幾分鐘的約會

「魔術師，請到1號房。」

在屯門醫院日間診所的廣播噐響起的瞬間，魔術師手機又響起。
「魔術師，呢度係屯門醫院，你依家響邊度呀！」
「我咪係門口囉！」魔術師沒好氣地回應。
「你快啲坐低，等嗌名。」
魔術師剛坐下，廣播器便又響起：「魔術師請到8號房。」
魔術師快步而至，面前經過的就是當日做完腿部手術後，轉了去康復大樓見到的串嘴男醫生，條友並唔認得魔術師。
「魔術師，你去咗邊呀！頭先我地搵咗你好耐喎！」一入8號房門口，打個照面的是個中女醫師。
日間診所通常沒有急症病房的青春少艾，認真可惜（見《新一袋醫護人員》）。

是咁的，魔術師這天回屯門醫院覆診腿傷，特地請了半天假，上午睇醫生，下午回家工作。
但奇就奇在，骨科覆診是上午１０時３０分，但之前要照Ｘ光才確定傷口復完情況；照Ｘ光卻又係１０點３０分。

依據魔術師上一次覆診的經驗，照Ｘ光都要等上一段時間，無理由要將覆診同照Ｘ光 set 做同一時間的。
更「不幸」的是，這天照Ｘ光的多是老弱傷殘等弱勢社群，人均所花的時間比較耐，給果魔術師一等便等了１.５小時才照完，照完都中午１２點正。
事實係魔術師照一照Ｘ光都唔駛五分鐘，換埋衫都係１５分鐘左右，最花時間的就是坐係Ｘ光房門口等。
最衰就係又唔知Ｘ光房幾時叫名去照，唔敢行開去排定隊睇醫生。
結果１２點照完，返去骨科輪隊。魔術師望一望門口所顯示的輪候時間，見依家１２點都只係睇到在１０點鐘開始排隊的病人，真係大把老弱傷殘。心想真係有排捱，無理由俾佢地 lock 住個人係度乾等，不如落去食個飯先，之後再睇醫生，執埋藥（其實只係鈣片）便返歸。
我城的公立醫療雖然算唔錯，但問題就係效率太低，所花的時間大都是在等候，浪費生命。

魔術師為安全計，問下守門口的阿姐確認。
「醫生點都要睇哂啲症先至走架！你千祈唔好改期呀！再排過要排成半年架！」阿姐的答案令魔術師甚為安心。
吃過飯後，回到睇症室。嘩！啲人唔見哂嘅？
就在這時廣播噐響起：「魔術師，請到1號房。」
中女醫師責問魔術師去咗邊，魔術師當然大條道理：「你地頭先照Ｘ光照咗我個半鐘，我咪去咗食飯囉...」
「得得得...」中女醫師怕魔術師化身維園阿伯，便馬上打發魔術師走：「睇Ｘ光你傷口埋口都幾好，你行路又快，睇怕都無乜事。照舊都係幾個月後再覆診喇。」
Ｄ，咁都得！真係唔使３分鐘搞掂！唔通中女醫師等住放飯，俾魔術師阻住哂？
睇嚟魔術師真係罪大惡極。

中女醫師替魔術師 book 好覆診日期，便說：「你去對面Ｘ光部 book 期喇！」
頂，骨科睇醫生之前一定要照Ｘ光，你都 book 咗睇醫生嘅日子咯，個 system 就唔識順便出埋照Ｘ光的時間？除非病人另有要求，否則呢樣嘢真係可以 by default 做到。
真係電車男職業病又發作。
好嘞，去到Ｘ光部，原來全都放飯去了，要下午兩點先返。魔術師當然唔會等，咁啱又見到呢個醫管局預約 app，於是便將之下載，諗住返屋企一邊在家工作做工資奴，一邊預約照Ｘ光。

（圖片來源：App Store 預覽 > 預約通 BookHA）

點知！
個 app 原來只係識預約新症，照Ｘ光呢啲「附帶工序」係唔會處理的！
結果又要同包青天上司講聲，要早少少收工，打的去屯門醫院親自 book 期照Ｘ光！
人地大把連鎖餐廳食肆都有掛隊 app 喇，又唔見你醫管局整返個出嚟？整埋咁多廢 app，連威院急症服務、明愛眼科預約咁 niche 都整一個 app 出嚟，擺明係山頭主義，完全無 integration 的概念！
智慧城市？低Ｂ城市就真！

（圖片來源：醫管局 > 手機應用程式）

＊＊＊
伸延閱讀：
新一袋醫護人員

信報　2018年4月20日
金箴 金針集
政府廢App吃力不討好
經濟學告訴我們，政府效率永遠及不上市場，至於公眾服務是否一定要追求效率，則交由各門各派拗餐飽。不過，看看政府提交立法會財委會的文件，不由得不信有些事情最好還是留給市場，否則官老爺做了也等於白做，嘥氣！
講的是最新公布的「廢App」排名。政府出品的手機App幾乎「非爛即廢」是用家共識，幾年前審計署已查過一次，揪出亂花公帑發展IT的大嘥鬼，可是各部門繼續闊佬懶理，傳媒報道今年「廢App之王」由土木工程拓展署推出的「寶雲道斜坡研習徑」榮膺。自去年1月推出至今，這隻花掉15萬元開發的新App，在各個平台只錄得可憐的1200次下載，與倒錢落海分別不大。
根據官方介紹，這個App是「互動式多媒體自助導遊」，目的是方便教師和中學生實地研習斜坡防護。既然斜坡防護是一門冷知識，等於十分冷門，下載量差勁實在理所當然。若計及去年下架的App，「綠化斜坡-優化社區」（同樣出自土木署）才是真正包尾大幡，僅得210次下載。除了土木署外，廉政公署花上21.2萬元開發的「廉署電子書平板電腦應用程式」，在區區700次下載後就黯然下架。
智能手機平台廢App極多，但奇葩亦不少，只要新App設計夠user-friendly，開發者又勤於更新「除蟲」，假以時日，必能冒出頭來。好像由天文台自家設計的「我的天文台」App，啟用至今下載達700萬次，比同類天氣App受歡迎，可以說是一眾官方App最吐氣揚眉的代表作。台北市長柯P最近推出「台北車站通」，指引路癡克服這個地下迷宮，也算是有實用的成功例子。
奇葩始終不是常態，數量上固然遠遠不及廢App，而且維護十分吃力。英國Government Digital Service（GDS）的前設計總監Ben Terrett，兩年前下了一個大膽決定：一刀切禁止政府部門開發手機App。他解釋，官方App最大問題出在一個「貴」字，「開發太貴、維護更貴」。當手機系統每年推陳出新，要養起一個App在所有電話正常運作，在在需財。
Terrett坦白說，政府想接觸愈來愈多的手機用戶，最好的方法是回歸基本步：搞網站。一個設計正常的網站可以適應不同手機屏幕大小，iOS和Android用戶都可以輕鬆瀏覽。同時，政府網站應該以用家角度出發，Terrett指出，官員常常以為市民會由「首頁」開始找資訊，查實99.9%的人都是用Google search。
實驗證明，IT這回事不是有錢就萬能，識玩才是關鍵。當潮流興整App，政府部門就一窩蜂去「為App而App」，結果不湯不水慘淡收場浪費公帑。同樣地，當司局長只在social media分享網誌和照片，卻與網民毫無互動，宣傳作用有限，兼且久不久就吸一堆「嬲」。
香港有個真係見過蘋果教父Steve Jobs的創科局局長，不知他會否與Terrett英雄所見略同。香港作為國際城市，但IT思維落後，已為業界詬病多年。當局長上星期見到市民一仆一碌去房署遞表申請居屋，又有沒有為政府連網上交表都做不到而感到慚愧？