自願私家醫保

魔術師開返個自己個紫微斗數命盤嚟睇，原來今年流年命盤同十年大運命盤相疊；天相坐十年和流年疾厄宮，太陽化科坐福德宮，與先天擎手同度，加埋就係眼睛有水腫，要開刀做手術。果然呢幾年魔術師都有呢個問題，斷斷續續醫了幾年，都叫做醫返好；但上個月開始，有些舊時未清的瘀血浮返上來，搞到睇嘢有啲唔清楚（所以寫 blog 多了錯別字，亦同時懶得理那些伸手黨）。醫生話係開始有老花（！），眼球拉址之故，而令瘀血擴散，需要做手術將瘀血清除。
於是，在剛過去的星期五，魔術師便去了法國醫院（即聖德肋撒醫院），留醫一晚做手術。
入院登記處人頭湧湧，原來真係有唔少人會去睇私家醫院。魔術師做好入院登記後會有個「禮品包」，內有刷牙洗臉與及沐浴用品，好鬼酒店 feel：

魔術師的醫生實在太好人，佢幫魔術師 book 的是大房；但由於魔術師的「自願私家醫保」係包住私家房，住院賠償額為９０％，最高每年６０萬，真係不住白不住。一生總要豪一次，即使住私家房其他醫院雜費要貴上５５％都係咁話：

上到病房，單人床係預咗，可惜無甚景觀（設計Ｃ口吻），不過廁所浴室倒是寬敞。可惜魔術師的手術是在夜晚７時進行，預期做一個鐘，仲要全身麻醉，做完都 wing wing 地，為安全計只可以用個馬桶，沖涼洗頭都係等星期六早上返回屋企休息完才做吧：：

病床上方有輕觸式終端機，點餐睇電視上網乜乜乜都可以靠佢。不過魔術師都係慣咗帶私伙 notebook 做嘢：

手術時間剛巧是晚飯時間，所以魔術師要在做手術前先點好餐，待做完手術醒轉後再叫嬸嬸叮熱再吃。今次呢個豉汁蒸鯇魚腩加菜湯真係幾得，比舊年魔術師住屯門醫院的飯好食得實在太多了：

手術順利完成，星期五晚做完，做一晚獨眼龍之後，星期六早上便可以拆紗布，下星期一如常返工；傷口的縫線會自動溶解，下星期六去覆診即可。埋單計數，一共１７萬（眼科醫生的手術費是１０萬，果然是星球人），照計魔術師只需付一萬七千幾，其餘由保險公司承包。好似魔術師呢啲 case，由於已經有「已存在病症」，你話自願醫保如果唔包，咁就真係有再多的免稅額，魔術師都唔會去轉囉！

＊＊＊
伸延閱讀：
維基百科：聖德肋撒醫院