華添

      本來條橋係咁的,但係有個「槍戰位」班導演又想玩埋佢了。

      //佢趕到後見到Bella重傷唔系諗救人,而系追問target系邊度,似乎已經反映佢重視權力多於自己的職責
      //警察有本事系全部都係無辜市民既隧道同逃犯搏火又係恐怖
      //我真心覺得劉SIR係一條廢柴, 俾班賊玩到一桐都無, 又老婆第一法律第二

      上集飛虎隊全滅,今次又死傷慘重,仲有港鐵炸彈、走犯、隧道槍戰傷及唔少途人,呢位一哥咁都唔使下台,689又怕乜?

      //好多都係擺到明既計算.....唔知點講, 總知睇得好出戲

      扮西片,啲 soundbite 高潮位刻意地set好哂。

      //摩摩推介埋睇邊個時間段O米得咯^O^

      Youtube有無得睇? XD

      刪除
    2. //D,咁睇電影台算了。
      //Youtube有無得睇? XD

      頭兩集的確係電影台或YouTube貨色(雖然我覺得1又比2好),不過剛剛search過,YouTube只有第二集。蝗網同daily motion又唔support time tag...

      search途中搵到呢段,罕有地臘腸寫既野我完全同意,3的確是史上第一爛片--竟然有人用咁多錢去整套咁爛既野出來。

      https://thestandnews.com/culture/%E8%B3%AD%E5%9F%8E%E9%A2%A8%E9%9B%B2iii-%E6%98%AF%E5%8F%B2%E4%B8%8A%E6%9C%80%E7%88%9B%E9%9B%BB%E5%BD%B1-%E6%B2%92%E6%9C%89%E4%B9%8B%E4%B8%80/

      如果魔兄撞岩電影台播3,我反而強烈建議觀摩一下乜野叫爛片--若不將成本算入,只有《冬蟬》+《本地蛋》可與之匹敵.

      //摩摩推介埋睇邊個時間段O米得咯^O^

      潛意識決定行動,魔兄自然會避開文柒戲份而只會睇到景小姐。

      總之見到大boss「高先生」邀約景小姐赴約食飯(其實係想用迷藥chok佢係咪臥底)開始就睇到景小姐情挑發哥嘞.

      刪除
    3. //如果魔兄撞岩電影台播3,我反而強烈建議觀摩一下乜野叫爛片--若不將成本算入,只有《冬蟬》+《本地蛋》可與之匹敵.

      嘩,咁鬼睇唔開,要自殘(浪費生命)? XD

      //潛意識決定行動,魔兄自然會避開文柒戲份而只會睇到景小姐。
      //係想用迷藥chok佢係咪臥底)開始就睇到景小姐情挑發哥嘞.

      春藥嚟架?

      刪除