多謝劏房波！

真係估唔到，魔術師今年（２０１８—１９年度）的應付差餉竟然係＄２,４８１，剛剛好可以舐到盡波叔粒糖仔（好核突，嘔～～），真係多謝哂！

對比起去年，每季先寬減＄１,０００咁大把，今年粒糖仔真係大好多（或者去年的「紓困措施」只係山渣餅，而唔係「糖」）：

睇返今年同去年兩張單，原來魔術師間屋的年租值只係由＄１８０,４８０加到＄１９８,４８０，升幅約１０％咁大把，真係嚴重跑輸大市；而且以魔術師呢間實呎７５０呎的三房（另有雜物房）一套間格，景觀又開揚，無理由月租＄１６,５４０咁少（呎租＄１６,５４０／７５０＝＄２２）），情況同去年相近（見《消失的差餉》）。如果現實真係咁平租，打埋稅隨時租平過供，咁租樓真係「日日賺」了。諗返，差估署真係好似未俾審計署捉過，效率真係十年如一日；不過對小業主來說，呢個都算係好消息嚟嘅！
忽發奇想，如果販民及保皇黨竟然因為中剷粒糖仔太大，而可以策動否決波叔份預算案，逼７７７解散垃圾會重選，咁波叔已派咗的糖仔係咪又要問市民收返呢？

＊＊＊
伸延閱讀：
波叔的派糖預算案（２０１８—１９）
消失的差餉

中華人民共和國香港特別行政區《基本法》第五十條
香港特別行政區行政長官如拒絕簽署立法會再次通過的法案或立法會拒絕通過政府提出的財政預算案或其他重要法案，經協商仍不能取得一致意見，行政長官可解散立法會。
行政長官在解散立法會前，須徵詢行政會議的意見。行政長官在其一任任期內只能解散立法會一次。